తెలుగు రాష్ట్రాలకు కేంద్రం వరద సాయం.. రూ.3,300 కోట్లు విడుదల

ఇటీవల కురిసిన భారీ వర్షాలు, వరదలు తెలుగు రాష్ట్రాలకు తీరని నష్టం కలిగించాయి. ఏపీలో విజయవాడ, తెలంగాణలో ఖమ్మం సహా పలుచోట్ల వర్షాలు, వరదలు అతలాకుతలం చేశాయి. వరదల కారణంగా పదుల సంఖ్యలో ప్రాణాలు కోల్పోగా.. లక్షల మంది ప్రభావితులయ్యారు. వేల ఎకరాల్లో పంట నష్టం జరిగింది. తినడానికి తిండీ, ఉండటానికి గూడు లేక జనం నిరాశ్రయులయ్యారు. ఈ నేపథ్యంలో వర్షాలు, వరదలతో అతలాకుతలమైన తెలుగు రాష్ట్రాలకు కేంద్రం సాయం ప్రకటించింది. ఆంధ్రప్రదేశ్, తెలంగాణకు కలిపి రూ.3,300 కోట్లు వరదసాయం కింద విడుదల చేసింది. ఈ మొత్తాన్ని తక్షణ సాయం కింద విడుదల చేసినట్లు కేంద్రం తెలిపింది. మరోవైపు వరద ప్రభావిత ప్రాంతాల్లో కేంద్ర బృందంతో పాటుగా కేంద్ర వ్యవసాయ శాఖ మంత్రి శివరాజ్ సింగ్ చౌహాన్ ఇప్పటికే పర్యటించారు. జరిగిన నష్టాన్ని పరిశీలించారు. శివరాజ్ సింగ్ చౌహాన్ ఇంకా తెలుగు రాష్ట్రాల్లో ఉండగానే.. కేంద్రం తక్షణ సాయం కింద రూ.3,300 కోట్లు విడుదల చేసింది.

మరోవైపు వరద ప్రభావిత ప్రాంతాల్లో పర్యటించిన కేంద్ర మంత్రి శివరాజ్ సింగ్ చౌహాన్.. ఏపీకి కేంద్రం అన్ని రకాలుగా అండగా ఉంటుందని హామీ ఇచ్చారు. బుడమేరు వాగు క్యాచ్ మెంట్ ఏరియాతో పాటుగా అజిత్ సింగ్ నగర్, జక్కంపూడి మిల్క్ ఫ్యాక్టరీ ప్రాంతాలను ఏరియల్ సర్వే ద్వారా కేంద్ర మంత్రి పరిశీలించారు. అనంతరం ప్రకాశం బ్యారేజీ గేట్లను పరిశీలించారు. విజయవాడ కమాండ్ కంట్రోల్ రూమ్‌లో వరద నష్టంపై ఫోటో ఎగ్జిబిషన్ వీక్షించారు. అనంతరం మీడియాతో మాట్లాడిన మంత్రి కష్ట సమయంలో ఏపీకి అండగా ఉంటామని హామీ ఇచ్చారు. ఏపీ పరిస్థితిని ప్రధానికి వివరిస్తానని.. వరదల నష్టం గురించి చెప్తానని హామీ ఇచ్చారు. ఈ క్రమంలోనే తక్షణ సాయం కింద కేంద్రం రూ.3,300 కోట్లు విడుదల చేసింది.

మరోవైపు ఏపీలో వరదల కారణంగా ఇప్పటి వరకూ 34 మంది చనిపోయినట్లు అధికారిక లెక్కలు చెప్తున్నాయి. వేల ఎకరాల్లో పంట నష్టం జరిగింది. విజయవాడలో పరిస్థితులు ఇప్పుడిప్పుడే మెరుగవుతున్నాయి. వరద నీరు క్రమంగా తగ్గుముఖం పడుతూ ఉండటంతో.. స్థానికులు పునరావాస కేంద్రాల నుంచి ఇళ్లకు చేరుకుని శుభ్రం చేసుకునే పనిలో పడ్డారు. ప్రభుత్వం సైతం ఫైరింజన్ల సాయంతో ఇళ్లు శుభ్రం చేయిస్తోంది. అలాగే డ్రోన్ల సాయంతో ఆహార పదార్థాల సరఫరా చేశారు. తాజాగా ఎండీయూ వాహనాల ద్వారా ఇంటి వద్దకే నిత్యావసర సరుకులను పంపిణీ చేస్తున్నారు.