నీ నీడ కూడా నీమీద ఉమ్మేస్తది.. కాంగ్రెస్ నేత సంచలన వ్యాఖ్యలు

బీఆర్ఎస్ వర్కింగ్ ప్రెసిడెంట్ కేటీఆర్ మీద కాంగ్రెస్ పార్టీ మీడియా సెల్ ఛైర్మన్ సామ రామ్మోహన్ రెడ్డి తీవ్ర వ్యాఖ్యలు చేశారు. కళ్యాణ లక్ష్మి చెక్కుల పంపిణీ కార్యక్రమంలో ఎనుముల తిరుపతి రెడ్డి పాల్గొని తన చేతుల మీదుగా లబ్దిదారులకు చెక్కులు అందజేస్తున్న ఫొటోను ట్విట్టర్‌లో పోస్ట్ చేస్తూ.. ఎమ్మెల్యే బదులు అధికార కార్యక్రమాల్లో పాల్గొనేందుకు.. సీఎం రేవంత్ రెడ్డి సోదరుడు తిరుపతి రెడ్డి ఎవరు అంటూ కేటీఆర్ విమర్శించగా.. దానిపై స్పందించిన సామ రామ్మోహన్ రెడ్డి కౌంటర్ ట్విట్ చేస్తూ.. సంచలన వ్యాఖ్యలు చేశారు.

"సిగ్గుందా సైకో రామ్?? నువ్వు కుటుంబ పాలన గురించి మాట్లాడుతున్నావా ??? ఇవే వ్యాఖ్యలకి నువ్వు అద్దం ముందు చేస్తే.. నీ నీడ కూడా నీ మీద ఉమ్మేస్తది.. ఏ పదవీ లేనప్పుడు మీ అయ్యకి టాబ్లెట్లు, టాయిలెట్ పేపర్లు అందించే సంతుకి 1+1 సెక్యూరిటీ ఎవడు ఇచ్చిండు?? రాజ్యసభ ఎంపీకి ISW ప్రోటోకాల్ కాకపోయినా 2+2 సెక్యూరిటీ ఎవడు పెట్టిండు?? మీలాగా అధికారంలో ఉన్నప్పుడు కుటుంబమంతా ఎంపీలు, ఎమ్మెల్సీలు, మంత్రులు నియమించుకోలేదు వాళ్లు. మీ కుటుంబంలాగా రాష్ట్రంలోని జిల్లాలను ఆస్తుల్లా పంచుకోలేదు వాళ్లు.. మీలాగా కుటుంబమంతా దోపిడీ దొంగల్లాగ రాష్ట్రాన్ని కొల్లగొట్టలేదు వాళ్లు. ముఖ్యమంత్రి రేవంత్ రెడ్డి సోదరుడు సంక్షేమాన్ని పంచడంలో పాల్గొంటున్నారు. మీ కుటుంబంలాగ అయ్య కాళేశ్వరం, బావ కాకతీయ, చెల్లె లిక్కర్, తమ్ముడు మొక్కల్, నువ్వు A - Z చేసిన కుంభకోణాల మాదిరి కాదు." అంటూ ఘాటైన వ్యాఖ్యలతో ట్వీట్ చేశారు సామ రామ్మోహన్ రెడ్డి.

అనంతరం.. ఫార్ములా ఈ రేసు కేసులో బాండ్ల గురించి వెలుగులోకి వచ్చిన పలు అంశాలపై మీడియా చిట్‌చాట్‌లో స్పందిస్తూ.. కేటీఆర్ చేసిన వ్యాఖ్యలపై కూడా సామ రామ్మోహన్ రెడ్డి ట్విట్టర్ వేదికగా కౌంటర్ ఇచ్చారు. "భారం ప్రభుత్వానికి.. బాండ్లు బిఆర్ఎస్ కు.. వెలుగులోకి వస్తున్న కేటీఆర్ ఫార్ములా -ఈ రేసు కుంభకోణం ఉట్టి కేసు.. లొట్టపీసు కేసు అన్న టిల్లు నేడు ప్రశ్నలకు ఉలిక్కిపడుతున్నాడెందుకు?? మీడియా సూటి ప్రశ్నలకు సొల్లు జవాబులెందుకు ఇస్తున్నట్టూ?? తెలంగాణ సర్కార్, ఎఫ్‌ఈఓ లండన్, గ్రీన్ కో మధ్య త్రై పాక్షిక ఒప్పందం జరిగింది 2022లో.. బీఆర్ఎస్‌కు గ్రీన్ కో మరియు అనుబంధ సంస్థల నుంచి రూ.49 కోట్లు వచ్చింది కూడా 2022 లోనే.. ఇది లొట్టపీసు కేసా?? సైకో రామ్‌ని లోపలేసే కేసా ముందు ముందు చూస్తాం." అంటూ సంచలన ఆరోపణలు చేశారు సామ రామ్మోహన్ రెడ్డి.