సతీమణి కన్నుమూత.. బోరున విలపించిన లక్ష్మారెడ్డి.. ఓదార్చిన హరీష్

బీఆర్ఎస్ నేత, మాజీ మంత్రి డాక్టర్ లక్ష్మారెడ్డి ఇంట తీవ్ర విషాదం నెలకొంది. లక్ష్మారెడ్డి భార్య డాక్టర్ శ్వేత కన్నుమూశారు. గత కొంతకాలంగా తీవ్ర అనారోగ్యంతో బాధపడుతున్న శ్వేత.. చెన్నైలోని ఓ ప్రైవేటు ఆస్పత్రిలో చికిత్స పొందుతూ సోమవారం (సెప్టెంబర్ 09న) రాత్రి తుది శ్వాస విడిచారు. చాలా రోజులుగా అనారోగ్య సమస్యలతో బాధపడుతున్న శ్వేత.. ఆస్పత్రిలో చికిత్స పొందారు. ఆరోగ్య కాస్త కుదుటపడినట్టుగా భావించి ఇటీవలే ఇంటికి చేరుకున్నారు. అయితే.. సోమవారం రాత్రి మరోసారి శ్వేత ఆరోగ్యం విషమించడంతో.. హుటాహుటిన ఆస్పత్రికి చికిత్స అందించారు. కానీ.. చికిత్స పొందుతూనే శ్వేత తుదిశ్వాస విడిచారు. దీంతో.. లక్ష్మారెడ్డి కుటుంబంలో తీవ్ర విషాదం అలుముకుంది.

శ్వేతారెడ్డి భౌతికకాయాన్ని మంగళవారం (సెప్టెంబర్ 10న) ఉదయం 6 గంటలకు చెన్నై నుంచి శంషాబాద్ విమానాశ్రయానికి తీసుకొచ్చారు. అక్కడి నుంచి నేరుగా జడ్చర్ల మీదుగా వారి స్వగ్రామమైన ఆవంచకు తీసుకెళ్లారు. అవంచ గ్రామంలోనే అంత్యక్రియలు నిర్వహించారు. శ్వేత అంత్యక్రియలకు బీఆర్ఎస్ అగ్రనేతలు.. హరీశ్ రావు, గంగుల కమలాకర్, శ్రీనివాస్ గౌడ్, పల్లా రాజేశ్వర్ రెడ్డితో పాటు పలువురు నేతలు, కార్యకర్తలు హాజరై.. శ్వేత భౌతిక ఖాయానికి నివాళులర్పించారు. ఈక్రమంలో.. లక్ష్మారెడ్డి తీవ్ర భావోద్వేగంతో కన్నీళ్లు పెట్టుకున్నారు. లక్ష్మారెడ్డిని బీఆర్ఎస్ నేతలు ఓదార్చి, ధైర్యం చెప్పారు.

లక్ష్మారెడ్డి సతీమణి శ్వేత మృతిపట్ల బీఆర్‌ఎస్‌ అధినేత, మాజీ సీఎం కేసీఆర్‌ సంతాపం వ్యక్తం చేశారు. ఆమె కుటుంబ సభ్యులకు ప్రగాఢ సానుభూతి ప్రకటించారు. మరోవైపు.. లక్ష్మారెడ్డి భార్య మరణం తీవ్రంగా బాధించిందని బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ తెలిపారు. లక్ష్మారెడ్డి కుటుంబానికి ధైర్యాన్ని ప్రసాదించాలని భగవంతుడిని ప్రార్థిస్తున్నానని తెలిపారు. శ్వేతారెడ్డి మరణం బాధాకరమని హరీష్ రావు తన సంతాపాన్ని వ్యక్తం చేశారు. శ్వేతారెడ్డి మృతితో నియోజకవర్గంలోని బీఆర్ఎస్ శ్రేణులు, లక్ష్మారెడ్డి అభిమానులు, ప్రజలు తీవ్ర దిగ్భ్రాంతి వ్యక్తం చేస్తున్నారు. శ్వేతా లక్ష్మారెడ్డితో తమకున్న అనుబంధాన్ని గుర్తు చేసుకుంటున్నారు.

వృత్తిరిత్యా హూమియోపతి వైద్యుడు అయిన లక్ష్మారెడ్డి.. 2001లో టీఆర్ఎస్‌ పార్టీలో చేరి ఉద్యమంలో కీలక పాత్ర పోషించారు. 2004, 2014, 2018లో జడ్చర్ల నియోజకవర్గం ఎమ్మెల్యేగా బరిలో దిగి విజయం సాధించారు. కేసీఆర్ ప్రభుత్వంలో ఇంధన శాఖ మంత్రిగా, ఆరోగ్యశాఖ మంత్రిగా లక్ష్మారెడ్డి పనిచేశారు.