న్యూజిలాండ్‌తో 4, 5 టీ20లకు తిలక్ దూరం,,,, కానీ వరల్డ్‌కప్‌లో ఎంట్రీ!

టీమిండియా యువ స్టార్ బ్యాటర్ తిలక్ వర్మ న్యూజిలాండ్‌తో జరుగుతున్న టీ20 సిరీస్‌లో చివరి రెండు మ్యాచ్‌లకు కూడా దూరంగా ఉండనున్నాడు. అయితే టీ20 వరల్డ్‌కప్ 2026కి మాత్రం తాను పూర్తిగా ఫిట్‌గా ఉంటాడని తాజా నివేదికలు స్పష్టం చేస్తున్నాయి. తొలి మూడు టీ20 మ్యాచ్‌లకు దూరమైన తిలక్ వర్మ, నాలుగో మరియు ఐదో టీ20లకూ అందుబాటులో ఉండడం లేదు. గాయంనుంచి కోలుకుంటున్న 23 ఏళ్ల హైదరాబాదీ బ్యాటర్, ఫిబ్రవరి 3న ముంబైలో భారత జట్టుతో కలవనున్నాడు. ఫిబ్రవరి 4న నవీ ముంబైలో దక్షిణాఫ్రికాతో జరిగే టీ20 వరల్డ్‌కప్ వార్మప్ మ్యాచ్‌కు ముందు తిలక్ జట్టులో చేరనున్నట్లు తెలుస్తోంది.

భారత్ తన వరల్డ్‌కప్ ప్రయాణాన్ని ఫిబ్రవరి 7న ముంబైలో అమెరికా జట్టుతో ప్రారంభించనుంది. ఆ మ్యాచ్‌కు తిలక్ వర్మ పూర్తిగా సిద్ధంగా ఉంటాడని టీమ్ మేనేజ్‌మెంట్ వర్గాలు భావిస్తున్నాయి. తిలక్ గైర్హాజరీలో తొలి మూడు టీ20లకు శ్రేయస్ అయ్యర్‌ను జట్టులోకి తీసుకున్నారు. ఇప్పుడు చివరి రెండు మ్యాచ్‌లకూ అయ్యర్ జట్టులో కొనసాగించే అవకాశాలు బలంగా కనిపిస్తున్నాయి. అయితే ప్లేయింగ్ ఎలెవన్‌లో అవకాశం ఇస్తారా లేదా అన్నది మ్యాచ్‌కు ముందు స్పష్టత రానుంది.

ఐపీఎల్‌లో పంజాబ్ కింగ్స్ జట్టును నడిపిస్తున్న శ్రేయస్ అయ్యర్, ఐపీఎల్ చరిత్రలో రెండో అత్యంత ఖరీదైన ఆటగాడిగా నిలిచారు. 2025 మెగా వేలంలో ఆయనను పంజాబ్ జట్టు రూ.26.75 కోట్లకు సొంతం చేసుకుంది. ఇక తిలక్ వర్మ టీ20 అంతర్జాతీయ రికార్డు విషయానికి వస్తే, ఇప్పటివరకు 40 మ్యాచ్‌లు ఆడిన ఆయన రెండు సెంచరీలు, ఆరు అర్ధశతకాలతో మొత్తం 1183 పరుగులు సాధించారు. 2025 ఆసియా కప్ ఫైనల్‌లో పాకిస్తాన్‌పై భారత్ తరఫున అత్యధిక పరుగులు చేసిన బ్యాటర్‌గా కూడా తిలక్ నిలిచారు.

తిలక్ స్థానంలో నెంబర్ 3లో బ్యాటింగ్ చేసిన ఇషాన్ కిషన్, ఈ సిరీస్‌లో మంచి ప్రభావం చూపాడు. రాయ్‌పూర్‌లో జరిగిన రెండో టీ20లో కేవలం 32 బంతుల్లో 76 పరుగులు చేసిన ఇషాన్, గువాహటిలో జరిగిన మూడో టీ20లో 13 బంతుల్లో 28 పరుగులతో మ్యాచ్‌ను త్వరగా ముగించడంలో కీలక పాత్ర పోషించాడు. మొత్తానికి, న్యూజిలాండ్‌తో సిరీస్‌లో తిలక్ వర్మ లేకపోయినా, వరల్డ్‌కప్‌కు మాత్రం అతను పూర్తి స్థాయిలో అందుబాటులోకి రావడం భారత జట్టుకు పెద్ద ఊరటగా మారింది.