బీఆర్ఎస్ పార్టీ ఉండదనటం కరెక్ట్ కాదు.. విజయశాంతి పోస్టు మతలబేంటీ

తెలంగాణలో రాజకీయాలు రోజు రోజుకు ఆసక్తికరంగా మారుతున్నాయి. ఇన్ని రోజులు లోక్ సభ ఎన్నికల నేపథ్యంలో చాలా మంది కీలక నేతలు కండువాలు మార్చారు. ఇంకా కొందరు ఇప్పటికీ మార్చేందుకు చూస్తున్నారు నేతలే చెప్తున్నారు. మరి ఇలాంటి నేపథ్యంలో.. కాంగ్రెస్ మహిళా నేత విజయశాంతి అలియాస్ రాములమ్మ కీలక వ్యాఖ్యలు చేశారు. ఇన్ని రోజులు సైలెంట్‌గా ఉన్న రాములమ్మ.. ఉన్నట్టుండి సోషల్ మీడియాలో ఓ పోస్ట్ చేయగా.. ఇప్పుడు అదే ఆసక్తికర చర్చకు కారణమైంది. ఇంతకీ రాములమ్మ చేసి పోస్టేంటీ..

తెలంగాణలో బీఆర్ఎస్ పార్టీ ఉండదంటూ బీజేపీ రాష్ట్ర అధ్యక్షుడు కిషన్ రెడ్డి చేసిన వ్యాఖ్యలపై విజయశాంతి స్పందించారు. అలా అనటం సమంజసం కాదంటూ.. సోషల్ మీడియా వేదికగా కిషన్ రెడ్డికి రాములమ్మ కౌంటర్ ఇచ్చారు. "తెలంగాణల బీఆర్ఎస్ అనే పార్టీ ఇక ఉండదు అని అంటున్న బీజేపీ రాష్ట్ర అధ్యక్షులు కిషన్ రెడ్డి గారి అభిప్రాయం సమంజసం కాదు. ప్రాంతీయ భావోద్వేగాలు ప్రజా మనోభావాలను వారి ఆత్మాభిమానం వైపు నడిపిస్తూనే వస్తుండడం దక్షిణాది రాష్ట్రాల సహజ విధానం... ఎప్పటికీ.

 ఇది అర్థం చేసుకోకుండా వ్యవహరించే వారికి.. దక్షిణాది.. దశాబ్ధాలుగా కరుణానిధి, ఎంజీఆర్, ఎన్టీఆర్, రామకృష్ణ హెగ్డే, జయలలిత గార్ల నుంచి ఇప్పటి బీఆర్ఎస్, వైసీపీ దాకా ఇస్తున్న రాజకీయ సమాధానం విశ్లేషించుకోవాల్సిన తప్పని అవసరం. ఎన్నడైనా ఇదే వాస్తవం. ఈ దక్షిణాది స్వీయ గౌరవ అస్థిత్వ సత్యం కాంగ్రెస్ అర్థం చేసుకున్నట్లు, బీజేపీ కనీసం ఆలోచన చెయ్యని అంశం బహుశా కిషన్ రెడ్డి గారి ప్రకటన భావం." అంటూ తనదైన శైలిలో పోస్ట్ చేశారు.

ఇది.. బీజేపీ పార్టీకి, కిషన్ రెడ్డికి కౌంటర్‌గా చేసిన పోస్ట్ అయినప్పటికీ బీఆర్ఎస్‌కు మద్దతుగా ఉండటంతో.. రాజకీయ వర్గాల్లో ఇది సర్వత్రా చర్చనీయాంశంగా మారింది. ఇదే మాటను.. కాంగ్రెస్ నాయకులు కూడా చాలా సార్లు అన్నట్టుగా నెటిజన్లు గుర్తు చేస్తున్నారు. అయితే.. దక్షిణాది రాష్ట్రాల మీద ఉన్న ప్రేమతోనే కౌంటర్ ఇచ్చారా..? లేక కాంగ్రెస్ పార్టీలో గుర్తింపు లభించట్లేదని.. మళ్లీ కారువైపు అడుగులు వేసే ప్రయత్నంలో భాగంగా ఇలాంటి వ్యాఖ్యలు చేస్తున్నారా..? అనేది ఆసక్తికర చర్చకు తెరలేచింది.

మరోవైపు.. విజయశాంతి చేసిన పోస్ట్ మీద కొందరు నెటిజన్లు ట్రోల్స్ కూడా చేస్తున్నారు. "అసలు.. నువ్వు ఏ పార్టీలో ఉన్నావో నీకైనా తెలుసా?" అని.. "మూలాలు గుర్తుకు వచ్చి మళ్లీ బీఆర్ఎస్ అలియాస్ టీఆర్ఎస్‌కు పోతున్నావా.. సూచనలు అలాగే ఉన్నాయి.." అంటూ కామెంట్లు చేస్తుండగా.. "నువ్వు కూడా చిరంజీవిలా సైడ్ అయిపోతే బాగుంటుంది అక్క.." అని మరికొంత మంది తమ అభిప్రాయాలు చెప్తున్నారు.