తెలంగాణలో మరో 4 రోజులు దంచుడే ,,,,,అప్రమత్తంగా ఉండాలని హెచ్చరిక

తెలంగాణ వ్యాప్తంగా భారీ వర్షాలు కురుస్తున్నాయి. హైదరాబాద్‌తో పాటు పలు జిల్లాల్లో కూడా వర్షాలు పడుతున్నాయి. ఈ నేపథ్యంలో.. వాతావరణ శాక కీలక అప్డేట్ ఇచ్చింది. మరో నాలుగు రోజుల పాటు తెలంగాణలో భారీ వర్షాలు కురిసే అవకాశం ఉందని హైదరాబాద్‌ వాతావరణ కేంద్రం అంచనా వేసింది. ఉత్తర ఇంటీరియర్‌ కర్ణాటక మీదుగా ఉన్న ఆవర్తనం రాయలసీమ, పరిసర ప్రాంతాల మీదుగా సగటు సముద్రమట్టానికి 0.9 కిలోమీటర్ల ఎత్తు వరకు విస్తరించిందని తెలిపింది. ద్రోణి సగటు సముద్రమట్టానికి 0.9 కిలోమీటర్ల ఎత్తు వరకు రాయలసీమ, పరిసర ప్రాంతాల మీదుగా ఉపరితల ఆవర్తనం తమిళనాడు నుంచి కొమొరిన్‌ ప్రాంతం వరకు విస్తరించి ఉందని వివరించింది.

సోమవారం (ఆగస్టు 19) నుంచి మంగళవారం వరకు పెద్దపల్లి, జయశంకర్‌ భూపాలపల్లి, ములుగు, కొత్తగూడెం, సిద్దిపేట, రంగారెడ్డి, మహబూబ్‌నగర్‌, నాగర్‌ కర్నూల్‌, వనపర్తి, నారాయణపేట, జోగులాంబ గద్వాల జిల్లాల్లో భారీ వర్షాలు కురిసే అవకాశాలున్నాయని వాతావరణ కేంద్రం తెలిపింది. అక్కడక్కడ ఉరుములు, మెరుపులతో పాటు గంటకు 30 నుంచి 40 కిలోమీటర్ల వేగంతో ఈదురుగాలులు వీస్తాయని పేర్కొంది.

మంగళవారం నుంచి బుధవారం వరకు ఉమ్మడి ఆదిలాబాద్‌, కరీంనగర్‌ జిల్లాలతో పాటు భూపాలపల్లి, ములుగు, కొత్తగూడెం, ఖమ్మం, మహబూబాబాద్‌, వరంగల్‌, హన్మకొండ, జనగాం, సిద్దిపేట, భువనగిరి, హైదరాబాద్‌, మేడ్చల్‌, మల్కాజ్‌గిరిలో వర్షాలు కురిసే అవకాశాలున్నాయని సూచించింది. అలాగే.. బుధ, గురువారాల్లో కూడా రాష్ట్రవ్యాప్తంగా పలు జిల్లాల్లో మోస్తరు నుంచి భారీ వర్షాలు కురిసే అవకాశాలున్నాయని సూచించింది.

ఇదిలా ఉంటే.. ఈరోజు (ఆగస్టు 19న) హైదరాబాద్‌తో పాటు పలు జిల్లాల్లో జోరు వానలు కురిశాయి. హైదరాబాద్ నగరంలో కురిసిన కుండపోత వానతో రోడ్లన్నీ చెరువులను తలపించాయి. అసలే సెలవు దినం.. అందులో రాఖీ పౌర్ణమి కావటంతో.. ప్రజలు ప్రయాణాలు సాగిస్తున్న క్రమంలో భారీ వర్షం కురియటంతో.. భారీగా ట్రాఫిక్ జామ్ అయ్యింది. నిజామాబాద్, ఆదిలాబాద్ జిల్లాల్లో కూడా భారీ వర్షాలు కురిశాయి. భారీ వర్షాలతో లోతట్టు ప్రాంతాలన్ని జలమయమయ్యాయి.