అర్జున్ రెడ్డి ఫ్రెండ్ కి హాలీవుడ్ నుండి ఆఫర్

రీజ‌నల్ సినిమాను.. ఇక్క‌డి ఆర్టిస్టులను త‌క్కువగా చూసే రోజులు పోయాయి. ముఖ్యంగా తెలుగు సినిమా సత్తా ఏంటో గ‌త కొన్నేళ్ల‌లో అంద‌రికీ తెలిసింది. ఇక్క‌డి ఆర్టిస్టులు కూడా ప్ర‌పంచ స్థాయిలో గుర్తింపు సంపాదించారు. మ‌న సినిమాలు అమెరికాలో ఎలా ఇర‌గాడేస్తున్నాయో తెలిసిందే. కొన్నిసార్లు వ‌సూళ్ల ప‌రంగానూ హాలీవుడ్ సినిమాల‌కు కూడా దీటుగా నిలుస్తున్నాయి తెలుగు చిత్రాలు.

హాలీవుడ్ నుంచి ఆర్టిస్టుల్ని, టెక్నీషియ‌న్ల‌ను తీసుకొచ్చి మ‌న సినిమాల్లో ప‌ని చేయిస్తున్నారు. అలాగే మ‌న ఆర్టిస్టుల‌కు కూడా హాలీవుడ్ సినిమాల్లో అవ‌కాశం ద‌క్కుతోంది. 'అర్జున్ రెడ్డి' సినిమాలో విజయ్ దేవరకొండకు స్నేహితుడి పాత్రలో నటించి ప్రేక్షకులను మెప్పించిన రాహుల్ రామకృష్ణకు మంచి గుర్తింపే సంపాదించుకున్నాడు.   కమెడియన్ పాత్రలతో పాటు లీడ్ రోల్స్ కూడా చేస్తున్న రాహుల్ తాజాగా హాలీవుడ్ ఎంట్రీ ఇస్తున్నానంటూ అందరికీ సర్ప్రైజ్ ఇచ్చాడు.

ప్రదీప్ కాటసాని దర్శకత్వం వహిస్తూ.. నిర్మిస్తున్న 'సిల్క్ రోడ్' అనే సినిమాలో రాహుల్ రామకృష్ణ లీడ్ రోల్ పోషిస్తున్నాడు.  దర్శకుడు ప్రదీప్ కు ఇది డెబ్యూ చిత్రం.  లాస్ ఎంజెలెస్ నేపథ్యంలో సాగే ఈ సినిమా సైబర్ క్రైమ్.. డ్రగ్స్ చుట్టూ తిరుగుతుందట.  రాహుల్ అనగానే కామెడీ సినిమా అనుకుంటారేమో.. కాదు.  ఈ సినిమాలో రాహుల్ రామకృష్ణ పోషించేది సీరియస్ పాత్రే.  ఈ సినిమా తనకు డ్రీమ్ ప్రాజెక్ట్ అంటున్నాడు రాహుల్ రామకృష్ణ   . సైబ‌ర్ క్రైమ్.. డ్ర‌గ్స్ చుట్టూతిరిగే క్రైమ్ థ్రిల్ల‌ర్ క‌థ‌తో "సిల్క్ రోడ్" తెరకెక్కుతోంది. ఎట్ట‌కేల‌కు సినిమా సెట్స్ మీదికి వెళ్ల‌డం సంతోషంగా ఉంద‌ని రాహుల్ రామ‌కృష్ణ చెప్పాడు.

షార్ట్ ఫిలిమ్స్ ద్వారా పేరు సంపాదించిన రాహుల్.. వెండితెర అరంగేట్రం చేసి.. ఇంత వేగంగా హాలీవుడ్ రేంజికి ఎద‌గ‌డం  విశేష‌మే. ప్ర‌స్తుతం తెలుగులో అర‌డ‌జ‌నుకు పైగా సినిమాల్లో న‌టిస్తున్నాడు రాహుల్. గ‌త ఏడాది కాలంలో అత‌ను రెండంకెల సంఖ్య‌లో సినిమాలు చేశాడు. "హుషారు" లాంటి చిన్న సినిమా సూప‌ర్ హిట్ట‌యిందంటే.. అందులో రాహుల్ చేసిన స్పెష‌ల్ రోల్ ఓ ముఖ్య కార‌ణం.