రిపబ్లిక్ డే వేడుకల్లో రాహుల్, ఖర్గేలకు మూడో వరుసలో సీటు

భారత 77వ గణతంత్ర వేడుకల్లో లోక్‌సభ ప్రతిపక్ష నేత రాహుల్ గాంధీ.. కాంగ్రెస్ పార్టీ అధ్యక్షుడు, రాజ్యసభలో ప్రతిపక్ష నేత మల్లికార్జున ఖర్గేలకు కేటాయించిన సీటింగ్ ఏర్పాట్లు కాంగ్రెస్, బీజేపీ పార్టీల మధ్య తీవ్ర రాజకీయ దుమారానికి దారితీశాయి. గతంలో కూడా ఇలాంటి వివాదాలు తలెత్తినప్పటికీ.. ఈసారి కాంగ్రెస్ పార్టీ దీన్ని తీవ్ర ప్రోటోకాల్ ఉల్లంఘనగా అభివర్ణిస్తూ కేంద్రంలోని నరేంద్ర మోదీ ప్రభుత్వంపై తీవ్ర విమర్శలు గుప్పించింది.

ఢిల్లీ కర్తవ్యపథ్‌లో జరిగిన గణతంత్ర పరేడ్ సందర్భంగా.. ప్రతిపక్ష నేతలు రాహుల్ గాంధీ , మల్లికార్జున ఖర్గేలను మూడో వరుసలో కూర్చోబెట్టారు. దీనిపై కాంగ్రెస్ నేత రణదీప్ సింగ్ సూర్జేవాలా తీవ్రంగా స్పందించారు. కేంద్ర ప్రభుత్వం తమ ఆత్మన్యూనతా భావం కారణంగానే ఇలా వ్యవహరిస్తోందని.. ప్రజాస్వామ్య సంప్రదాయాలను తుంగలో తొక్కిందని తీవ్ర ఆరోపణలు గుప్పించారు.

కాంగ్రెస్ వాదన

2014కు ముందు సుష్మా స్వరాజ్, అరుణ్ జైట్లీ, ఎల్‌కే అద్వానీ వంటి ప్రతిపక్ష నేతలకు ఎప్పుడూ మొదటి వరుసలోనే చోటు దక్కేదని కాంగ్రెస్ పార్టీ గుర్తు చేస్తోంది. ప్రతిపక్ష నేతకు క్యాబినెట్ మంత్రి హోదా ఉంటుందని.. వారిని వెనుక వరుసలో కూర్చోబెట్టడం రాజ్యాంగబద్ధమైన పదవులను అవమానించడమేనని పార్టీ ఎంపీ మాణిక్కం ఠాగూర్ విమర్శించారు.

భారత రాష్ట్రపతి సచివాలయం జారీ చేసే టేబుల్ ఆఫ్ ప్రిసిడెన్స్ ప్రకారం సీటింగ్ ఏర్పాట్లు జరుగుతాయి. లోక్‌సభ, రాజ్యసభ ప్రతిపక్ష నాయకులు ప్రోటోకాల్ క్రమంలో 7వ స్థానంలో ఉంటారు. వీరితో పాటు కేంద్ర కేబినెట్ మంత్రులు, మాజీ ప్రధానమంత్రులు, రాష్ట్రాల ముఖ్యమంత్రులు కూడా ఇదే వరుసలో ఉంటారు.

కేంద్ర ప్రభుత్వ వివరణ

సాధారణంగా మొదటి వరుసలో రాష్ట్రపతి, ప్రధానమంత్రి, విదేశీ అతిథులు, సుప్రీంకోర్టు ప్రధాన న్యాయమూర్తి వంటి అత్యున్నత పదవుల్లో ఉన్నవారు ఉంటారు. ర్యాంక్ 7లో ఉన్న వారికి సీటింగ్ లభ్యతను బట్టి వరుసలు కేటాయిస్తారు.

బీజేపీ కౌంటర్

రాహుల్ గాంధీ సీటు గురించి కాకుండా గణతంత్ర్య పరేడ్ జరుగుతున్నప్పుడు ఫోన్ చూస్తూ గడపడంపై దృష్టి పెట్టాలని బీజేపీ ప్రతినిధులు తీవ్రంగా విమర్శించారు.

ఈ ఏడాది వేడుకల ప్రత్యేకత

ఈసారి 77వ గణతంత్ర వేడుకలకు యూరోపియన్ యూనియన్ అగ్రనేతలు ఆంటోనియో కోస్టా (యూరోపియన్ కౌన్సిల్ ప్రెసిడెంట్), ఉర్సులా వాన్ డెర్ లేయన్ (యూరోపియన్ కమిషన్ ప్రెసిడెంట్) ముఖ్య అతిథులుగా హాజరయ్యారు. ఇద్దరు అంతర్జాతీయ స్థాయి అగ్రనేతలు ఒకేసారి ముఖ్య అతిథులుగా రావడం ఇదే మొదటిసారి కావడం గమనార్హం.