డ్యూటీ చేస్తున్నారా.. టైంపాస్ చేస్తున్నారా.. పోలింగ్ సిబ్బందితో ధర్మపురి అర్వింద్ వాగ్వాదం

తెలంగాణలో లోక్ సభ ఎన్నికల్లో కీలక ఘట్టమైన పోలింగ్ ప్రక్రియ కొనసాగుతోంది. రాష్ట్రవ్యాప్తంగా ఉదయం 7 గంటల నుంచే ఓటర్లు తమ ఓటు హక్కును వినియోగించుకుంటున్నారు. 17 లోక్ సభ సెగ్మెంట్లలోని పోలింగ్ బూతుల ముందు ఓటర్లు క్యూలైన్లలో బారులు తీరారు. అయితే.. ఎండ ముదరక ముందే ఓటేసి వెళ్లిపోవాలని పోలింగ్ క్రేందాలకు పెద్దఎత్తున ప్రజలు చేరుకోవటంతో.. క్యూలైన్లలో వేచి చూస్తున్నారు. అన్ని చోట్లలో పోలింగ్ ప్రక్రియ ప్రశాంతంగా సాగుతున్న వేళ.. కొన్ని చోట్లలో చెదురుముదురు ఘటనలు చోటుచేసుకుంటున్నారు. అందులోనూ.. బీజేపీ అభ్యర్థులు పోలింగ్ సిబ్బందిని నిలదీస్తుండటం ఇప్పుడు సర్వత్రా చర్చనీయాంశంగా మారింది.

నిజామాబాద్‌లోని ఓ పోలింగ్ కేంద్రానికి వెళ్లిన బీజేపీ ఎంపీ అభ్యర్థి ధర్మపురి అర్వింద్.. అక్కడ పోలింగ్ జరుగుతున్న సరళిని పర్యవేక్షించారు. ఈ క్రమంలోనే.. పోలింగ్ బూతులో పలువురు ముస్లిం మహిళలు ఓట్లు వేస్తుండగా.. అక్కడి వెళ్లి సిబ్బందితో వాగ్వాదానికి దిగారు. ఓటేసేందుకు వచ్చిన ముస్లిం మహిళల ముఖాలు, ఆధార్ కార్డులను సరిపోల్చకుండానే ఓటింగ్‌కు ఎలా అనుమతిస్తున్నారని ప్రశ్నించారు. డ్యూటీ చేస్తున్నారా.. టైంపాస్ చేస్తున్నారా అంటూ నిలదీశారు. వాళ్లు ప్లాబ్రం చేస్తున్నారని ఓటేయటానికి అనుమతిస్తారా అని ప్రశ్నించారు. అసలు వచ్చిన వ్యక్తి ఓటరా కాదా ఎలా తెలుస్తుందంటూ నిలదీశారు. ఇందుకు సంబంధించిన వీడియో సోషల్ మీడియాలో వైరల్ అవుతోంది.

హైదరాబాద్ బీజేపీ ఎంపీ అభ్యర్థి మాధవీ లత.. పోలింగ్ కేంద్రాలను పరిశీలిస్తున్న క్రమంలో అక్కడున్న ముస్లిం మహిళలను బుర్ఖాలు తీసి ముఖాలు చూపించాలని.. ఆధార్ కార్డులు పరిశీలిస్తూ ఆరా తీశారు. మాధవీ లత తీరుపై ఎంఐఎం నాయకులు తీవ్ర అభ్యంతరం వ్యక్తం చేస్తున్న. నేపథ్యంలోనే.. నిజామాబాద్ ఎంపీ అభ్యర్థి ధర్మపురి అర్వింద్ కూడా పోలింగ్ సింబ్బందితో వాగ్వాదానికి దిగటం చర్చనీయాంశంగా మారింది.