రెడ్ బుక్లో అందరి పేర్లు రాస్తున్నాం.. అధికారంలోకి వచ్చాక అంతు చూస్తాం: పాడి కౌశిక్ రెడ్డి
Telangana Telugu | Suryaa Desk | Published : Tue, Jun 11, 2024, 07:28 PM
రెడ్ బుక్లో అందరి పేర్లు రాస్తున్నామని.. బీఆర్ఎస్ అధికారంలోకి వచ్చాక వాళ్లందరి అంతు చూస్తామని హుజూరాబాద్ ఎమ్మెల్యే పాడి కౌశిక్ రెడ్డి సంచలన వ్యాఖ్యలు చేశారు. తెలంగాణ భవన్లో మీడియాతో మాట్లాడిన పాడి కౌశిక్ రెడ్డి కీల ఆరోపణలు చేశారు. రామగుండం ఫ్లై యాష్ తరలింపులో రవాణా శాఖ మంత్రి పొన్నం ప్రభాకర్ భారీగా అక్రమాలకు పాల్పడ్డారని కౌశిక్ రెడ్డి ఆరోపించారు. బూడిద తరలింపులో మంత్రి అదనంగా రోజుకు రూ.50 లక్షలు అక్రమంగా సంపాదిస్తున్నారంటూ చెప్పుకొచ్చారు. ఓవర్ లోడ్తో వెళ్తున్న 13 లారీలను తానే స్వయంగా పట్టుకున్నట్లు పేర్కొన్నారు.
అయితే.. రవాణా శాఖ అధికారులు మాత్రం 2 లారీలను మాత్రమే సీజ్ చేసి చేతులు దులుపుకున్నారని కౌశిక్ రెడ్డి మండిపడ్డారు. ఇంత జరుగుతున్నా ఎన్టీపీసీ అధికారులు ఎలాంటి చర్యలు తీసుకోకుండా.. ఎందుకు చోద్యం చూస్తున్నారని ప్రశ్నించారు. అవినీతికి పాల్పడే అందరి పేరు రెడ్ బుక్లో రాస్తున్నామని.. తాను అధికారంలోకి వచ్చిన తర్వాత అందరి బండారం బయటపెడుతామన్నారు. అప్పుడు అందరూ పరేషాన్లో పడతారని హెచ్చరించారు. ఇది బెదిరింపు కాదని.. బాధ్యత గుర్తుచేస్తున్నామని స్పష్టం చేశారు.
ఫ్లై యాష్ వల్ల బండి స్కిడ్ అయ్యి తన దగ్గరి మిత్రుడు అఖిల్ అనే వ్యక్తి మరణించాడని కౌశిక్ రెడ్డి తెలిపారు. పేదోళ్ల శవాల మీద పైసల్ ఏరుకుంటున్న పొన్నం ప్రభాకర్కి అఖిల్ శాపం, పాపం ఖచ్చితంగా తగులుతుందని హెచ్చరించారు. అక్రమార్కులపై ఇప్పటికైనా అధికారులు చర్యలు తీసుకోవాలని కౌశిక్ రెడ్డి డిమాండ్ చేశారు.
|
|