మీడియాపై దాడి ఘటన.. వెనక్కి తగ్గిన 'పెదరాయుడు', క్షమాపణలు చెబుతూ లేఖ

మంచు మోహన్ బాబు ఇంటి గొడవలు గతకొన్ని రోజులుగా తెలుగు రాష్ట్రాల్లో హాట్ టాఫిక్‌గా మారాయి. మంచు మోహన్ బాబు, పెద్ద కుమారుడు విష్ణులతో చిన్న కుమారుడు మంచు మనోజ్‌కు విభేదాలు తలెత్తగా.. గత రెండ్రోజుల క్రితం ఈ గొడవలు తారాస్థాయికి చేరుకున్నాయి. డిసెంబర్ 9న జల్‌పల్లిలోని మోహన్ బాబు ఇంటి వద్ద హైడ్రామా నెలకొంది. ఈ క్రమంలో కవరేజీకి వెళ్లిన మీడియా ప్రతినిధిపై మోహన్ బాబు దాడికి పాల్పడ్డాడు. ఆయన వ్యక్తిగత సిబ్బంది, బౌన్సర్లు.. మీడియా ప్రతినిధులను ఇంటి నుంచి తరిమికొట్టారు. మీడియాపై దాడితో ఈ వివాదం కొత్త మలుపు తీసుకుంది. మోహన్ బాబుపై పహడీషరీఫ్ పోలీస్ స్టేషన్‌లో మర్డర్ అటెంప్ట్ కేసు ఫైల్ అయింది.

పలువురు జర్నలిస్టులు, జర్నలిస్టు సంఘాలు, రాజకీయ నేతలు మోహన్ బాబు చర్యలపై మండిపడ్డారు. మోహన్ బాబు క్షమాపణలు చెప్పాలని డిమాండ్ చేస్తున్నారు. ఈ క్రమంలో పెదరాయుడు దిగొచ్చారు. మీడియా ప్రతినిధులకు క్షమాపణలు చెబుతూ లేఖ విడుదల చేశారు. తాను ఆవేశంలో.. అనుకోని పరిస్థితుల్లో అలా చేయాల్సి వచ్చిందని వివరణ ఇచ్చారు. కావాలని తాను దాడి చేయలేదని జరిగిన ఘటనకు చింతిస్తున్నట్లు లేఖలో పేర్కొన్నారు.

'ఇటీవల జరిగింది దురదృష్టకర ఘటన. జరిగిన ఘటన పట్ల విచారం వ్యక్తం చేస్తున్నా. వ్యక్తిగత కుటుంబ వివాదం పెద్ద పరిణామాలకు దారి తీసింది. నేను చేసిన చర్య జర్నలిస్టు సోదరులకు బాధ కలిగించింది. ఘటన జరిగిన వెంటనే స్పందించాల్సింది. కానీ ఆరోగ్య కారణాల వల్ల గత 48 గంటలుగా నేను హాస్పిటల్‌లో ఉండాల్సి వచ్చింది. అందుకే స్పందించలేకపోయాను. క్షణికావేశంలో ఇది జరిగింది. దాదాపు 30-50 మంది ప్రైవేటు వ్యక్తులు, సంఘ వ్యతిరేక శక్తులు నా ఇంటి గేటును తోసుకొని లోపలికి చొరబడ్డారు.

మాకు హానీ చేసేందుకు ఇంట్లోకి చొరబడ్డారు. దీంతో నేను సహనం కోల్పోయారు. ఈ గందరగోళం మధ్య.. మీడియా ప్రతినిధులను గమనించకుండా పరిస్థితిని అదుపు చేసేందుకు దాడి చేయాల్సి వచ్చింది. ఈ ఘటనలో ఓ జర్నలిస్టుకు గాయమైంది. జరిగిన ఘటనకు నేను చింతిస్తున్నా. గాయపడ్డ జర్నలిస్టు మిత్రుడికి, మీడియా సంస్థకు అతడి కుటుంబ సభ్యులను నేను హృదయపూర్వకంగా క్షమాపణలు కోరుతున్నా. అతడు త్వరగా కోలుకోవాలని ఆకాంక్షిస్తున్నా. ఆవేశపూరితంగా నేను చేసిన పనికి చింతిస్తున్నా.' అని మంచు మోహన్ బాబు లేఖ విడుదల చేశారు.