"సైరా" విడుదల తేదీ చెప్పిన మెగాస్టార్...

మెగాస్టార్‌ చిరంజీవి కథానాయకుడిగా సురేందర్‌ రెడ్డి దర్శకత్వంలో రూపొందుతున్న చిత్రం ‘సైరా నరసింహారెడ్డి’.  ఈ చిత్రాన్ని రామ్‌చరణ్‌ నిర్మిస్తున్న సంగతి తెలిసిందే. అయితే ఈ సినిమాను అక్టోబర్ 2న గాంధీ జయంతి కానుకగా రిలీజవుతుందని ప్రకటించిన సంగతి తెలిసిందే. ఆగస్టు నుంచి అక్టోబర్ కి వాయిదా వేసింది కొణిదెల టీమ్. అయితే అప్పుడు కూడా ఈ సినిమా వస్తుందా?  మరోసారి వాయిదా పడింది అంటూ ప్రచారం సాగుతోంది. అక్టోబర్ లో రాదు.. 2020 సంక్రాంతికే రిలీజ్ కానుందని తెలుగు మీడియాలో కథనాలు వెలువడ్దాయి.  అయితే ఇది నిజమా? అంటే కాదని మెగాస్టార్ చిరంజీవి చెప్పారు. 

హెల్త్ అండ్ ఫిట్ నెస్ మ్యాగజైన్ `బీపాజిటివ్` ఎడిటర్ కం మేనేజింగ్ డైరెక్టర్.. మెగా కోడలు ఉపాసన తన మామ(చిరంజీవి) గారిని ఇంటర్వ్యూ చేశారు. ఈ ఇంటర్వ్యూలో ఆయన నటించిన తాజా చిత్రం `సైరా: నరసింహారెడ్డి` గురించి ఎన్నో ఆసక్తికర సంగతుల్ని ముచ్చటించారు.

సైరా తన కెరీర్ లో ఎంతో ప్రతిష్ఠాత్మక చిత్రమని చిరంజీవి తెలిపారు. ఓ మహోన్నతమైన సినిమాలో నటించినప్పుడు ఏ నటుడికైనా చాలా ఆనందంగా ఉంటుంది. సంతృప్తి కలుగుతుంది. ఈ సినిమా చూశాక యువతరం దేశభక్తి పట్ల దృష్టి ఆకర్షితులవుతారు. స్వేచ్ఛను గౌరవించుకోవాలన్న ఆలోచన యువతరంలో కలిగితే చాలు సైరా విజయం సాధించినట్టేనని చిరు అన్నారు. ఈ సినిమా కచ్చితంగా తరాల మధ్య వారధిలా వారి అంతరాన్ని తగ్గిస్తుందని..ఆ తరం చేసిన అన్ని త్యాగాలను తిరిగి పరిచయం చేసుకోవడం చాలా ముఖ్యమని వ్యాఖ్యానించారు. అక్టోబర్ 2వ తేదీన మహాత్మా గాంధీ 150వ జన్మదినోత్సవం కానుకగా రిలీజ్ చేయడం ఆనందాన్నిస్తోందని అన్నారు. దీనిని బట్టి సైరా-నరసింహారెడ్డి వాయిదా  పడలేదని అర్థమవుతోంది. చెప్పిన టైమ్ కే కొణిదెల ప్రొడక్షన్స్ కంపెనీ ఈ చిత్రాన్ని రిలీజ్ చేస్తోంది.