మరోసారి పంజా విసిరిన పెద్దపులి.. పొలంలో పనిచేస్తున్న రైతుపై దాడి

కుమురం భీం ఆసిఫాబాద్ జిల్లాలో పెద్దపులి మరోసారి పంజా విసిరింది. కాగజ్‌నగర్ మండలం గన్నారం గ్రామంలో పత్తిచేలో పని చేస్తున్న ఓ యువతిని పెద్దపులి చంపేసిన సంగతి తెలిసిందే. తాజాగా.. సిర్పూర్ (టీ) మండలం దుబ్బగూడలో మరో రైతుపై దాడి చేసింది. గ్రామానికి చెందిన రౌతు సురేష్‌పై పులిదాడి చేసింది. పొలంలో పని చేస్తున్న సురేష్‌పై ఒక్కసారిగా దాడికి పాల్పడింది. ఈ ఘటనలో సురేష్ తీవ్రంగా గాయపడ్డాడు. మెడ చుట్టూ తీవ్రంగా గాయాలయ్యాయి. దీంతో సురేష్‌ను స్థానికులు ప్రభుత్వ ఆసుపత్రికి తరలించారు. ప్రస్తుతం అతడికి ఆసుపత్రిలో చికిత్స అందిస్తోండగా.. ఎటువంటి ప్రాణాప్రాయం లేదని డాక్టర్లు వెల్లడించారు.

గన్నారం గ్రామానికి చెందిన మోర్లే లక్ష్మి అనే యువతిపై పెద్దపులి దాడి చేసి చంపేసింది. శనివారం (నవంబర్ 29) ఉదయం మరో ఆరుగురు మహిళలతో కలిసి పత్తి చేనులో కూలీకి వెళ్లింది. కొంతసేపటికే చేనులోకి వచ్చిన పెద్దపులి లక్ష్మిపై ఆకస్మాత్తుగా దాడి చేసింది. నోటకరచుకుని పొదల్లోకి వెళ్లింది. అక్కడే పనిచేస్తున్న వారు అరవడంతో కొంతదూరంలో వదిలి వెళ్లిపోయింది. పులి దాడితో లక్ష్మి మెడపై తీవ్రగాయాలయ్యాయి. రక్తం ఏరులై పారింది. తోటికూలీలు ఇచ్చిన సమాచారంతో కొనఊపిరితో కొట్టుమిట్టాడుతున్న లక్ష్మిని స్థానికులు కాగజ్‌నగర్‌లోని ఓ ప్రైవేటు ఆసుపత్రికి తరలించే ప్రయత్నం చేశారు. అయితే మార్గమధ్యలోనే యువతి కన్నుమూసింది.

మహారాష్ట్ర పులేనా..?

వరుసగా దాడి చేస్తున్న పెద్దపులి మహారాష్ట్రకు చెందింది కావచ్చునని అటవీశాఖ అధికారులు అనుమానిస్తున్నారు. నజ్రుల్‌నగర్‌ సమీపంలోని సిర్పూర్‌ మండలంలో రెండు పులులు తిరుగుతున్నాయి. అయితే అవి మనుషులపై దాడి చేసిన దాఖలాలు లేవు ఏమాత్రం లేవు. పెద్దపులులు ఆడతోడు కోసం, లేదంటే కొత్త ఆవాసం కోసం మరో ప్రాంతానికి వలస వెళతుంటాయి. రెండేళ్ల వయసు దాటాక తల్లి నుంచి విడిపోయి కొత్త ప్రాంతంలో ఆవాసం ఏర్పరచుకుంటాయి.

ఇటీవల మహారాష్ట్ర నుంచి ఓ పులి తెలంగాణ అడవుల వైపు వచ్చింది. నిర్మల్ ప్రాంతంలో రహదారి దాటుతూ వాహనదారుల కెమెరాకు చిక్కింది. కాగజ్‌నగర్‌ మండలంలో జరిగిన ఘటనలో ముందు ఆవుపై దాడి చేసిన పులి ఆ తర్వాత యువతిపై దాడి చేసింది. తాజాగా మరో రైతుపైనా దాడికి పాల్పడింది. ఈ పులి కోసం అటవీ అధికారులు వేట ప్రారంభించారు. డ్రోనే కెమెరా సాయంతో దాని జాడ కోసం ప్రయత్నిస్తున్నారు.