మంచు ఫ్యామిలీ ఫైట్‌పై రాజాసింగ్‌ రియాక్షన్.. మోహన్ బాబుకు 'ఉత్తమ' సలహా

మంచువారి ఫ్యామిలీ ఫైట్ ఇప్పుడు.. రెండు తెలుగు రాష్ట్రాల్లో హాట్ టాపిక్ అయిన విషయం తెలిసిందే. అయితే.. ఈ వ్యవహారం మెల్లిగా రాజకీయ మలుపు కూడా తీసుకుంటుండటం గమనార్హం. తమ ఫ్యామిలీ గొడవల్లో కొంత మంది పొలిటికల్ లీడర్లు కూడా ఇన్‌వాల్వ్ అవుతున్నారంటూ.. మంచు విష్ణు కామెంట్ చేయటమే ఇందుకు నిదర్శనం. ఇందుకు తగ్గట్టుగానే అటు ఏపీలోని పలువురు నేతలు కూడా సోషల్ మీడియా వేదికగా పలు కామెంట్లు చేస్తున్నారు. ఇదే క్రమంలో.. డిసెంబర్ 10వ తేదీన జల్ పల్లిలోని నివాసంలో ఓ మీడియా ప్రతినిధిపై మోహన్ బాబు దాడి చేయటాన్ని కూడా పలువురు రాజకీయ నేతలు తీవ్ర స్థాయిలో ఖండించారు.

ఈ క్రమంలోనే.. జర్నలిస్టుపై మోహన్ బాబు దాడి ఘటనపై బీజేపీ నేత, గోషామహల్ ఎమ్మెల్యే రాజాసింగ్ స్పందించారు. గురువారం (డిసెంబర్ 12న) విడుదల చేసిన వీడియోలో ఆయన మాట్లాడుతూ.. మోహన్ బాబు కుటుంబ గొడవల నేపథ్యంలోనే ఈ ఘటన చోటుచేసుకుందని చెప్పుకొచ్చారు. మోహన్ బాబు కుమారుడు మంచు మనోజ్ మీడియాను ఆహ్వానించడం వలననే జర్నలిస్టులు వాళ్ల నివాసంలోనికి ప్రవేశించారని రాజాసింగ్ అభిప్రాయపడ్డారు.

మీ కుటుంబ సమస్యలు మీ ఇంటి వరకు మాత్రమే పరిమితమైతే మంచిదని మోహన్ బాబుకు సూచించారు. అయితే.. ఆ సమస్యను పబ్లిక్‌లో పెట్టడం వల్ల ఈ పరిణామాలు చోటుచేసుకున్నాయని తెలిపారు. వాస్తవాలు ప్రజల ముందుకు తీసుకురావడం మీడియా బాధ్యత అని పేర్కొన్నారు. మీడియా ఏ పార్టీకి సపోర్ట్‌గా ఉండదని రాజాసింగ్ చెప్పుకొచ్చారు. ఈ అంశాన్ని ఇలాగే వదిలేస్తే మరింత తీవ్రమవుతుందని హెచ్చరించారు.

ఈ క్రమంలోనే.. మోహన్ బాబుకు రాజాసింగ్ ఉత్తమ సలహా ఇచ్చారు. మీవైపు నుంచి పొరపాటు జరిగిందని గుర్తించి వెంటనే మీడియా మిత్రులకు క్షమాపణలు చెప్పడం 'ఉత్తమ'మంటూ మోహన్ బాబుకు రాజాసింగ్ సూచించారు. గాయపడిన జర్నలిస్టును పరామర్శించడం కూడా మంచిదని సూచించారు. మీడియా ఒక వ్యక్తిని హీరోగా చేయగలదని, అదే సమయంలో జీరోగా కూడా మార్చగలిగే శక్తి ఉందని రాజాసింగ్ హెచ్చరించారు.