బస్సు కిందికి దూసుకుపోయిన ఆటో.. టెన్త్ అమ్మాయి మృతి

హైదరాబాద్‌లో ఘోర రోడ్డు ప్రమాదం జరిగింది. ఉస్మానియా యూనివర్సిటీ పోలీస్ స్టేషన్ పరిధిలోని హబ్సిగూడ చౌరస్తాలో శనివారం ఉదయం జరిగిన ప్రమాదంలో పదో తరగతి చదువుతున్న ఓ విద్యార్థిని ప్రాణాలు కోల్పోగా... ఆటో డ్రైవర్ పరిస్థితి విషమంగా ఉంది. తార్నాకలోని కిమతి కాలనీకి చెందిన రంగ సాత్విక (16).. తార్నాకలోని గౌతమ్ మోడల్ స్కూల్లో 10వ తరగతి చదువుతోంది. తన నివాసం నుంచి ఉదయం 8 గంటలకు పాఠశాలకు ఆటోలో బయలుదేరింది. హబ్సిగూడ చౌరస్తాలో సిగ్నల్ పడటంతో ఆర్టీసీ బస్సు వెనుకగా ఆటోను డ్రైవర్ ఎల్లయ్య ఆపాడు. అదే సమయంలో.. సిగ్నల్ పడిన విషయాన్ని గమనించకుండా.. TS 15 UA 4649 నెంబరు గల లారీ వెనుక వైపు నుంచి వేగంగా దూసుకొచ్చి ఆటోను ఢీకొట్టింది. ఒక్కసారి కాదు ఏకంగా మూడుసార్లు ఢీకొట్టటంతో ఆ ఫోర్స్‌తో.. ఆటో బస్సు కిందికి చొచ్చుకుపోయి నుజ్జునుజ్జయింది. ఈ ఘటనలో ఆటోలో ఉన్న డ్రైవర్ ఎల్లయ్యతో పాటు సాత్విక.. బస్సుకు ఆటోకు మధ్య ఇరుక్కుపోయారు.

వెంటనే స్పందించిన స్థానికులు.. పోలీసులకు సమాచారం ఇచ్చి.. బస్సు కింద ఇరుక్కున్న విద్యార్థినిని, డ్రైవర్‌ను బయటకు తీసేందుకు ప్రయత్నించారు. హుటాహుటిన ఘటనా స్థలికి చేరుకున్న పోలీసులు.. క్రేన్ సహాయంలో బస్సు కింద నుంచి క్షతగాత్రులను బయటికి తీసి.. 108 అంబులెన్స్‌లో నాచారం ప్రసాద్‌ ఆస్పత్రికి తరలించారు. బాధిత విద్యార్థి తీవ్రంగా గాయపడగా.. చికిత్స పొందుతూ మృతి చెందింది. ఆటోడ్రైవర్ ఎల్లయ్య పరిస్థితి విషమంగా ఉందని తెలుస్తోంది.

 మరో పది నిమిషాలైతే ఎంచక్కా స్కూల్‌కు వెళ్లి.. ఎప్పటిలాగే తన స్నేహితులతో హాయిగా గడిపే అమ్మాయి.. క్షణాల్లో ప్రాణాలు కోల్పోవటం అందరినీ కలచివేస్తోంది. ఈ విషయం తెలిసి.. అమ్మాయి తల్లిదండ్రులు గుండెలవిసేలా రోధిస్తున్నారు. మరోవైపు.. కేసు నమోదు చేసిన పోలీసులు దర్యాప్తు చేస్తున్నారు. ఈ ఘటనకు కారణమైన లారీ డ్రైవర్‌ను అదుపులోకి తీసుకున్నారు. ఎవరిది తప్పు అనేది.. సీసీ కెమెరా దృష్యాల ఆధారంగా విచారిస్తున్నారు.

మరోవైపు.. నిర్మల్ జిల్లాలో భైంసాలోనూ ఘోర ప్రమాదం చోటుచేసుకుంది. పట్టణంలోని సంతోషి మాత ఆలయం వద్ద భైంసా నుంచి నిర్మల్ వైపు ఆర్టీసీ బస్సు వెళ్తోంది. ఈ క్రమంలోనే రోడ్డు క్రాస్ చేస్తున్న ఆటోను బస్సు ఢీకొట్టింది. ఈ ప్రమాదంలో ఆటోలో ఉన్న చిన్నారితో సహా ముగ్గురికి తీవ్ర గాయాలయ్యాయి. గమనించిన స్థానికులు ముగ్గురిని హుటాహుటిన చికిత్స నిమిత్తం భైంసా ఏరియా ఆసుపత్రికి తరలించారు. ఈ ఘటనకు సంబంధించి పూర్తి వివరాలు ఇంకా తెలియాల్సి ఉంది.