ఇలాంటి కన్నింగ్ కోడళ్లు కూడా ఉంటారా.. సీరియల్లో కంటే దారుణంగా ఉందిగా

టీవీల్లో ప్రసారమయ్యే సీరియళ్లలో దాదాపుగా అత్తా కోడళ్ల మధ్య జరిగే పంచాయితీలో, లేదా భార్యాభర్తల మధ్య మరో మహిళ రావటం వల్ల జరిగే గొడవల చుట్టూనే తిరుగుతుంటాయి. అయితే.. అందులో ఎక్కువగా అత్తాకోడళ్ల పంచాయితీలు చూసేందుకే జనాలు ఎక్కువగా ఇంట్రెస్ట్ చూపిస్తుంటారు. అందులో అత్తకు తెలియకుండా కోడలు, కోడలికి తెలియకుండా అత్త వేసే కన్నింగ్ ప్లాన్లు.. చివరకు అత్త గెలుస్తుందా, కోడలే పైచేయి సాధిస్తుందా అన్న ఉత్కంఠతోనే.. సీరియళ్లు ఏళ్లకు ఏళ్లు నడుస్తుంటాయి. అయితే.. ఇలాంటివి కేవలం సీరియళ్లలోనే కాదు.. రియల్ లైఫ్‌లోనూ జరుగుతుంటాయి. అందుకు నిదర్శనమే హైదరాబాద్ బేగంబజార్‌లో జరిగిన ఓ దారుణమైన ఘటన. ఇది సీరియల్‌లో వచ్చే సీన్‌లా కాదు.. అంతకుమించి అన్నట్టుగా ఉంది ఆ కన్నింగ్ కోడలి ప్లానింగ్.

అత్త ఉంటే ఆమెకు సేవలు చేయాలి.. దాని వల్ల శ్రమ తప్ప వచ్చేది ఏమీ ఉండదనుకుంది ఓ కోడలు. అదే ఆ అత్త చనిపోతే.. ఆమెకు పనులు చేసిపెట్టాలని అవసరం లేదు.. పైగా ఆమె పేరు మీద కోట్ల రూపాయల ఇన్సూరెన్స్ డబ్బులు కూడా వస్తాయన్న కన్నింగ్ ఆలోచన ఆ కోడలి మెదడులో మెదిలింది. మరి సినిమాల ఎఫెక్టో, సీరియళ్ల ప్రభావమో కానీ.. డబ్బుల కోసం ఆ కోడలు తన అత్తామామలను చంపేందుకు నిర్ణయించుకుంది. అందుకోసం తన బంధువుల సాయం కూడా తీసుకుంది.

తన ప్లాన్ ప్రకారం.. కొందరు బంధువులకు ముందే ప్లాన్ అంతా చెప్పి పురమాయించింది. దీంతో.. కొంత మంది దుండగు.. కట్టేల మండీ సమీపంలోని తన ఇంట్లో చొరబడి.. విచక్షణారహితంగా దాడి చేశారు. అందరు చూస్తుండగానే.. కత్తులు, కర్రలతో అత్తతో పాటు భర్తపై కూడా దాడి చేశారు. దాడి జరిగే సమయంలో.. డయల్ 100కు ఫోన్ చేయగా స్పందించలేదని బాధితులు ఆరోపిస్తున్నారు. వాళ్ల అరుపులు కేకలు విని.. ఇరుగుపొరుగు వాళ్లు రావటంతో.. నిందితులు పారిపోయారు. దాడికి సంబంధించిన దృశ్యాలు అక్కడే ఉన్న సీసీటీవీ కెమెరాల్లో రికార్డ్ అయ్యాయి. దాడిలో తీవ్రంగా గాయపడిన తల్లీకొడుకులకు స్థానికులు ఓ ప్రైవేట్ ఆస్పత్రికి తరలించి.. చికిత్స అందిస్తున్నారు. తమకు న్యాయం చేయాలంటూ పోలీసులను బాధితులు వేడుకుంటున్నారు. తమకు ప్రాణహాని ఉందని.. తన కోడలి నుంచి రక్షణ కల్పించాలంటూ ఆ అత్త.. బోరున విలపించింది.