నాగార్జునసాగర్: తాగునీటి ట్యాంకులో పడి 30 కోతులు మృతి.. వణికిపోతున్న గ్రామస్థులు

గ్రామాల్లో కోతులు బీభత్సం సృష్టిస్తున్నాయి. ఇళ్లల్లోకి చొరబడి ఏది దొరికితే అది ఎత్తుకెళ్లిపోతున్నాయి. ఆకలి కేకలతో కనిపించినవారిని కరుస్తూ గ్రామాల్లో నానా హంగామా చేస్తున్నాయి. ఈ నేపథ్యంలోనే తాజాగా ఓ సంచలన ఘటన చోటు చేసుకుంది. ఎండలు మండిపోతుండటంతో దాహం తీర్చుకునేందుకు నీళ్ల ట్యాంకులోకి దిగిన కోతులు.. తిరిగి పైకి ఎక్కలేక అందులోనే పడి 30 కోతులు చనిపోయాయి. అయితే ఆ ట్యాంకు నుంచే గ్రామంలోని మొత్తం 200 ఇళ్లకు తాగునీరు అందుతుండటంతో గ్రామస్థులు తీవ్ర భయాందోళనలు వ్యక్తం చేస్తున్నారు. ఈ సంఘటన నల్గొండ జిల్లాలో జరిగింది. నాగార్జున సాగర్‌లోని హిల్ కాలనీ గ్రామంలో ఈ అనూహ్య సంఘటన చోటు చేసుకుంది.

హిల్‌ కాలనీలోని విజయవిహార్ సమీపంలో ఉన్న ఓ భారీ నీటి ట్యాంకులో పడి ఆ కోతులు మరణించాయి. అయితే అక్కడ ఉన్న 200 ఇళ్లకు తాగునీటిని సరఫరా చేసేందుకు అధికారులు ఆ ట్యాంకును నిర్మించారు. కానీ ఆ ట్యాంకు పైభాగాన్ని మూసివేయకుండా కేవలం రేకులతో కప్పి ఉంచారు. ప్రస్తుతం రాష్ట్రంలో ఎండలు మండిపోతుండటంతో ఎండ తీవ్రతకు తట్టుకోలేక దాహం తీర్చుకునేందుకు ఆ ట్యాంకు వద్దకు కోతులు వెళ్లాయి. ట్యాంకులోని నీళ్లు తాగేందుకు ప్రయత్నించి ఆ రేకులను పక్కకు జరిపి మరీ 30 కోతులు అందులోకి దిగాయి. నీరు తాగిన తర్వాత ఆ కోతులు బయటికి వచ్చేందుకు మార్గం కనిపించలేదు. తీవ్రంగా ప్రయత్నించినప్పటికీ.. పైకి రాలేక అందులోనే మునిగిపోయి మృత్యువాత పడ్డాయి.

అయితే ఈ విషయాన్ని అధికారులు బుధవారం గుర్తించారు. వెంటనే ఆ ట్యాంకు పైన ఉన్న రేకులను తొలగించి చూడగా.. అందులోని నీటిలో కోతులు చనిపోయి ఉన్నాయి. దీంతో ఆ ట్యాంకు నుంచి 30 కోతుల మృతదేహాలను బయటికి తీశారు. ఇక కోతులు నీళ్ల ట్యాంకులోపడి చనిపోయిన ఘటన తెలిసి ఆ గ్రామస్థులు భయపడుతున్నారు. ఆ కోతులు చనిపోయి దాదాపు 10 రోజులు దాటి ఉంటుందని.. అప్పటి నుంచి తాము అవే నీటినే తాగుతున్నామని పేర్కొన్నారు. అయితే కోతులు చనిపోయి ఉన్న నీటిని తాగితే తమకు ఏమైనా అవుతుందేమోనని ఆ గ్రామస్థులు తీవ్రంగా వణికిపోతున్నారు. ఏవైనా అనారోగ్య సమస్యలు వస్తాయేమో అని భయపడిపోతున్నారు. నీళ్ల ట్యాంకులను ప్రతి 6 నెలలకు ఒకసారి శుభ్రం చేయాలని.. కానీ అధికారులు మాత్రం ఆ ట్యాంకును ఏ రోజు కూడా శుభ్రం చేయలేదని గ్రామస్థులు తీవ్రంగా ఆరోపిస్తున్నారు. ఈ ఘఠనలో నిర్లక్ష్యం వహించిన అధికారులపై కఠిన చర్యలు తీసుకోవాలని డిమాండ్‌ చేస్తున్నారు.