సల్మాన్ ఖాన్ ఈ రంజాన్ కి వస్తున్నాడు

ప్రతి ఏడాదీ రంజాన్ పండగ వచ్చిందటే సల్మాన్ ఖాన్ థియేటర్లలో ఉండాల్సిందే. చాలా ఏళ్లుగా ఈ సంప్రదాయం కొనసాగుతోంది. ఆ పండుగను అతడికే రాసిచ్చేసింది బాలీవుడ్. పోయినేడాది రంజాన్‌కు ‘రేస్-3’తో పలకరించాడు సల్మాన్. ఈ సినిమా తీవ్రంగా నిరాశ పరిచింది. ఐతే ‘రేస్-3’ ప్రోమోలు చూసిన వాళ్లెవ్వరూ కూడా ఆ సినిమా ఆడుతుందని ఊహించలేదు. ఓ మోస్తరుగా ఓపెనింగ్స్ అయితే వచ్చాయి కానీ.. సినిమా నిలవలేదు.

ఐతే ఈసారి రంజాన్‌కు మాత్రం సల్మాన్ బలమైన సినిమాతోనే బరిలోకి దిగుతున్నట్లున్నాడు. ఆ చిత్రమే.. భారత్. తనకు ఇంతకుముందు ‘సుల్తాన్’ లాంటి మరపురాని సినిమాను అందించిన అలీ అబ్బాస్ జాఫర్ దర్శకత్వంలో సల్మాన్ నటించిన సినిమా ఇది. ఈ రోజే దీని టీజర్ లాంచ్ చేశారు.

దేశం మీద ప్రేమతో తన తండ్రి తనకు ‘భారత్’ అని పేరు పెడితే.. ఆ పేరు నిలబెట్టేలా బతకాలనుకునే వ్యక్తి కథ ఇది. టైటిల్.. టీజర్ ప్రకారం చూస్తే ఇది దేశభక్తి నేపథ్యంలో నడిచే సినిమాలా కనిపిస్తోంది. టీజర్ నిండా సల్మానే కనిపించాడు. అతడిని వివిధ అవతారాల్లో చూపిస్తూ.. తనచేతే పవర్ ఫుల్ డైలాగ్‌తో వాయిస్ ఓవర్ ఇప్పించాడు దర్శకుడు అలీ అబ్బాస్. ఇది వివిధ కాలాల్లో నడిచే పీరియడ్ ఫిలిం లాగా కూడా అనిపిస్తోంది. ఐతే కథేంటన్నది పెద్దగా రివీల్ చేయలేదు. సల్మాన్ తన అభిమానుల్ని అలరించే స్క్రీన్ ప్రెజెన్స్‌తో అలరించాడు.

సల్మాన్ ఖాన్ సొంత నిర్మాణ సంస్థలో ‘భారత్’ తెరకెక్కింది. అతడికి ఇంకో నలుగురు నిర్మాతలు తోడవుతున్నారు. రంజాన్ కానుకగా జూన్ 7న ఈ చిత్రం ప్రేక్షకుల ముందుకు రానుంది. ఇందులో సల్మాన్‌కు జోడీగా కత్రినా కైఫ్, దిశా పఠాని, టబు నటించడం విశేషం. సీనియర్ నటుడు జాకీఫ్రాఫ్ విలన్ పాత్రలో కనిపించనున్నాడు. విశాల్-శేఖర్ సంగీతం అందించారు. మరి ఎప్పట్లాగే ఈసారి కూడా రంజాన్‌కు పండుగ మామూలు కోసం వస్తున్న సల్మాన్‌కు ప్రేక్షకుల నుంచి ఎలాంటి స్పందన వస్తుందో చూడాలి.