రాజకీయాల్లోకి రావడం లేదు.. సూపర్స్టార్
cinema | Suryaa Desk | Published : Mon, Feb 04, 2019, 06:18 PM
తాను రాజకీయాల్లోకి రానున్నట్లు వస్తున్న వార్తలను ఖండించాడు మళయాల సూపర్స్టార్ మోహన్లాల్. తనకు రాజకీయాలంటే అసలు పడదని అతడు తేల్చి చెప్పాడు. ఎన్నికల్లో పోటీ చేసే ఉద్దేశంగానీ, అసలు రాజకీయాల్లోకి వచ్చే ఉద్దేశంగానీ లేదని స్పష్టం చేశాడు. రాజకీయాలు నాకు సరిపడవు. నేను ఎప్పటికీ ఓ నటుడిగానే ఉండాలని అనుకుంటున్నా. ఈ వృత్తిలో ఉన్న స్వేచ్ఛను నేను ఆస్వాదిస్తున్నాను. రాజకీయాల్లో మనపై ఎంతో మంది ఆధారపడతారు. అది అంత సులువు కాదు. అంతేకాదు ఈ రాజకీయాల గురించి నాకు ఎక్కువగా తెలియదు. అసలు నాకు ఆ ఉద్దేశమే లేదు అని మోహన్లాల్ చెప్పాడు. ఈ సూపర్స్టార్ని తిరువనంతపురం స్థానం నుంచి బరిలోకి దింపాలని భావిస్తున్నట్లు ఈ మధ్య బీజేపీ నేత రాజగోపాల చెప్పిన విషయం తెలిసిందే. దీంతో మోహన్లాల్ బీజేపీలో చేరబోతున్నాడన్న ప్రచారం జరిగింది. మొన్న కేంద్ర ప్రభుత్వం కూడా అతనికి పద్మ భూషణ్ అవార్డుతో సత్కరించింది. మరోవైపు రాజకీయాల్లోకి రాకూడదనన్న మోహన్లాల్ నిర్ణయాన్ని సమర్థించాడు డైరెక్టర్ మేజర్ రవి. ఇవి కేవలం పుకార్లే. ఇది విని మోహన్లాల్ గట్టిగా నవ్వాడు. అతడు ఎప్పటికీ రాజకీయాల్లోకి రాడు. అతనికి నటనే సూటవుతుంది అని రవి అన్నాడు. గతేడాది మోహన్లాల్ ప్రధాని మోదీని కలిశాడు. ఆ తర్వాత మోదీపై ప్రశంసలు కురిపించాడు. దీంతో అప్పుడే అతడు బీజేపీలో చేరబోతున్నాడన్న పుకార్లు వచ్చాయి.
|
|