ఆయన వల్లే మళ్లీ హైదరాబాద్ సీపీగా వచ్చా.. సీవీ ఆనంద్

మొన్నటివరకు ఏసీబీ డీజీగా లంచగొండుల గుండెల్లో రైళ్లు పరుగెత్తించిన డేర్ అండ్ డ్యాషింగ్ ఐపీఎస్ సీవీ ఆనంద్.. మళ్లీ తిరిగి హైదరాబాద్ సీపీగా తిరిగొచ్చారు. ఈ క్రమంలో సీవీ ఆనంద్ ఆసక్తికర వ్యాఖ్యలు చేశారు. వినాయక చవితి రోజే మళ్లీ హైదరాబాద్ సీపీగా తిరిగి రావడం సంతోషంగా ఉందని సీపీ ఆనంద్ చెప్పుకొచ్చారు. ఆ విఘ్ననాయకుడి అనుగ్రహంతోనే తాను మళ్లీ హైదరాబాద్ సీపీ‎గా వచ్చానని అనుకుంటున్నట్టు సీవీ ఆనంద్ ఇంట్రెస్టింగ్ కామెంట్స్ చేశారు. మళ్లీ హైదరాబాద్ సీపీగా వస్తానని అనుకోలేదన్నారు.

మంగళవారం (సెప్టెంబర్ 10న) రోజున ఖైరతాబాద్ గణేషున్ని సీపీ సీవీ ఆనంద్ దర్శించుకున్నారు. సీపీ సీవీ ఆనంద్‌కు అర్చకులు, ఉత్సవ సమితి సభ్యులు పూర్ణకుంభంతో ఘన స్వాగతం పలికారు. అనంతరం.. బడా గణేషునికి సీవీ ఆనంద్ ప్రత్యేక పూజలు చేశారు. ఈ సందర్భంగా మాట్లాడిన సీవీ ఆనంద్.. తాను డీసీపీగా ఉన్నప్పటి నుంచి ప్రతి ఏడాది గణేష్ ఉత్సవ కమిటీ సభ్యుల సమన్వయంతో ఎలాంటి ఇబ్బందులు లేకుండా ఉత్సవాలను పూర్తి చేసినట్టు గుర్తు చేసుకున్నారు.

గత సంవత్సరంలాగానే.. ఈసారి కూడా ఖైరతాబాద్ వినాయకుడి నిమజ్జనాన్ని మధ్యాహ్నంలోపే పూర్తయ్యేలా చూస్తామని సీపీ సీవీ ఆనంద్ తెలిపారు. ఖైరతాబాద్ గణేషుడి నిమజ్జనం చూసేందుకు లక్షలాది మంది వస్తారన్న సీపీ సీవీ ఆనంద్.. ఈ మేరకు ట్రాఫిక్‎ను సమన్వయం చేసేందుకు బందోబస్తు పెంచుతామని చెప్పుకొచ్చారు. నిమజ్జనం కోసం పకడ్బంధీ ఏర్పాట్లు చేస్తామన్న సీవీ ఆనంద్.. గణేషుని శోభాయాత్ర ప్రశాంతంగా, ఎలాంటి అవాంఛనీయ సంఘటనలు జరగకుండా ముగిసేలా కట్టుదిట్టమైన భద్రతా ఉంటుందని స్పష్టం చేశారు.

అయితే.. గతంలోనూ హైదరాబాద్ సీపీగా పని చేసిన సీవీ ఆనంద్‎.. పోలీసింగ్‌లో తనదైన మార్క్ చూపించిన విషయం తెలిసిందే. కాగా.. తెలంగాణ అసెంబ్లీ ఎన్నికల సమయంలో సీవీ ఆనంద్‌పై వచ్చిన ఆరోపణలతో.. ఈసీ ఆయనను బదిలీ చేసింది. అనంతరం ఏర్పడిన రేవంత్ రెడ్డి సర్కార్.. సీవీ ఆనంద్‎ను ఏసీబీ డీజీగా నియమించింది. కాగా.. ఇప్పుడు మరోసారి హైదరాబాద్ సీపీగా నియమిస్తూ.. రేవంత్ రెడ్డి ప్రభుత్వం ఉత్తర్వులు జారీ చేసింది.

ప్రభుత్వం ఉత్తర్వుల మేరకు.. శనివారం (సెప్టెంబర్ 7వ తేదీన) రోజున అంటే సరిగ్గా వినాయక చవితి నాడే మళ్లీ హైదరాబాద్ సీపీగా సీపీ ఆనంద్‎ బాధ్యతలు స్వీకరించారు. దీంతో.. హైదరాబాద్ శాంతి భద్రతలు, గణేష్ నిమజ్జనంపై పూర్తి అవగాహన ఉన్న సీవీ ఆనంద్.. వాటిపై ప్రత్యేక దృష్టి సారించారు.