హైద‌రాబాద్‌లో ధార్ గ్యాంగ్.. ఉదయం రెక్కీ, రాత్రి చోరీలు.. వీడియో

గతంలో హైదరాబాద్‌ను వణికించిన చెడ్డీ గ్యాంగ్ తరహాలోనే ప్రస్తుతం ధార్ గ్యాంగ్.. నగరంలో తీవ్ర భయాందోళనలు రేపుతోంది. ఉదయం పూట ఆటోల్లో తిరుగుతూ రెక్కీ చేసి.. రాత్రిపూట మెల్లగా ఆ ఇళ్లను దోచుకుంటున్నారు. అడ్డుకున్న వారిపై దాడులు చేసి.. హతమార్చేందుకు కూడా వెనుకాడటం లేదు. తాజాగా ఈ ధార్ గ్యాంగ్.. ఇళ్లల్లోకి చొరబడిన దృశ్యాలు రికార్డ్ అయిన సీసీటీవీ ఫుటేజీలను పోలీసులు రిలీజ్ చేశారు. నగరవాసులు ఇలాంటి ఘటనల పట్ల అప్రమత్తంగా ఉండాలని హితవు పలికారు.

ఇక నగరంలోని హ‌యత్ నగర్, అమీన్‌పూర్, వనస్థలిపురం ప్రాంతాల్లో ఉత్తర‌ప్రదేశ్‌, మ‌ధ్యప్రదేశ్‌కు చెందిన ధార్ గ్యాంగ్ స‌భ్యులు తిరుగుతూ స్థానికుల‌ను తీవ్ర భ‌య‌భ్రాంతుల‌కు గురి చేస్తున్నారు. ఉద‌యం వేళల్లో ఆటోల్లో తిరుగుతూ రెక్కీ నిర్వహిస్తున్నారు. ఇక అర్ధరాత్రి కాగానే రెక్కీ నిర్వహించిన ఇళ్లలోకి చొరబడి దొంగతనాలకు పాల్పడుతున్నారు. అడ్డువచ్చిన కుటుంబ స‌భ్యులపై దాడుల‌ు చేస్తున్నారు. ఆపై ఇళ్లల్లో ఉన్న బంగారం, డబ్బు, ఇతర విలువైన ఆభరణాలు ఎత్తుకెళ్లిపోతున్నారు.

ఇక మరో ఘటనలో గురువారం రాత్రి ఉప్పల్ చిలకానగర్‌లో నివాసం ఉండే పిట్టల సుదర్శన్ (66) ఇంటి ముందు టూలెట్ బోర్డు చూసి ఇద్దరు యువతీయువకులు వచ్చారు. ఉత్తర్‌ప్రదేశ్‌కు చెందిన హిమాన్షి(23), గాంధీ(21) లు.. ఇల్లు అద్దెకు కావాలని సుదర్శన్‌ను అడిగారు. అయితే వేరే రాష్ట్రం వారు కావడంతో ఇల్లు ఇచ్చేందుకు సుదర్శన్ నిరాకరించడంతో.. బలవంతంగా ఇంట్లోకి చొరబడ్డారు. ఆ తర్వాత సుదర్శన్‌తోపాటు అతని భార్యపై దాడి చేసేందుకు ప్రయత్నించారు. వారి ముఖంపై పెప్పర్ స్ప్రే కొట్టేందుకు ప్రయత్నించగా.. వారు గట్టిగా అరిచారు. ఈ క్రమంలోనే ఆ ఇంట్లో శబ్దాలకు ఇరుగు పొరుగున ఉన్న వారు వచ్చి.. ఆ ఇద్దర్నీ పట్టుకుని పోలీసులకు అప్పగించారు.

అనంతరం సుదర్శన్ ఇచ్చిన ఫిర్యాదు ఆధారంగా కేసు నమోదు చేసుకున్న పోలీసులు.. ఈ ఘటనపై దర్యాప్తు చేస్తున్నారు. అద్దె కోసం వచ్చి.. ఓనర్‌పైనే దాడి చేసిన ఘటన స్థానికంగా తీవ్ర కలకలం రేపుతోంది. ఇక దొంగలు వచ్చి పోయే దృశ్యాలు సీసీటీవీలో రికార్డ్ కావడంతో పోలీసులు వాటిని విడుదల చేశారు. ఈ నేప‌థ్యంలోనే హైద‌రాబాద్ వాసులు అప్రమ‌త్తంగా ఉండాల‌ని పోలీసులు సూచిస్తున్నారు. ఇల్లు అద్దెకు కావాలంటూ వచ్చి.. యజమానులపై దాడి చేసి.. ఇంట్లోని విలువైన వస్తువులు ఎత్తుకెళ్లడం వీరి ప్లాన్. అయితే ఉదయం పూట వీధుల్లో తిరుగుతూ టూలెట్ బోర్డులు ఉన్న ఇళ్లపై ఓ కన్నేసి రాత్రి వేళ.. ఆ ఇంట్లోకి వెళ్లి దాడి చేస్తూ ఉంటారు.