హైదరాబాద్ వాహనదారులకు అదిరే న్యూస్.. త్వరలో అందుబాటులోకి కొత్త ఫ్లైఓవర్, ఇక దూసుకెళ్లిపోవచ్చు

హైదరాబాద్ విశ్వనగరంగా అభివృద్ధి చెందుతుంది. అందుకు తగిన విధంగా ప్రభుత్వాలు మౌళిక సౌకర్యాల కల్పనపై దృష్టి పెడుతున్నారు. నగరవాసులు ఎదుర్కొంటున్న ప్రధాన సమస్య ట్రాఫిక్. దీంతో వాహనదారులకు మెరుగైన సౌకర్యాలు అందించాలనే ఉద్దేశ్యంతో గత బీఆర్ఎస్ ప్రభుత్వం, ప్రస్తుతం కాంగ్రెస్ ప్రభుత్వం ఫ్లైఓవర్లు, కొత్త అండర్‌పాసులు, రహదారుల విస్తరణపై స్పెషల్ ఫోకస్ పెట్టింది. ఇప్పటికే నగరంలో కొన్ని ఫ్లైఓవర్లు అందుబాటులోకి వచ్చాయి. మరికొన్ని నిర్మాణ దశలో ఉన్నాయి. ఈ నేపథ్యంలో నగర వాహనాదరులకు రేవంత్ సర్కార్ తీపి కబురు చెప్పింది. త్వరలో మరో ఫ్లైఓవర్ అందుబాటులోకి రానుంది.

 హైదరాబాద్ జూపార్కు నుంచి ఆరాంఘర్‌ చౌరస్తా నిర్మించిన ఫ్లైఓవర్ ప్రారంభానికి సిద్ధమైంది. 4.08 కి.మీ పొడవు, ఆరు లైన్ల వెడల్పుతో మూడేళ్ల క్రితం పనులు ప్రారంభం కాగా.. ప్రస్తుతం వాహన రాకపోకలకు సిద్ధమైంది. నిధుల కొరతతో తొలి దశలో పనులు ముందుకు సాగలేదు. అయితే కొత్త ప్రభుత్వం తోడ్పాటుతో పైవంతెన నిర్మాణం పూర్తయింది. సర్వీసు రోడ్డును అందుబాటులోకి తీసుకొచ్చి ప్రారంభోత్సవానికి సిద్ధం చేస్తున్నామని జీహెచ్‌ఎంసీ అధికారులు వెల్లడించారు.

జూపార్క్‌ నుంచి ఆరాంఘర్ ‌‌‌‌‌‌‌ వరకు 24 మీటర్ల వెడల్పు, 4.08 కిలోమీటర్ల పొడవు, ఆరు లేన్లతో ఈ ప్లైఓవర్ నిర్మించారు. ఈ ఫ్లైఓవర్ అందుబాటులోకి వస్తే ట్రాఫిక్ సమస్యకు చెక్ పడనుంది. జూపార్క్ నుంచి ఆరాంఘర్ మీదుగా శంషాబాద్ ఎయిర్‌‌‌‌‌‌‌‌పోర్టు, మహబూబ్‌‌‌‌‌‌‌‌నగర్, ఏపీలోని కర్నూలు, అనంతపురం, బెంగళూరు వెళ్లేవారికి ట్రాఫిక్ చిక్కులు ఉండవు. ట్రాఫిక్ సిగ్నల్స్ సమస్య లేకుండా దూసుకెళ్లిపోవచ్చు. తాడ్బన్, దానమ్మ హట్స్, హసన్ నగర్ జంక్షన్లలోని ట్రాఫిక్ సిగ్నల్స్ వద్ద ఆగాల్సిన పని ఉండదు. జూపార్క్‌‌‌‌‌‌‌‌కు వచ్చే సందర్శకులు, ఓల్డ్ సిటీ వైపు వెళ్లే వాహనాలకు ప్రయాణం ఈజీ అవుతుంది.

ఈ ఫ్లైఓవర్ అందుబాటులోకి వస్తే.. సిటీలో అతిపెద్ద ఫ్లైఓవర్ కానుంది. ఉమ్మడి ఏపీలో పీవీ నరసింహరావు ఎక్స్‌‌‌‌‌‌‌‌ప్రెస్ వే 2009లో అందుబాటులోకి వచ్చింది. నాలుగు లేన్లతో నిర్మించిన ఈ ఫ్లైఓవర్ పొడవు 11.66 కిలోమీటర్లు. ఎయిర్ పోర్టుకు వెళ్లేవారికి ట్రాఫిక్ సమస్య లేకుండా ఉండేందుకు ఈ ఫ్లైఓవర్ అందుబాటులోకి తీసుకొచ్చారు. ఆ తర్వాత కొత్తగూడ ఫ్లైఓవర్ 3 కిలోమీటర్ల పొడవుతో నిర్మించగా.. 4.08 కిలోమీటర్ల పొడవుతో జూపార్, ఆరాంఘర్ ఫ్లైఓవర్ అందుబాటులోకి రానుంది. డిసెంబర్ 3న ఈ ఫ్లైఓవర్ ప్రారంభించనున్నట్లు సమాచారం.