ఐఐటీకి వెళ్లలేక మేకల కాపరిగా గిరిజన విద్యార్థి,,,రూ.లక్షన్నర సాయం చేసిన సీఎం రేవంత్ రెడ్డి

రాజన్న సిరిసిల్ల జిల్లాకు చెందిన ఓ గిరిజన యువతి ప్రతిష్టాత్మక ఐఐటీలో సీటు సాధించినా.. చదువును కొనసాగించే పరిస్థితి లేదు. ఇంట్లో ఆర్థిక పరిస్థితి బాగోలేకపోవటంతో మేకల కాపరిగా మారింది. రాజన్న సిరిసిల్ల జిల్లా వీర్నపల్లి మండలం గోనే నాయక్‌ తండాకు చెందిన బదావత్ రాములు-సరోజ దంపతులకు ముగ్గురు కుమార్తెలు. వీరిది రెక్కాడితే కానీ డొక్కాడని పేద కుటుంబం. అయినా రాములు తన ముగ్గురు కూతుళ్లకు చదువులు చెప్పించారు. పెద్ద కూతుర్లు ఇద్దరూ డిగ్రీ వరకు చదువుకొని తల్లిదండ్రులకు వ్యవసాయ పనుల్లో చేదోడు వాదోడుగా ఉంటున్నారు. మూడో కూతురు మధులత మెుదట్నుంచి చదువుల్లో చురుకు ఇటీవలే.. జేఈఈ మెయిన్‌లో విశేష ప్రతిభ కనబరిచింది. ఎస్టీ కేటగిరీలో 824వ ర్యాంక్ సాధించింది. మధులతకు పాట్నా ఐఐటీలో సీటు వచ్చింది. దీంతో తన కల సాకారం అవుతందని మధులత సంబర పడింది.

అయితే సరస్వతీ కటాక్షం ఉన్నా.. ఆమెకు లక్ష్మీ కటాక్షం లేకుండా పోయింది. ఎస్టీ విద్యార్థిగా ట్యూషన్ ఫీజు నుంచి మినహాయింపు ఉన్నప్పటికీ.. జూలై 27 నాటికి హాస్టల్ మరియు ఇతర ఖర్చుల కోసం రూ. 3 లక్షలను చెల్లించాల్సిన పరిస్థతి. అంత డబ్బు తన దగ్గర లేదని తండ్రి రాములు చేతులెత్తేశాడు. దానికి తోడు ఇటీవలె అతను అనారోగ్యం బారిన పడ్డాడు. దీంతో ఆ కుటుంబం మరింత కష్టాల్లో పడింది. దీంతో కుటుంబ పోషణ కోసం మధులత కూడా మేకల కాపరిగా మారింది.

మధులత పరిస్థితిపై ఆమె గురవు, గిరిజన సంక్షేమ జూనియర్ కాలేజీ అధ్యాపకుడు బుక్యా లింగం నాయక్ ఆవేదన వ్యక్తం చేశారు. చదువుల్లో రాణించినా.. డబ్బుల్లేక ఉన్నత విద్యను అభ్యసించలేకపోతుందని వాపోయారు. ఆర్థికంగా వెనుకబడిన పేద విద్యార్థులు ఎదుర్కొంటున్న అసమానతలకు ఆమె పరిస్థితి నిదర్శనమన్నారు. ప్రస్తుతం వారి పరిస్థితి దీనంగా ఉందని.. ఐఐటీ ఫీజు పక్కన పెడితే రాష్ట్రంలోని సాధారణ డిగ్రీ కళాశాలలో చదివించే స్థోమత కూడా ఇప్పుడా కుటుంబానికి లేదని అన్నారు. దాతలు ముందుకొచ్చి మధులతకు సాయం చేయాలని కోరారు.

సీఎం రేవంత్ సాయం.. గిరిజన విద్యార్థి మధులత కష్టాలపై తెలంగాణ ముఖ్యమంత్రి రేవంత్ రెడ్డి స్పందించారు. ఆమె చదువు కోసం 1.5 లక్షల ఆర్థిక సాయం అందించాలని అధికారులకు ఆదేశాలు జారీ చేశారు. ఈ మేరకు ప్రభుత్వం ఉత్తర్వులు జారీ చేసింది. బీఆర్ఎస్ వర్కింగ్ ప్రెసిడెంట్ కేటీఆర్ సైతం ఆమె దుస్థితిపై స్పందించారు. ఆమె చదువుకు సంబంధించిన ఖర్చులను తాను చూసుకుంటానని ట్విట్టర్ వేదికగా వెల్లడించారు. ప్రభుత్వం, కేటీఆర్ సాయం చేస్తామని ప్రకటించటం పట్ల మధులత ఆనందం వ్యక్తం చేస్తుంది. వారి సహకారంతో తన కల నెరవేరబోతుందని ఆనందభాష్పాలు రాల్చింది.