వివేక్‌కు మంత్రి పదవి లేనట్లేనా..?,,,కాకా జయంతి వేడుకల్లో సీఎం రేవంత్ ఇంట్రెస్టింగ్ కామెంట్స్

కేంద్ర మాజీ మంత్రి గడ్డం వెకంట స్వామి (కాకా) 95వ జయంతి కార్యక్రమాన్ని రవీంద్ర భారతిలో తెలంగాణ ప్రభుత్వం అధికారికంగా నిర్వహించింది. ఈ కార్యక్రమానికి సీఎం రేవంత్ రెడ్డి ముఖ్య అతిథిగా హాజరై కాకా చిత్రపటానికి నివాళి అర్పించారు. కాకా కుటుంబం నుంచి ఎమ్మెల్యేలు వివేక్, వినోద్, ఎంపీ వంశీకృష్ణ, పలువురు మంత్రులు, ఎమ్మెల్యేలు, సీనియర్ నేతలు పాల్గొన్నారు. ఈ సందర్భంగా కాకా సేవలు, ఆయనతో ఉన్న అనుబంధాన్ని వారు గుర్తుచేసుకున్నారు.

కార్యక్రమంలో భాగంగా ప్రసంగించిన సీఎం రేవంత్ కాకా కుటుంబానికి మంత్రి పదవి ఇచ్చే అంశంపై కీలక కామెంట్స్ చేశారు. సీఎం ప్రసంగం కంటే ముందు కాకా గురించి మాట్లాడిన రవాణా శాఖ మంత్రి పొన్నం ప్రభాకర్ తనకు కాకా కుటుంబంతో ఎప్పట్నుంచో అనుబంధం ఉందని గుర్తు చేసుకున్నారు. తానూ ఆ కుటుంబంలో ఓ సభ్యుడినని చెప్పారు. పొన్నం తర్వాత మాట్లాడిన రేవంత్.. పొన్నం చేసిన కామెంట్లను కోట్ చేస్తూ ఇంట్రెస్టింగ్ వ్యాఖ్యలు చేశారు. పొన్నం కాకా కుటుంబంలో సభ్యుడైతే ఆ కుటుంబానికి తాను మంత్రి పదవి ఇచ్చి న్యాయం చేసినట్లేనని అన్నారు. ఇప్పటికే పొన్నం కేబినెట్‌లో ఉన్నందున ఆ కుటుంబానికి మంత్రి పదవి ఇవ్వాల్సిన అవసరం లేదని అన్నారు. దీంతో సభలో పాల్గొన్న నేతలంతా పగలబడి నవ్వారు. పొన్నం ఒక్క మాట వివేక్‌కు మంత్రి పదవి దూరం చేసేలా ఉందని సభకు హాజరైనవారు సరదాగా చర్చించుకున్నారు.

కాగా, ప్రస్తుతం తెలంగాణ కేబినెట్‌లో ముఖ్యమంత్రితో కలిపి 12 మందికి ఉన్నారు. మరో 6 బెర్తులు ఖాళీగా ఉన్నాయి. కాకా కుమారులు గడ్డం వివేక్, వినేద్ మంత్రి పదవి కోసం గత కొంత కాలంగా ప్రయత్నిస్తున్నారు. త్వరలోనే మంత్రివర్గ విస్తరణ ఉటుందని.. అందులో వివేక్‌‍కు పదవి ఖాయమనే ఊహాగానాలు వినిపిస్తున్నాయి. ఈ నేపథ్యంలో వివేక్ మంత్రి పదవిపై భారీగా ఆశలు పెట్టుకున్నారు. ఈ హామీతోనే ఆయన ఎన్నికలకు ముందు బీజేపీ నుంచి కాంగ్రెస్ పార్టీలో చేరినట్లు తెలిసింది.

గత వారం క్రితమే మంత్రి వర్గ విస్తరణ ఉంటుందని భావించినా.. అధి సాధ్యం కాలేదు. దసరా తర్వాత మంత్రివర్గ విస్తరణ ఉండే ఛాన్స్ ఉంది. వివేక్‌తో పాటుగా ఎమ్మెల్యేలు కోమటిరెడ్డి రాజగోపాల్ రెడ్డి, దానం నాగేందర్, మల్‌రెడ్డి రంగారెడ్డి, వాకిటి శ్రీహరి, సుదర్శన్ రెడ్డి, మైనార్టీ కోటాలో అజారుద్దీన్, షబ్బీర్ అలీ తదితరులు మంత్రి పదవుల కోసం పోటీ పడుతున్నారు. అయితే మంత్రి పదవులు వీరిలో ఎవరెవరికి దక్కుతాయనేది ఆసక్తికరంగా మారింది.