హాస్టల్స్‌లోకి బిర్యానీలు, చిరుతిళ్లు తీసుకురావొద్దు.. కీలక సూచనలు

తెలంగాణలో ప్రభుత్వ పాఠశాలలు, సంక్షేమ గురుకులాలు, వసతిగృహాల్లో ఫుడ్ పాయిజన్ ఘటనలతో ప్రభుత్వం అలర్ట్ అయ్యింది. ముఖ్యమంత్రి రేవంత్ రెడ్డి రంగంలోకి దిగి.. మరోసారి ఇలాంటి ఘటనలు జరగకుండా చూసుకోవాలని అధికారులకు దిశా నిర్దేశం చేశారు. అయితే ఫుడ్‌పాయిజన్, ఆహారంలో నాణ్యత లోపాల ఘటనలతో.. సంక్షేమశాఖలు, గురుకుల సొసైటీలు అప్రమత్తం అయ్యాయి.. ఈ మేరకు కొన్ని ముఖ్యమైన సూచలు చేశారు.

కొన్నేళ్లుగా విద్యాలయాలు, వసతి గృహాల్లోకి బయట వండి తీసుకువచ్చిన ఆహారాన్ని అనుమతించని సంగతి తెలిసిందే. ఈ నిషేధాన్ని మరింత కఠినంగా అమలు చేయాలని వార్డెన్లు, గురుకులాల ప్రిన్సిపాళ్లకు ఆదేశాలు జారీ చేశారు. ఇటీవలి ఘటనల తర్వాత సంక్షేమశాఖల ఉన్నతాధికారులు రంగంలోకి దిగారు.. అన్ని జిల్లాల సంక్షేమాధికారులు, గురుకులాల ప్రాంతీయ సమన్వయకర్తలు, ప్రిన్సిపాళ్లతో సమీక్ష చేస్తున్నారు. ఈ మేరకు కొన్ని కీలకమైన సూచనల్ని చేశారు.

పిల్లల కోసం తల్లిదండ్రులు బిర్యానీలు, ఇతర చిరుతిళ్లు తీసుకొస్తే.. వాటిని ఎట్టిపరిస్థితుల్లో అనుమతించవద్దని సూచించారు. ఉదయం వండిన ఆహారం మధ్యాహ్నం.. మధ్యాహ్నం వండిన భోజనాన్ని పోపు చేసి సాయంత్రం వడ్డించినట్లు తేలితే చర్యలు తప్పవని చెప్పారు. ప్రతి రోజూ విద్యార్థులకు వేడి టిఫిన్, భోజనం అందించాలని.. వడ్డించేందుకు రెండు నుంచి మూడు గంటల ముందు మాత్రమే వంట ప్రక్రియ చేపట్టాలని సూచించారు. అంతేకాదు రాత్రి భోజనం 6-7 గంటల మధ్య వేడిగా వడ్డించి పూర్తిచేయాలన్నారు.

హాస్టల్స్‌ ప్రత్యేక అధికారులు రోజు లేదా రెండురోజులకోసారి గురుకులాలు, వసతిగృహాల్లో ఆహార వస్తువుల నిల్వ, వంటపై తనిఖీ చేయాలని సూచించారు. అలాగే స్టూడెంట్స్‌ మెస్‌ కమిటీలు ఏర్పాటు చేసి.. వాటి ఆధ్వర్యంలో మెనూ నిర్ణయించడంతో పాటుగా.. తప్పనిసరిగా ఫిర్యాదుల పెట్టె ఏర్పాటు చేయాలి అన్నారు. అంతేకాదు పిల్లల ఫిర్యాదులు పరిశీలించి పరిష్కరించాలని.. హాస్టల్స్‌లో ఆహారం నిల్వకు అవసరమైన డబ్బాలు, ఇతర సామగ్రి అందుబాటులో లేకుంటే వెంటనే ప్రతిపాదనలు పంపించాలని సూచించారు.

కాంట్రాక్టర్ల నుంచి అందిన పప్పుదినుసులపై ఐఎస్‌ఐ మార్కును కచ్చితంగా పరిశీలించాలని ఆదేవించారు. సరకులు నిల్వ ఉంచే గదిలో ఫంగస్, ఎలుకలు, పురుగులు లేకుండా చూసుకోవాలని.. పౌరసరఫరాల శాఖ నుంచి వచ్చే బియ్యాన్ని పరిశీలించాలని సూచనలు చేశారు. వంట మనుషులు నిపుణులై ఉండాలని.. వారు కూడా కచ్చితంగా ఆఫ్రాన్, క్యాప్‌ ధరించాలని.. టైంటేబుల్‌ ప్రకారం ఆహారం వడ్డించడంతో పాటు విద్యార్థులతో కలిసి అక్కడి ప్రిన్సిపల్, వార్డెన్‌ భోజనం చేయాలి అన్నారు.

ప్రభుత్వ పాఠశాలలు, సంక్షేమ గురుకులాలు, వసతిగృహాల్లో విద్యార్థులకు నాణ్యమైన ఆహారం అందించాలన్నారు ముఖ్యమంత్రి రేవంత్ రెడ్డి. ఎవరైనా ఈ విషయంలో ఉదాసీనంగా వ్యవహరిస్తే కఠిన చర్యలు తప్పవని రేవంత్‌రెడ్డి హెచ్చరించారు. ఒకవేళ ఎవరైనా నిర్లక్ష్యంగా వ్యవహరించినట్లు రుజువైతే ఉద్యోగాల నుంచి తొలగించేందుకూ వెనుకాడబోమన్నారు. అంతేకాదు ప్రభుత్వం తాజాగా ఆహార భద్రత కమిటీలను నియమించింది. ఈ కమిటీలో ప్రధానోపాధ్యాయుడు లేదా ప్రిన్సిపల్‌ లేదా వార్డెన్‌తో పాటు, అక్కడ పనిచేస్తున్న మరో ఇద్దరు సిబ్బంది సభ్యులుగా ఉంటారు.