దాసరి జయంతి సందర్భంగా ట్వీట్ చేసిన మంచు విష్ణు... ఫైర్ అవుతున్న మెగా ఫ్యాన్స్
cinema | Suryaa Desk | Published : Wed, May 04, 2022, 02:25 PM
మే 4... తెలుగు చలనచిత్ర దర్శక దిగ్గజం దాసరి నారాయణరావు గారి జయంతిని పురస్కరించుకుని చిత్రపరిశ్రమ మే 4వ తేదీని దర్శకుల రోజుగా జరుపుకుంటుంది. ఈ మేరకు ప్రముఖ టాలీవుడ్ హీరో, మూవీ ఆర్ట్స్ అసోసియేషన్ అధ్యక్షుడు మంచు విష్ణు దాసరిని తలచుకుంటూ తాజాగా ఒక ట్వీట్ చేసాడు. చిత్రసీమకున్న ఏకైక గురువు దాసరి గారు. ఆయనో లెజెండ్. సినీపరిశ్రమ పెద్దగా ఆయన స్థానాన్ని ఎవ్వరూ భర్తీ చెయ్యలేరు.... అంటూ ట్వీట్ చేసాడు విష్ణు. అయితే దీనిపై మెగాస్టార్ ఫ్యాన్స్ మండిపడుతున్నారు. దాసరి బతికున్నంత కాలం చిత్రపరిశ్రమను ఎన్నోవిధాల ఆదుకున్నారు. ఆయన కాలం చేసినప్పటి నుండి ఇండస్ట్రీ పెద్దగా ఎవరుండాలనే చర్చలు చాలా హాట్ హాట్ గా జరిగాయి. సినీ పెద్దగా చిత్రసీమ బాధ్యతలను చూసుకోవటానికి అందరు ఏకగ్రీవంగా మెగాస్టార్ చిరంజీవి పేరును సూచించగా, ఆయన మాత్రం నిరాకరించారు. ఇండస్ట్రీ పెద్దగా కాదు బిడ్డగా ఎల్లప్పుడూ చిత్రపరిశ్రమ అభివృద్ధికి పాటుపడతానని చెప్పుకొచ్చిన విషయం తెలిసిందే. అయినా చాలామంది సినీ ప్రముఖులు చిరంజీవిగారినే ఇండస్ట్రీ పెద్ద గా భావిస్తున్నారు. ఇటీవల జరిగిన సినీ కార్మికుల దినోత్సవ కార్యక్రమంలో తెలంగాణా సినిమాటోగ్రఫీ మంత్రి తలసాని కూడా చిరంజీవి గారే ఇండస్ట్రీ పెద్ద అంటూ వ్యాఖ్యానించారు. ఈ క్రమంలో మంచు విష్ణు చేసిన ట్వీట్ వివాదాస్పదంగా మారింది. ముఖ్యంగా మెగా అభిమానులు విష్ణును విమర్శిస్తున్నారు. సోషల్ మీడియాలో అతనిపై పెద్ద ఎత్తున ట్రోలింగ్ కు దిగారు.
|
|