'ఫైబర్‌ మాక్సింగ్‌' అంటే ఏంటి? అతి అయితే మాత్రం తిప్పలు తప్పవు

ఫైబర్‌ ఆరోగ్యానికి ఎంతో మేలు చేస్తుంది. ఇందులో రకరకాలు ఉండొచ్చు గానీ ప్రధానమైనవి నీటిలో కరిగే ఫైబర్‌, నీటిలో కరగని ఫైబర్‌. మనం తినే ఆహారంలో ఫైబర్‌ డైట్‌ చేర్చుకోవడం వల్ల పెద్దపేగు సమస్యలు తగ్గుతాయని హార్వర్డ్‌ మెడికల్‌ స్కూల్‌ తెలిపింది. ఫైబర్‌ పేగుల్లో మంచి బ్యాక్టీరియాను పెంచి పేగు ఆరోగ్యానికి మేలు చేస్తుంది. ఫైబర్‌ బ్లడ్‌ షుగర్‌ లెవల్స్‌ను కూడా తగ్గిస్తుంది. నీటిలో కరగని ఫైబర్‌ కడుపు నిండిన భావన కలిగిస్తుంది. చెడు కొలెస్ట్రాల్‌ను గణనీయంగా తగ్గిస్తుంది. గుండెజబ్బులు, పేగు క్యాన్సర్‌లను నివారిస్తుంది.

ఇన్ని ప్రయోజనాలు ఉండటంతో.. ఈ మధ్య కాలంలో 'ఫైబర్‌ మాక్సింగ్‌' ట్రెండ్‌ నడుస్తోంది. అసలు 'ఫైబర్‌ మాక్సింగ్‌' అంటే ఏమిటి? ఇది ఆరోగ్యానికి ఎంత మంచిది? ఎంత ఫైబర్‌ తీసుకోవాలి? దీని వల్ల ఆరోగ్యానికి దుష్ప్రభావాలు ఏమైనా ఉంటాయా అనే ప్రశ్నలకు సర్జికల్‌ ఆంకాలజిస్ట్ డాక్టర్‌ మోహన వంశీ మనకు వివరించారు.

'ఫైబర్‌ మాక్సింగ్‌' అంటే ఏంటి?

'ఫైబర్‌ మాక్సింగ్‌' పదం వింటుంటే మీకు కొత్తగా అనిపించొచ్చు. దీని అర్థం చాలా సింపుల్‌ ఇంటర్నెట్‌లో "ఎక్కువ ఫైబర్ తినండి" అని చెప్పే విధానం. మన జీర్ణవ్యవస్థను మెరుగుపరచడానికి, గట్‌ ఆరోగ్యాన్ని కాపాడే ఫైబర్ ఇన్‌టేక్‌ పెంచడాన్ని ఇది ప్రోత్సాహిస్తుంది. ఇది కొత్త ట్రెండ్‌ అయినప్పటికీ కొత్త అభ్యాసం ఏమీ కాదు.

రోజూ ఎంత ఫైబర్‌ తీసుకోవాలి?

ఎన్‌ఐఎన్‌ (నేషనల్‌ ఇనిస్టిట్యూట్‌ ఆఫ్‌ న్యూట్రిషన్‌) రిపోర్ట్‌ ప్రకారం పెద్దలు 2 వేల కిలో క్యాలరీల ఆహారం తీసుకుంటే 30 గ్రాముల రోజువారీ ఫైబర్‌ తీసుకోవాలి. 1- 3 సంవత్సరాల చిన్నారులకు 15గ్రాములు, స్కూలుకు వెళ్లే పిల్లల్లో 20గ్రాముల చొప్పున ప్రతిరోజూ ఫైబర్‌ అందాలి.

ఈ జాగ్రత్తలు తీసుకోవాలి

ఫైబర్‌ తీసుకున్నప్పుడు జీర్ణక్రియకు మద్దతుగా ప్రతిరోజూ తగినంత నీరు, జ్యూస్‌ వంటి ద్రవాల పదార్థాలు తీసుకోవాలని డాక్టర్‌ మోహన వంశీ సూచించారు. అలా నీరు తీసుకోకపోవడం వల్ల పేగు చికాకు, పొత్తికడుపు తిమ్మిరి వంటి సమస్యలు ఎదురవుతాయి.

ఫైబర్‌ అతిగా తీసకుంటే ఈ దుష్ప్రభావాలు ఉంటాయి

ఫైబర్‌ ఆరోగ్యానికి మేలు చేస్తుందని అతిగా తీసుకుంటే దుష్ప్రభావాలు ఎదురవుతాయని డాక్టర్‌ మోహన వంశీ అన్నారు. పీచు లిమిట్‌కు మించి తీసుకుంటే గ్యాస్ట్రిక్‌, పేగు చికాకు, కడుపు ఉబ్బరం, గట్‌ ఇరిటేషన్‌ వంటి సమస్యలు ఎదురవుతాయి. అంతేకాదు తీసుకున్న ఆహారంలోని కాల్షియం, ఐరన్, జింకు వంటి ముఖ్యమైన పోషకాలు ఖనిజాల గ్రహించడంలోనూ ఆటంకం ఏర్పడుతుంది.

ఇలా ఫాలో అవ్వండి

'ఫైబర్‌ మాక్సింగ్‌' మీరూ ఫాలో కావాలనుకుంటే, ఒకేసారి ఎక్కువ మొత్తంలో కాకుండా, ఆహారంలో నిదానంగా ఫైబర్‌ పదార్థాన్ని పెంచుతూ వెళ్లాలి అని నిపుణులు అంటున్నారు. మొదట్లో ఒకపూట మాత్రమే తీసుకోవాలి. క్రమేణా మూడు పూటలా ఆహారంలో భాగం చేసుకోవాలి. వారానికి 5-10గ్రా.లు పెంచుకుంటూ వెళితే మీ జీర్ణాశయం దీనికి అలవాటుపడుతుంది.