నేటి నుంచి డిగ్రీ, పీజీ కాలేజీలు బంద్‌.. కారణమిదే

తెలంగాణలోని ప్రైవేట్‌ డిగ్రీ, పీజీ కళాశాలలు నేటి నుంచి నిరవధికంగా బంద్‌ కానున్నాయి. ఫీజు రీయింబర్స్మెంట్ బకాయిలు విడుదల చేయకపోవటంతో సంఘం అధ్యక్ష, ప్రధాన కార్యదర్శులు బొజ్జ సూర్యనారాయణరెడ్డి, యాద రామకృష్ణలు బంద్‌కు పిలుపునిచ్చారు. నిధులు విడుదల కాకపోవడంతో తాము ఆర్థికంగా ఇబ్బందులు ఎదురవుతున్నాయని డిగ్రీ, పీజీ కళాశాల యాజమాన్య సంఘాలు వెల్లడించాయి. కాంగ్రెస్ ప్రభుత్వంలోనూ ఉన్నత విద్య నిర్లక్ష్యానికి గురవుతోందని వారు వాపోయారు.

ఈ ఏడాది దసరా సెలవుల తర్వాత అక్టోబర్ చివరికల్లా డబ్బులు అకౌంట్లలో జమ చేస్తామని ప్రభుత్వం హామీ ఇచ్చిందని.. అయినా ఇప్పటి వరకు అమలుకు నోచుకోకపోవడంతో కాలేజీలను బంద్ చేస్తున్నామని వెల్లడించారు. గతంలో అక్టోబర్ 14 నుంచి 17 వరకు కాలేజీలు మూసివేసినప్పుడు విద్యా శాఖ ప్రధాన కార్యదర్శి బుర్రా వెంకటేశం హామీ ఇచ్చారని గుర్తు చేశారు. దాంతో తరగతులు నిర్వహించామని, ఈసారి డబ్బులు విడుదల చేసేంత వరకు కాలేజీలు తెరిచేది లేదని స్పష్టం చేశారు. ఇక మాటలు వినే పరిస్థితుల్లో లేమని.. పెండింగ్ బకాయిలు విడుదల చేసే వరకు బంద్‌ కొనసాగుతుందన్నారు. ఈ మేరకు యాజమాన్య సంఘాలు ఓ ప్రకటనలో పిలుపునిచ్చారు.

రాష్ట్రంలో ఉన్నత విద్య నిర్లక్ష్యానికి గురైందని సంఘం నాయకులు సూర్యనారాణ రెడ్డి, రామకృష్ణ తీవ్ర ఆవేదన వ్యక్తం చేశారు. ఫీజు రీయింబర్స్‌మెంట్‌ బకాయిలపై ప్రభుత్వ అధికారుల చుట్టూ ఎన్నిసార్లు తిరిగినా ఫలితం లేకుండా పోయిందన్నారు. ముఖ్యమంత్రి రేవంత్‌ రెడ్డి తమకు కనీసం అపాయింట్‌మెంట్ ఇవ్వటం లేదని వాపోయారు. 90 శాతం కాలేజీల యాజమాన్యాలు 5 నెలలుగా జీతాలు ఇవ్వలేని పరిస్థితుల్లో ఉన్నాయన్నారు. అద్దెలు చెల్లించలేక ఇబ్బందులు పడుతున్నామని వాపోయారు.

కాగా, కాలేజీల బంద్‌ ప్రభావం డిగ్రీ సెమిస్టర్‌ పరీక్షలపై పడనుంది. డిగ్రీ 3, 5 సెమిస్టర్‌ పరీక్షలు ఈ వారంలో జరగాల్సి ఉంది. ఉస్మానియా యూనివర్సిటీ పరీక్షలు నేటి నుంచి జరగాల్సి ఉంది. ఈనెల 21 నుంచి మహత్మాగాంధీ యూనివర్సిటీ, ఈనెల 26 నుంచి కాకతీయ యూనివర్సిటీ, పాలమూరు వర్సిటీల పరీక్షలు ప్రారంభం కావాల్సి ఉంది. ఈ నెలలోనే శాతవాహన, తెలంగాణ వర్సిటీల సెమిస్టర్‌ పరీక్షలు సైతం జరగనున్నాయి. నెలాఖరు నుంచి డిగ్రీ మొదటి సెమిస్టర్‌ పరీక్షలు జరగాల్సి ఉంది. అయితే కాలేజీ యాజమాన్యాలు బంద్‌కు పిలుపునివ్వటంతో వాటి ప్రభావం పరీక్షలపై పడనుంది.