అతి తక్కువ ధరలో యాదాద్రి ట్రిప్.. కొలనుపాక కూడా వెళ్లొచ్చు, వివరాలివే.

తెలంగాణ తిరుపతిగా పేరుగాంచిన సుప్రసిద్ధ పుణ్యక్షేత్రం యాదాద్రికి భక్తుల సంఖ్య రోజురోజుకి పెరిగిపోతుంది. ఆలయ పునర్నిర్మాణం తర్వాత రోజూ వేల సంఖ్యలో భక్తులు యాదాద్రి లక్ష్మీనర్సింహ్మా స్వామిని దర్శించుకుంటున్నారు. ఈ నేపథ్యంలో తెలంగాణ టూరిజం డిపార్ట్‌మెంట్ భక్తులకు గుడ్‌న్యూస్ చెప్పింది. యాదాద్రితో పాటు మరికొన్ని ఆలయాలను చూసేందుకు ప్యాకేజీని ప్రకటించింది. అతి తక్కువ ధరలోనే ప్రతి శనివారం ఈ ప్యాకేజీ అందుబాటులో ఉంటుంది. బస్సు జర్నీ ద్వారా ఈ ప్యాకేజీనిని అందిస్తున్నారు.

అయితే హైదరాబాద్ నుంచి వెళ్లే భక్తులకు మాత్రమే ఈ ప్యాకేజీని ఆఫర్ చేస్తున్నారు. ప్రతి శనివారం ఈ ప్యాకేజీ అందుబాటులో ఉంటుంది. ఏసీ మినీ కోచ్‌లో జర్నీ ఉంటుంది. టికెట్ ధరలు పెద్దలకు అయితే రూ. 1499, పిల్లలకు రూ.1199గా నిర్ణయించారు. కేవలం ఒకే ఒక్క రోజులో ఈ ప్యాకేజీ ద్వారా దర్శనం చేసుకొని ఇంటికి చేరుకోవచ్చు. ఉదయం 9 గంటలకు హైదరాబాద్‌లోని బషీర్ బాగ్ నుంచి బస్సు ప్రారంభం అవుతుంది. 10:30 గంటలకు కొలనుపాకకు చేరుకుంటారు. అక్కడ పురాతన జైన్ ఆలయాన్ని దర్శించుకునే అవకాశం కల్పించారు.

11:30 గంటలకు కొలనుపాక నుంచి బయల్దేరుతారు. 12:30 గంటలకు యాదగిరిగుట్టలోని ఆలయాన్ని సందర్శిస్తారు. దర్శనం తర్వాత 1:30 PM to 2:00 PM మధ్య హరిత హోటల్‌లో భోజనం అందిస్తారు. అయితే భోజనాలు ఖర్చు సొంతంగా భరించాల్సి ఉంటుంది. సాయంత్రం 4:30 గంటలకు సమీపంలోని సురేంద్రపురికి తీసుకెళ్తారు. ఇక్కడ ప్రముఖ ఆలయాల సెట్టింగులను చూడొచ్చు. అనంతరం అక్కడి నుంచి బయల్దేరి రాత్రి 9:30 గంటలకు హైదరాబాద్‌కు చేరుకుంటారు. https://tourism.telangana.gov.in/ వెబ్ సైట్‌లోకి వెళ్లి బుకింగ్‌తో పాటు పూర్తి వివరాలను తెలుకోవచ్చునని టూరిజం అధికారులు తెలిపారు.