వణికిస్తున్న న్యూమోనియా.. నిలోఫర్‌కు చిన్న పిల్లలు క్యూ, ఈ జాగ్రత్తలు తీసుకోండి

తెలంగాణలో చలి తీవ్రత విపరీతంగా పెరిగింది. కొన్ని ప్రాంతాల్లో రికార్డు స్థాయిలో ఉష్ణోగ్రతలు నమోదవుతున్నాయి. 8 డిగ్రీల కంటే తక్కువగా ఉష్ణోగ్రతలు రికార్డవుతున్నాయి. అయితే సాధారణంగా చలి కాలంలో చిన్న పిల్లలు, వృద్ధులు తీవ్ర అనారోగ్యం బారిన పడుతుంటారు. చల్ల గాలుల కారణంగా ఇబ్బందులు ఎదుర్కొంటారు. ముఖ్యంగా చిన్న పిల్లలు న్యూమోనియా ప్రభావం ఎక్కువగా ఉంటుంది. హైదరాబాద్ నిలోఫర్‌ హాస్పిటల్‌కు చిన్న పిల్లలు క్యూ కడుతున్నారు.

ఇప్పటికే దాదాపు 200 పైగా న్యూమోనియా కేసులు హాస్పిటల్‌లో రికార్డయ్యాయి. ప్రతి రోజూ ఓపీకి 30-40 మంది వస్తుండగా.. సోమ, మంగళ, బుధ వారాల్లో ఈ సంఖ్య 60 వరకు ఉంటోందని ఆసుపత్రి అధికారులు చెబుతున్నారు. వీరిలో కొందరికి హెచ్‌ఎఫ్‌ఎన్‌సీ, వెంటిలేటర్‌ చికిత్సలూ అవసరమవుతున్నాయని అంటున్నారు. ఊపిరితిత్తుల్లో ఇన్‌ఫెక్షన్‌కు కారణమయ్యే న్యూమోనియా బ్యాక్టీరియా, వైరస్, శిలీంధ్రాల వల్ల వ్యాప్తి చెందుతుందని డాక్టర్లు చెబుతున్నారు. 0-5 ఏళ్ల లోపు పిల్లలు, 65 ఏళ్లు పైబడి వృద్ధుల్లో ఈ న్యూమోనియా ఎక్కువ ప్రభావం చూపుతుందని అంటున్నారు. రెస్పిరేటరీ సిన్సిటియర్‌ వైరస్‌, స్ట్రెప్టోకోకస్, ఇన్‌ఫూయింజా వైరస్‌ న్యూమోనియాల బారిన ఎక్కువ మంది పడతారని చెబుతున్నారు.

చలి కాలంలో చిన్న పిల్లల ఆరోగ్యం విషయంలో చాలా జాగ్రత్తగా ఉండాలని నిలోఫర్ డాక్టర్లు చెబుతున్నారు. న్యూమోనియా, ఆస్తమా, ఇతర బ్రీతింగ్ ఇన్‌ఫెక్షన్లు వస్తుంటాయని చెబుతున్నారు. 6 నెలల వరకు చంటి పిల్లలకు తల్లిపాలు తప్పక తాగించాలని సూచిస్తున్నారు. దీనివల్ల న్యూమోనియా వంటి ఇన్‌ఫెక్షన్లను నిరోధించవచ్చునని అంటున్నారు. అలాగే తీవ్ర జ్వరం, ఆయాసం, శ్వాస తీసుకోవడంలో ఇబ్బంది, శరీరం ఉన్నట్లుండి నీలం రంగులోకి మారడం లాంటి లక్షణాలు కన్పిస్తే నిర్లక్ష్యం చేయవద్దని చెబుతున్నారు. వెంటనే హాస్పిటల్‌కు తీసుకువెళ్లి డాక్టర్లను కలవాలని సూచిస్తున్నారు. ఈ కాలంలో చలి గాలుల బారిన పడకుండా ఉండాలని.. శరీరాన్ని పుర్తిగా కప్పి ఉంచే ఉన్ని దుస్తులు ధరించాలని అంటున్నారు. అలాగే వేడి వేడి ఆహారం తీసుకోవాలని.. గోరు వెచ్చని నీటిని మాత్రమే తాగించాలని డాక్టర్లు సూచిస్తున్నారు.