అక్కచెల్లమ్మలను కించపరిచే ఉద్దేశం లేదు.. విచారం వ్యక్తం చేస్తున్నాను: కేటీఆర్

మహాలక్ష్మీ పథకంలో భాగంగా మహిళలకు ఉచిత బస్సు ప్రయాణంపై బీఆర్ఎస్ వర్కింగ్ ప్రెసిడెంట్ కేటీఆర్ చేసిన కామెంట్లు తీవ్ర దుమారం రేగుతున్నాయి. ఆయన కామెంట్లను తెలంగాణ మహిళా కమిషన్ సుమోటోగా తీసుకొని విచారణకు ఆదేశించింది. కేటీఆర్ కామెంట్లు తెలంగాణ మహిళలను అగౌరవపరిచేలా, కించపరిచేలా ఉన్నాయని తెలంగాణ మహిళా కమిషన్ ఛైర్‌పర్సన్ నేరెళ్ల శారద ట్వీట్ చేసారు. మంత్రులు, సీతక్క, పొన్నం ప్రభాకర్ సైతం ఆయన కామెంట్లపై తీవ్ర ఆగ్రహం వ్యక్తం చేశారు. ఈ నేపథ్యంలో కేటీఆర్ తాను చేసిన కామెంట్లపై వివరణ ఇచ్చారు.

  కావాలని తాను మహిళలను ఉద్దేశించి మాట్లాడలేదని చెప్పారు. అక్కచెల్లమ్మలను కించపరిచే ఉద్దేశం తనకు ఎప్పుడూ లేదని ట్వీట్ చేశారు. అవి యథాలాపంగా చేసిన కామెంట్లు అని వాటి వల్ల వారు మనస్థాపం చెందితే తాను విచారం వ్యక్తం చేస్తున్నానని అన్నారు. 'నిన్న పార్టీ సమావేశంలో యథాలాపంగా చేసిన వ్యాఖ్యల వల్ల మా మహిళా సోదరీమణులకు మనస్తాపం కలిగితే, నేను విచారం వ్యక్తం చేస్తున్నాను. నా అక్కచెల్లమ్మలను కించపరిచే ఉద్దేశం ఎప్పుడూ లేదు' అని కేటీఆర్ ట్వీట్ చేశారు.

కేటీఆర్ ఏమన్నారంటే..

ఆర్టీసీ బస్సుల్లో మహిళలు అల్లం వెల్లుల్లి, కుట్లు అల్లికలు చేసుకుంటే తప్పేంటని ఇటీవల మంత్రి సీతక్క కొన్ని కామెంట్లు చేశారు. ఆ వ్యాఖ్యలపై కేటీఆర్ బుధవారం (ఆగస్టు 15) విమర్శలు గుప్పించారు. పార్టీ నేతలతో నిర్వహించిన సమావేశంలో మాట్లాడిన కేటీఆర్.. ఆర్టీసీ బస్సుల్లో అల్లం వెల్లుల్లి, కుట్లు అల్లికలు చేసుకుంటే తాము తప్పని అనలేదన్నారు. బస్సుల్లో కుట్లు అల్లికలే కాదు, అవసరమైతే రికార్డింగ్ డ్యాన్సులు, బ్రేకు డ్యాన్సులు వేసుకోవచ్చునని చెప్పారు. కాకపోతే సరిపడా బస్సులు నడపాలని ప్రభుత్వాన్ని కోరారు. సరిపడా బస్సులు లేక ప్రజలు ఇబ్బందులు పడుతున్నారు. కొన్నిచోట్ల దాడులు కూడా చేసుకుంటున్నారని కామెంట్లు చేసారు.

కేటీఆర్ చేసిన ఈ కామెంట్లు తాజాగా వివాదాస్పదమయ్యాయి. మహిళలను కించపరిచేలా కేటీఆర్ మాట్లాడారని మంత్రి సీతక్క మరోసారి ఫైరయ్యారు. ఆయనకు మహిళ పట్ల గౌరవం లేదని మండిపడ్డారు. ప్రభుత్వం మహిళలకు చేస్తున్న మంచి పనులను ఓర్వలేక ఇటువంటి కామెంట్లు చేస్తున్నారని ఆగ్రహం వ్యక్తం చేశారు. కేటీఆర్‌కు తన తండ్రి కేసీఆర్ నేర్పించిన సంస్కారం ఇదేనా..? అంటూ మంత్రి సీతక్క ప్రశ్నించారు. మహిళలపై కేటీఆర్‌కు గౌరవం లేదన్నది ఈ కామెంట్ల ద్వారా స్పష్టమైందన్నారు. ఇలా కేటీఆర్ కామెంట్లు సోషల్ మీడియాలో వైరల్ కావటంతో పాటు పలువురు మహిళల నుంచి వ్యతిరేకత వస్తుండటంతో ఆయన దిగొచ్చారు. తాను కావాలని ఆ కామెంట్లు చేయలేదని ట్వీట్ చేశారు.