ప్రేమకథను వివరించిన హర్భజన్‌

 టీమిండియా క్రికెటర్‌ హర్భజన్‌ సింగ్‌..బాలీవుడ్‌ నటి గీతా బస్రాను ప్రేమ వివాహం చేసుకున్న సంగతి తెలిసిందే. 2015 అక్టోబర్‌లో గీత-హర్భజన్‌ల వివాహం ఘనంగా జరిగింది. 2016లో వీరిద్దరికీ పండంటి పాప పుట్టింది. అయితే గీతతో తాను ఎలా ప్రమలో పడ్డాడో హర్భజన్‌ ఓ కార్యక్రమంలో వెల్లడించారు. సినీ నటి నేహా ధుపియా వ్యాఖ్యాతగా వ్యవహరిస్తున్న ‘నో ఫిల్టర్‌ నేహా’ కార్యక్రమంలో తన లవ్‌స్టోరీ గురించి భజ్జీ ఇలా వివరించాడు.

‘గీతను ఓ సినిమా పోస్టర్‌లో చూసి ఇష్టపడ్డాను. తన ఫొటోను యువరాజ్‌ సింగ్‌కు చూపించి ‘ఆమె ఎవరు’ అని అడిగా. యువీ తనకు తెలీదన్నాడు. అప్పుడు ఆమె వివరాలు తెలుసుకొమ్మని చెప్పాను. మాకు సువేద్‌ లోహియా అని ఓ స్నేహితుడు ఉండేవాడు. గీతకు సువేద్‌ తెలుసు. అతని ద్వారా గీతను కలుసుకోగలిగాను. మరో విషయం ఏంటంటే.. అదే సమయంలో మేం ప్రపంచకప్‌ గెలిచాం. మ్యాచ్‌ ముగిశాక తిరిగి ముంబయి వచ్చేశాను. ఆ తర్వాత గీతకు మెసేజ్‌ చేసి కాఫీ షాప్‌లో కలుద్దామని చెప్పాను. కానీ గీత సమాధానం ఇవ్వలేదు. ఆ తర్వాత ఐపీఎల్‌ మొదలైంది. ‘మాకు టికెట్స్‌ దొరుకుతాయా?’ అని గీత నన్ను అడిగింది. కానీ టికెట్‌ తన కోసం కాదని తన డ్రైవర్‌ కోసమని చెప్పింది. తను అడిగింది కదా అని టికెట్స్‌ ఇప్పించాను. నేను సాయం చేశాను కాబట్టి తను కాఫీకి రావడానికి ఒప్పుకొంది. అలా కొన్ని రోజుల పాటు తరచూ కలుసుకుంటూ ఉండేవాళ్లం. ఓసారి పెళ్లి గురించి అడిగితే.. ‘నాకు ముందు కెరీర్‌ ముఖ్యం’ అంది. నాకు కూడా కెరీరే ముఖ్యం అని చెప్పాను. అలా తొమ్మిది నెలలు గడిచాక పెళ్లికి ఒప్పుకొంది’ అని తన ప్రేమకథను చెప్పుకొచ్చాడు భజ్జీ.