స్కంద ప్రేక్షకులని అలరించిందా..?

బోయపాటి శ్రీను సినిమా అనగానే అందరికీ ఒకవిధమైన ఆలోచన ఉంటుంది, ఎందుకంటే అతని సినిమాలు ఎక్కువగా యాక్షన్ డ్రామాలుగా తెరకెక్కుతాయి. ఇంతకు ముందు 'అఖండ' సినిమాతో పెద్ద విజయం సాధించి, ఇప్పుడు రామ్ పోతినేనితో చేతులు కలిపి 'స్కంద' సినిమాతో ప్రేక్షకుల ముందుకు వచ్చాడు బోయపాటి. ఇందులో శ్రీలీల, సయీ మంజ్రేకర్ ఇద్దరి కథానాయికలు వున్నారు, థమన్ సంగీతం అందించాడు. ఈ సినిమా ఎలా వుందో చూద్దాం. ఆంధ్ర ప్రదేశ్ ముఖ్యమంత్రి (అజయ్ పుర్కర్) తన కూతురు వివాహం ఏర్పాట్లు ఘనంగా నిర్వహిస్తాడు, దేశంలో వున్న చాలామంది రాజకీయనాయకులు, గవర్నర్, ఇతర సెలబ్రిటీస్ హాజరువుతూ వుంటారు. పెళ్లి ముహూర్తం ఇంకా కొంచెం సమయం వుంది అనగా తెలంగాణ ముఖ్యమంత్రి (శరత్ లోహితాశ్వ) కుమారుడు, పెళ్లికూతురిని తీసుకొని వెళ్ళిపోతాడు. పెళ్లి ఆగిన విషయం బయటకి తెలిస్తే,అవమానంలా భావించిన ఆంధ్ర ముఖ్యమంత్రి తన మేనమామని చంపేసి, గుండెపోటుతో మరణించాడు అందుకని పెళ్లి ఆగిపోయింది, అందరూ వెళ్లిపోవాల్సిందిగా చెప్తాడు. అప్పటి నుండి ఇద్దరి ముఖ్యమంత్రుల మధ్య శత్రుత్వం ఏర్పడుతుంది. తెలంగాణ ముఖ్యమంత్రి తన కుమారుడి నిశ్చితార్ధం చాలా ఘనంగా ఏర్పాట్లు చేస్తాడు. అది చూసిన ఆంధ్ర ముఖ్యమంత్రి తన కూతురిని మళ్ళీ తన ఇంటికి తీసుకు రావాలని ఒక కుర్రాడుని (రామ్ పోతినేని) నియమిస్తాడు. ఆ కుర్రాడు ఆ నిశ్చితార్ధం ఫంక్షన్ కి వెళ్లి ఇద్దరి ముఖ్యమంత్రుల కుమార్తెలను తాను తీసుకుపోతున్నాను అని ఇద్దరినీ తనతో పాటు రుద్రరాజపురం అనే వూరికి తీసుకుపోతాడు. ఇంతకీ రామ్ ఎవరు? అతను ఎందుకు ఆ ఇద్దరినీ తీసుకుపోయాడు? ఇద్దరు ముఖ్యుమంత్రులకి, రామ్ కి వున్న సంబంధం ఏంటి? జైలు లో వున్న రామకృష్ణ రాజు (శ్రీకాంత్) కి ఉరిశిక్ష ఎందుకు పడింది? అతనికి ఈ మొత్తం కథకి ఎటువంటి సంబంధం వుంది అన్నదే మిగతా కథ.