హరీష్ టార్గెట్‌గా ఫ్లెక్సీలు,,,,'రుణమాఫీ అయిపోయే.. నీ రాజీనామా ఏడబోయే

బీఆర్ఎస్ ఎమ్మెల్యే, మాజీ మంత్రి హరీష్ రావుకు వ్యతిరేకంగా హైదరాబాద్ నగరంలోని పలు ప్రాంతాల్లో ఫ్లెక్సీలు వెలిశాయి. రాత్రికి రాత్రే మల్కాజిగిరి మాజీ ఎమ్మెల్యే మైనంపల్లి హనుమంత రావు అభిమానుల పేరిట కొందరు ఈఫ్లెక్సీలు ఏర్పాటు చేశారు. హరీశ్ రావు రాజీనామాకు వారు డిమాండ్ చేశారు. 'దమ్ముంటే రాజీనామా చెయ్.. రుణమాఫీ అయిపోయే.. నీ రాజీనామా ఏడ బోయే.. అగ్గిపెట్ట హరీశ్ రావు' అని రాసి ఉన్న ఫ్లెక్సీలను సికింద్రాబాద్, ప్యాట్నీ, ప్యారడైజ్, రసూల్ పుర, బేగంపేట్, పంజాగుట్ట సహా పలు ప్రాంతాల్లో ఏర్పాటు చేశారు..

ప్రభుత్వం హామీ ఇచ్చిన విధంగా రూ.2 లక్షల రుణమాఫీ చేశామని, ఇచ్చిన హామీని మేం నిలబెట్టుకున్నందుకు.. హరీశ్ రావుకు సిగ్గుంటే రాజీనామా చేయాలని సీఎం రేవంత్ రెడ్డి సైతం ఖమ్మం పర్యటనలో సవాల్ చేశారు. సీఎం కామెంట్లు చేసిన తర్వాత రాత్రికి రాత్రే ఈ ఫ్లెక్సీలు వెలిశాయి. కాగా, గతంలో ప్రభుత్వానికి పలు అంశాలపై హరీష్ రావు సవాల్ విసిరారు. రేవంత్ సర్కార్, రైతు రుణమాఫీతో పాటు ఆరు గ్యారంటీలు అమలు చేస్తే తాను అమరవీరులల స్థూపం వద్ద రాజీనామా చేస్తానని ప్రకటించారు. ఈ నేపథ్యంలోనే హరీష్‌కు వ్యతిరేకంగా సీఎం రేవంత్ కామెంట్లు చేయటంతోపాటు తాజాగా ఫ్లెక్సీలు కూడా వెలిశాయి.

కాగా, సీఎం రేవంత్ వ్యాఖ్యలపై హరీశ్ రావు ట్విట్టర్ వేదికగా స్పందించారు. రేవంత్ రెడ్డి సీఎం స్థాయికి తగ్గట్టు ప్రవర్తించడం లేదని మండిపడ్డారు. ఉమ్మడి ఏపీ చరిత్రలో గానీ, తెలంగాణ చరిత్రలో గానీ ఇంతగా దిగజారిన దిక్కుమాలిన సీఎం ఇంకెవరూ లేరని తీవ్రస్థాయిలో ధ్వజమెత్తారు. అబద్ధం కూడా సిగ్గుపడి మూసిలోకి దూకి ఆత్మహత్య చేసుకునేలా రేవంత్ రెడ్డి ప్రవర్తన ఉందని ఎద్దేవా చేశారు.

డిసెంబర్ 9 నాటికి రూ.40 వేల కోట్ల రైతు రుణమాఫీ ఏకకాలంలో చేస్తానని చెప్పింది ముఖ్యమంత్రేనని గుర్తు చేసారు. అది నెరవేర్చలేక పార్లమెంట్ ఎన్నికల ముందు మరో నాటకానికి తెరలేపారన్నారు. ఆగస్ట్ 15 వరకు రూ.31 వేల కోట్లు మాఫీ చేస్తానని ఎన్నికలలో ఊదరగొట్టాడని మండిపడ్డారు. గతంలో చెప్పిన దానికి ఇప్పటికి రూ.9 వేల కోట్లు కోత పెట్టారని సీఎం రేవంత్ రెడ్డిపై హరీష్ రావు ఫైరయ్యారు.