తొలి సినిమాతోనే హిట్ అందుకున్న దర్శకులు

ఇండస్ట్రీ ప్రవహించే నది లాంటిది. ఇక్కడ పాత నీరు ఉన్నా లేకపోయినా కొత్త నీరు మాత్రం ప్రతి ఏడాది వస్తూనే ఉంటుంది. ఈ ఏడాది కూడా కొత్త డైరెక్టర్లు చాలామంది తెలుగు ఇండస్ట్రీకి వచ్చారు. ఎప్ప‌ట్నుంచో క‌ల‌లు కంటున్న త‌మ తొలి సినిమా క‌ల‌ను ఈ ఏడాది పూర్తి చేసుకున్నారు వాళ్లు. అందులో చాలామంది విజయం సాధించడం ఇండస్ట్రీకి శుభపరిణామం. మరి 2018లో టాలీవుడ్లో తొలి సినిమాతోనే విజయం అందుకున్న ఆ ద‌ర్శ‌కులు ఎవరో ఒకసారి చూద్దాం..

వెంకీ అట్లూరి 

ఛ‌లో వచ్చిన వారం రోజుల్లోనే మరో కొత్త దర్శకుడు ఇండస్ట్రీకి విజయం అందించాడు. అతడి పేరు వెంకీ అట్లూరి. ప‌దేళ్ల కింద న‌టుడుగా ఇండ‌స్ట్రీకి వ‌చ్చిన వెంకీ.. ఇప్పుడు ద‌ర్శ‌కుడిగా మారాడు. వరుణ్ తేజ్ హీరోగా వచ్చిన తొలిప్రేమతో ఈయ‌న మెగాఫోన్ ప‌ట్టాడు. ఈ చిత్రం మంచి విజయం సాధించింది. అద్భుతమైన ప్రేమకథగా ఈ చిత్రాన్ని తెరకెక్కించాడు వెంకీ అట్లూరి. నాటి పవన్ కళ్యాణ్ టైటిల్ వాడుకున్నా.. ఎలాంటి చెడ్డ‌పేరు తీసుకురాకుండా జాగ్రత్త పడ్డాడు ఈ కుర్ర దర్శకుడు. తొలిప్రేమ దాదాపు పాతిక కోట్లు వసూలు చేసింది.

అజ‌య్ భూప‌తి 

గతేడాది అర్జున్ రెడ్డితో సంచలనం సృష్టించిన సందీప్ రెడ్డి వంగ ఆదర్శంగా ఏడాది ఆర్ఎక్స్ 100 సినిమాతో వచ్చాడు కొత్త దర్శకుడు అజయ్ భూపతి. పూర్తిగా బోల్డ్ కంటెంట్ తో వ‌చ్చిన ఈ చిత్రం సంచ‌ల‌న విజ‌యం సాధించింది. వర్మ ఏక‌ల‌వ్య శిష్యుడు అజ‌య్ భూప‌తి. ఆ ఛాయ‌లు ఆర్ఎక్స్ 100లోనూ క‌నిపించాయి. కార్తికేయ హీరోగా వచ్చిన ఈ చిత్రం 13 కోట్లు వసూలు చేసి లాభాల పంట పండించింది. సినిమాలో కాస్త బూతు ఉన్నా కూడా కంటెంట్ బలంగా ఉండటంతో ఈ సినిమాకు యూత్ బాగానే కనెక్ట్ అయ్యారు

శశికిరణ్ తిక్క 

గూడచారి సినిమాతో తెలుగు ఇండస్ట్రీకి ద‌ర్శ‌కుడిగా పరిచయమయ్యాడు శశికిరణ్ తిక్క. ఈ సినిమా సంచలన విజయం సాధించింది. అడవి శేష్ క‌థ‌, స్క్రీన్ ప్లే అందించి హీరోగా న‌టించిన గూడచారి దాదాపు 13 కోట్లు వసూలు చేసింది. అతి తక్కువ బడ్జెట్లో అద్భుతమైన ఔట్ పుట్ ఇచ్చాడు ఈ దర్శకుడు. హాలీవుడ్ రేంజ్ యాక్షన్ స్టంట్స్ తో గూడచారి అదరగొట్టింది.ఈ ఏడాది మరో ఇద్దరు కొత్త దర్శకులు కూడా బాగానే ఆకట్టుకున్నారు. వాళ్లకు విజయం రాలేదు కానీ మంచి పేరు అయితే వ‌చ్చింది. వాళ్లే రాహుల్ రవీంద్రన్.. వెంకటేష్ మహా. ఇందులో రాహుల్ రవీంద్రన్ తెరకెక్కించిన చిలసౌ సినిమా మంచి టాక్ తెచ్చుకున్నా కూడా కమర్షియల్ గా ఆడలేదు. ఇక వెంకటేష్ మ‌హా తెర‌కెక్కించిన కేరాఫ్ కంచరపాలెం సినిమా ఈ ఏడాది ప్రేక్షకుల నోళ్ళలో బాగానే నానింది. ఏడాది చివర్లో శ్రీహర్ష కొనగంటి తెరకెక్కించిన హుషారు సినిమా కూడా మంచి విజయం సాధించింది. మొత్తానికి 2018లో త‌మ‌కు వ‌చ్చిన అవ‌కాశాల‌ను బాగానే వాడుకున్నారు ఈ కొత్త ద‌ర్శ‌కులు.