సెంట్రల్ జైళ్లలో ఆ సెంటర్లు ఏర్పాటు.. ముందు చర్లపల్లి జైలులోనే

తెలంగాణలోని జైళ్లలో మార్పులకు ప్రభుత్వం శ్రీకారం చుట్టింది. ఇందులో భాగంగా తొలిసారిగా డీ-అడిక్షన్‌ సెంటర్లు అందుబాటులోకి రాబోతున్నాయి. జైలు బ్యారక్‌ల్లోనే వీటిని ఏర్పాటు దిశగా కార్యాచరణ రూపొందించింది తెలంగాణ జైళ్ల శాఖ. ముందుగా చంచల్‌గూడ సెంట్రల్ జైలులోనే ఏర్పాటు చేయనున్నారు. ఈనెలలో ముఖ్యమంత్రి రేవంత్‌రెడ్డి చేతుల మీదుగా ఈ కేంద్రాన్ని ప్రారంభించేందుకు జైళ్లశాఖ ఉన్నతాధికారులు సన్నాహాలు చేస్తున్నారు. అనంతరం రాష్ట్రవ్యాప్తంగా మిగతా సెంట్రల్ జైళ్లలో వీటిని అందుబాటులోకి తీసుకువచ్చే యోచనలో ఉన్నారు.

డీ-అడిఖ్షన్ కేంద్రాలు ఏర్పాటుతో ఖైదీలు, జైళ్ల అధికారులకూ ఇబ్బందులు తప్పనున్నాయి. ప్రస్తుతం హైదరాబాద్‌‌ (చంచల్‌గూడ, చర్లపల్లి), సంగారెడ్డి, నిజామాబాద్‌‌లో కేంద్ర కారాగారాలు.. ఆదిలాబాద్, నల్గొండ, కరీంనగర్, మెదక్, మహబూబ్‌నగర్, ఖమ్మం జిల్లా జైల్లు.. 20 సబ్‌ జైళ్లు.. ఒక్కో మహిళ, ఓపెన్, బోస్టన్‌ జైళ్లు ఉన్నాయి. వీటిలో దాదాపు 6,800 మంది ఖైదీలు ఉన్నారు. వీరిలో సగం మంది చర్లపల్లి, చంచల్‌గూడ సెంట్రల్ జైలులోనే ఉన్నారు. ఇక్కడకు వచ్చే ఖైదీల్లో మద్యం, వైట్‌నర్, డ్రగ్స్ వంటి వ్యసనపరులు ఉంటే మిగిలిన వారికీ ఇబ్బందులు తప్పడం లేదు. జైల్లోకి వచ్చిన తర్వాత డ్రగ్స్ లభించక చాలా మంది విపరీతంగా ప్రవర్తిస్తున్నారు.

ఈ క్రమంలో వారికి అక్కడి ఉండే వైద్యులు ప్రాథమిక చికిత్స అందించే ప్రయత్నం చేస్తారు. అయినప్పటికీ పరిస్థితి అదుపులోకి రాకుంటే ఎర్రగడ్డ పిచ్చాసుపత్రికి పంపుతారు. ఇలాంటి వారిని అదుపు చేయడం జైలు సిబ్బందికి తలకు మించిన భారంగా మారుతోంది. అంతేకాదు, ఖైదీలను ఆసుపత్రికి తరలించే క్రమంలోనూ ఇబ్బందులు తప్పడం లేదు. ఆ సమయంలో వారు పారిపోయే ప్రయత్నం చేయడం.. ఆసుపత్రి నుంచి తప్పించుకోవడం వంటి సమస్యలు ఎదురువుతున్నాయి. ఇటువంటి కేసులు జైలు అధికారులు, సిబ్బందిని చిక్కుల్లో పడేస్తున్నాయి.

మరోవైపు, దేశవ్యాప్తంగా సెంట్రల్ జైళ్లలో డి-అడిక్షన్ కేంద్రాలను ఏర్పాటు చేయాలని సుప్రీంకోర్టు ఆదేశించింది. ీ నేపథ్యంలో వ్యసన విముక్తి కేంద్రాల ఏర్పాటుకు ప్రయత్నించడం ప్రాధాన్యత ఏర్పడింది. ఈమేరకు డి-అడిక్షన్ కేంద్రాల్లో మానసిక నిపుణులు, కౌన్సెలర్లతోపాటు అనుభవజ్ఞులైన సిబ్బందిని నియమించనున్నారు.