ఎలా వస్తాయిరా నాయనా ఇలాంటి ఐడియాలు.. జైలు నుంచి దర్జాగా బయటికి.. వాళ్లే దగ్గరుండి పంపేలా

కొన్ని సంఘటనలు చూస్తుంటే.. ఎలా వస్తాయిరా నాయనా మీకు ఇలాంటి ఐడియాలు.. అని ఆశ్చర్యం వేస్తుంటుంది. అచ్చంగా అలాంటి భావనే కలుగుతోంది ఈ ఘటన గురించి తెలిస్తే. చంచల్‌గూడ సెంట్రల్ జైలులో రిమాండ్‌లో ఉన్న నిందితుడు.. దర్జాగా బయటికి వచ్చాడు. అదోదో పారిపోయో, అధికారుల కళ్లుగప్పో, విడుదల చేస్తేనో కాదు.. తన అతితెలివితోనే దర్జాగా రాజాలా బయటికొచ్చాడు. అది కూడా జైళ్ల శాఖ అధికారులే దగ్గరుండి అతన్ని విడుదల చేశారు. మరి.. ఆ నిందితుడు ఎలా విడుదలయ్యాడు.. మరి జైలు అధికారులు ఏం చేస్తున్నారన్నది క్లారిటీగా తెలుసుకుందాం.

హైదరాబాద్‌ సంతోష్ నగర్‌ హెచ్‌ఐజీ కాలనీకి చెందిన మీర్‌ సుజాత్‌ అలీఖాన్‌పై పలు కేసులు నమోదయ్యాయి. జంతువుల హత్య, మూగజీవాలకు విషం పెట్టడం వంటి నేరాలకు సంబంధించి గతంలో అరెస్టయిన సుజాత్‌ అలీ.. చంచల్‌గూడ జైలులో విచారణ ఖైదిగా ఉన్నాడు. అక్టోబరు 17న ఈ కేసులో సుజాత్ అలీకి బెయిల్‌ రావడంతో విడుదలయ్యాడు. కట్ చేస్తే.. నవంబరు 2వ తేదీన నార్సింగ్‌ పోలీస్ స్టేషన్‌లో.. మరో కేసు నమోదు కాగా.. పోలీసులు అతణ్ని అరెస్టు చేసి.. చంచల్‌గూడ జైలుకు రిమాండ్‌ చేశారు. అండర్‌ ట్రయలర్‌‌గా ఉన్న సుజాత్‌ అలీ.. బెయిల్‌ విభాగంలో పనిచేసే రాము అనే మరో విచారణ ఖైదీని మచ్చిక చేసుకున్నాడు. ఆ తర్వాత.. పాత బెయిల్‌ పేపర్లను ఫోర్జరీ చేసి ఇస్తే.. దాన్ని పాస్‌ చేయాలని.. అందుకు భారీ మొత్తంలో ప్రతిఫలం ఇస్తానంటూ రాముతో డీల్ కుదుర్చుకున్నాడు.

 ఇకేముంది.. ములాఖత్‌ సమయంలో తన వారిని కలిసిన సుజాత్‌ అలీ.. ఈ ప్లాన్ మొత్తం వారికి వివరించాడు. పాత బెయిల్‌ పత్రాలను ఫోర్జరీ చేయించాడు. పాల బెయిల్ పేపర్లను కొత్త తేదీలతో ఫోర్జరీ చేసి.. తాజా కేసులో బెయిల్‌ వచ్చినట్లుగా పత్రాలను సృష్టించాడు. అలా తయారు చేసిన నకిలీ బెయిల్‌ పత్రాలను రాముకు అందజేశాడు. ముందుగా మాట్లాడుకున్న డీల్ ప్రకారం.. రాము ఆ పత్రాలు కోర్టు నుంచి వచ్చినట్లుగా ధ్రువీకరిస్తూ.. స్టాంపింగ్‌ చేశాడు. దీంతో.. ఆ బెయిల్‌ పత్రాలు నిజమైనవేనని భావించిన ఉన్నతాధికారులు.. సుజాత్‌ అలీని నవంబరు 26న విడుదల చేశారు.

నిజానికి విడుదలైన సుజాత్‌ అలీ ప్రదర్శించిన అతితెలివితో అస్సలు దొరికే వాడు కానేకాదు కానీ చిన్న లాజిక్ మిస్సవటంతో.. అడ్డంగా బుక్కయిపోయాడు. విడుదలైన తర్వాత మూడు రోజుల్లోనే సుజాత్‌ అలీకి సంబంధించిన మరో మోసం వెలుగులోకి వచ్చింది. దీంతో.. మరో చీటింగ్‌ కేసులో దర్యాప్తు అధికారులు కోర్టు అనుమతితో సుజాత్‌ అలీని కస్టడీలోకి తీసుకునేందుకు పీటీ వారెంట్‌ దాఖలు చేశారు. దానికి కోర్టు ఆమోదించడంతో.. నవంబరు 29న పీటీ వారెంట్‌తో చంచల్‌గూడ జైలుకు వెళ్లి.. సుజాత్‌ అలీని అప్పగించాలంటూ చంచల్‌గూడ జైలు అధికారులకు విజ్ఞప్తి చేశారు.

పీటీ వారెంట్ చూసి జైళ్ల శాఖ అధికారులు, సిబ్బంది ఒక్కసారిగా ఖంగుతిన్నారు. సాధారంగా.. జైలులో ఉన్నవారికే పీటీ వారెంట్‌ వర్తిస్తుంది. అలాంటిది విడుదలైన సుజాత్‌ అలీకి పీటీ వారెంట్‌ రావడంతో.. అవాక్కయ్యారు. ఈ విషయంపై ఆరా తీస్తే.. అలీ బెయిల్‌ పత్రాలు నకిలీవని తేలింది. దీంతో.. సుజాత్‌ అలీని పట్టుకునేందుకు పోలీసులు ప్రయత్నాలు షురూ చేశారు.