ఇదేం దిక్కుమాలిన లాజిక్.. అల్లు అర్జున్ అరెస్ట్‌పై కేటీఆర్ ఫైర్

పుష్ప 2 మూవీ బెనిఫిట్‌ షో సందర్భంగా హైదరాబాద్‌ ఆర్టీసీ క్రాస్‌రోడ్డులోని సంధ్య థియేటర్‌ వద్ద జరిగిన తొక్కిసలాటలో రేవతి అనే మహిళ మృతి చెందిన విషయం తెలిసిందే. ఈ కేసులో తాజాగా అల్లు అర్జున్‌ను చిక్కడపల్లి పోలీసులు అరెస్టు చేశారు. ఆయనపై 105, 118(1), రెడ్‌ విత్‌ 3/5 BNS సెక్షన్ల కింద కేసు నమోదు చేసి అదుపులోకి తీసుకున్నారు. ప్రస్తుతం అల్లు అర్జున్ పీఎస్‌లో ఉండగా.. అతడి నుంచి స్టేట్‌మెంట్ రికార్డ్ చేస్తున్నారు. అనంతరం ఆయన్ను నాంపల్లి కోర్టుకు తరలించేందుకు ఏర్పాట్లు చేస్తున్నారు.

కాగా, అల్లు అర్జున్ అరెస్ట్ వ్యవహారం టాలీవుడ్ ఇండస్ట్రీతో పాటుగా.. తెలుగు రాష్ట్రాల్లో హాట్ టాఫిక్‌గా మారింది. తాజాగా.. ఐకాన్ స్టార్ అరెస్టుపై బీఆర్ఎస్ వర్కింగ్ ప్రెసిడెంట్ కేటీఆర్ స్పందించారు. జాతీయ ఉత్తమ నటుడిగా అవార్డు తీసుకున్న అల్లు అర్జున్‌ను ఈ విధంగా అరెస్టు చేయటం పాలకుల అభద్రతకు పరాకాష్ఠ అని ఫైరయ్యారు. తొక్కిసలాట బాధితుల పట్ల తనకు పూర్తి సానుభూతి ఉందని.. కానీ ఈ ఘటనలో నిజంగా విఫలమైంది ఎవరని ట్విట్టర్ వేదికగా కేటీఆర్ ప్రశ్నించారు.

‘జాతీయ అవార్డు గెలుచుకున్న స్టార్ అల్లు అర్జున్‌ను అరెస్ట్ చేయడం పాలకుల అభద్రతకు పరాకాష్ట. తొక్కిసలాట బాధితుల పట్ల నాకు పూర్తి సానుభూతి ఉంది. కానీ, ఈ ఘటనలో నిజమైన వైఫల్యం ఎవరిది? అసలు ఆ ఘటనతో నేరుగా సంబంధంలేని అల్లు అర్జున్ గారిని ఒక కామన్ క్రిమినల్‌లా ట్రీట్ చేయడం సరికాదు. ఎప్పుడూ మనం గౌరవంగా, మర్యాదగా ప్రవర్తించాలి. ప్రభుత్వం ఈ విధంగా ప్రవర్తించడాన్ని నేను తీవ్రంగా ఖండిస్తున్నాను. హైడ్రా భయంతో హైదరాబాద్‌లో ఇద్దరు అమాయకులు చనిపోయారు. మరి ఇదే లాజిక్ ప్రకారం ఆ మరణాలకు బాధ్యుడిగా రేవంత్ రెడ్డిని కూడా అరెస్ట్ చేయాలి’ అని కేటీఆర్ తన పోస్టులో పేర్కొన్నారు.

ఇక ఈ కేసులో ఇప్పటికే థియేటర్ ఓనర్‌తో పాటు మరో ఇద్దరిని పోలీసులు అరెస్టు చేశారు. తనపై చిక్కడపల్లి పోలీసులు నమోదు చేసిన కేసును కొట్టి వేయాలని కోరుతూ అల్లు అర్జున్‌ గతంలోనే హైకోర్టులో పిటిషన్‌ దాఖలు చేయగా.. న్యాయస్థానం తిరస్కరించింది. ఈ క్రమంలో నేడు ఉదయం అల్లు అర్జున్ ఇంటికి వెళ్లిన పోలీసులు.. ఆయన్ని అదుపులోకి తీసుకుని స్టేషన్‌కు తరలించారు. మరోవైపు, అల్లు అర్జున్ హైకోర్టులో లంచ్ మోషన్ పిటిషన్ వేశారు. సోమవారం వరకు తనను అరెస్టు చేయకుండా ఆదేశాలు ఇవ్వాలని అల్లు అర్జున్ ఈ పిటిషన్ వేశారు.