షాపింగ్​ మాల్స్​లో రహస్య కెమెరాలు.. నగర పోలీసుల స్పెషల్ డ్రైవ్

హోటళ్లు, షాపింగ్‌ మాల్స్‌లో మహిళల భద్రతపై చాలా కాలంగా అనుమానాలు తలెత్తున్నాయి. ముఖ్యంగా అక్కడి సీసీ కెమెరాలు, సెల్‌ఫోన్‌ కెమెరాలు కంటికి కనిపించని శత్రువుల్లా తయారయ్యాయి. ట్రయల్‌ రూంలలో కొన్ని ఫేక్ మిర్రర్లు పెట్టి వాటి వెనకాల కెమెరాలు పెడుతున్నారు. అమ్మాయిలు కొంచెం ఆదమరుపుగా ఉంటే చాలు.. వీడియోలు తీస్తున్నారు. అనంతరం వాటిని సోషల్‌ మీడియోలో అప్‌లోడ్‌ చేస్తామంటూ బ్లాక్‌మెయిల్‌ చర్యలకు పాల్పడుతున్నారు. దేశ రాజధాని ఢిల్లీ సహా అన్ని ప్రధాన నగరాల్లోనూ తరచూ ఇటువంటి కేసులు బయటపడుతున్నాయి.

పెద్ద పెద్ద పట్టణాలు, నగరాల్లోని హోటళ్లు, షాపింగ్‌ మాల్స్‌లోకి వెళ్లినప్పుడు మహిళలు నిరంతరం అప్రమత్తంగా ఉండాల్సిన పరిస్థితి ఏర్పడింది. హైదరాబాద్‌ నగరంలో భారీ, మధ్యతరహా షాపింగ్‌ మాల్స్‌ అన్నీ కలిపి మొత్తం 1500 పైగానే ఉంటాయి. వీటిలో సగానికిపైగా బట్టల దుకాణాలే ఉంటాయి. ఇక హోటళ్లు అంతకు రెండు రెట్లు ఉన్నాయి. ఈ క్రమంలో కొందరు పోకిరీలు హోటళ్లలోని స్నానాల గదులు, షాపింగ్‌ మాల్స్‌లో దుస్తులు మార్చుకునే గదుల్లోనే రహస్య కెమెరాలు అమర్చుతున్నారు. ఈ నేపథ్యంలో హైదరాబాద్ పోలీసులు వినూత్న కార్యక్రమానికి శ్రీకారం చుట్టారు.

నగరంలోని షాపింగ్ మాల్స్లో ఎక్కడైనా రహస్య కెమెరాలపై వెతుకులాట ప్రారంభించారు. రాష్ట్ర విద్యాశాఖ, ఎన్ఎస్‌ఎస్ విద్యార్థులతో కలిసి పోలీసులు ఈ తనిఖీలు నిర్వహిస్తారు. సెక్యూర్‌ అండ్‌ ష్యూర్‌ పేరుతో షాపింగ్‌ మాల్స్‌, కమర్షియల్‌ స్థలాల్లో అమర్చిన స్పై కెమెరాలను ఈ టీమ్ గుర్తించనుంది. పోలీసులు, విద్యా శాఖ, NSS సహకారంతో ఈ కార్యక్రమానికి శ్రీకారం చుట్టూరు. స్వాంతంత్య్ర దినోత్సవం సందర్భంగా హైదరాబాద్ పోలీస్ కమిషనర్ శ్రీనివాస రెడ్డి, విద్యాశాఖ ప్రిన్సిపల్ సెక్రటరీ బి.వెంకటేశం గురువారం ఈ కార్యక్రమాన్ని లాంఛనంగా ప్రారంభించారు.

ఈ కార్యక్రమంలో భాగంగా ఎన్ఎస్ఎస్ వాలంటీర్లు మాల్స్, ఇతర వాణిజ్య స్థలాలను సందర్శించి, అక్కడ రహస్య కెమెరాలు లేదా స్పై కెమెరాలను తనిఖీ చేస్తారు. నిపుణులు కూడా ఉండే ఈ బృందాలు.. మహిళలు దుస్తులు మార్చుకునే ట్రయల్ గదులు, వాష్‌రూమ్‌లు, టాయిలెట్లు మొదలైన వాటిలో కెమెరాలను క్షుణ్ణంగా తనిఖీ చేస్తారు. అక్కడ ఎలాంటి కెమెరాలు కనిపించకపోతే ఆ స్థలాన్ని ‘సేఫ్ అండ్ సెక్యూర్’గా ప్రకటిస్తారు.

చిన్న,పెద్ద తేడా లేకుండా అన్ని షాపింగ్ మాల్స్‌లోనూ తనిఖీలు ఉంటాయని హైదరాబాద్ పోలీసు కమిషనర్ వెల్లడించారు. ఒక షాపింగ్ మాల్‌ను ఎన్ని సార్లైనా చెక్ చేసే అవకాశం ఉఁటుందని చెప్పారు. ఈ ప్రయత్నం మహిళలు, పిల్లలకు సురక్షితమైన వాతావరణాన్ని సృష్టించడానికి దోహదపడుతుందని సీపీ శ్రీనివాస్ రెడ్డి వెల్లడించారు.