అంబేద్కర్ విజయం వెనుక రామాబాయి కృషి
Telangana Telugu | Suryaa Desk | Published : Sat, Feb 08, 2025, 02:35 PM
రాజ్యాంగ నిర్మాత డా.బీ.ఆర్.అంబేద్కర్ విజయం వెనుక ఆయన సతీమణి రమాబాయి కృషి ఎంతో ఉందని చేవెళ్ల అంబేద్కర్ యువజన సంఘం అధ్యక్షులు సున్నపు ప్రవీణ్, ఆలిండియా అంబేద్కర్ సంఘం జిల్లా అధ్యక్షులు బేగరి ప్రభాకర్ అన్నారు. శుక్రవారం మాతా రామాబాయి అంబేద్కర్ జయంతి సందర్భంగా చేవెళ్ల మున్సిపల్ కేంద్రంలోని అంబేద్కర్ విగ్రహం ముందు ఆ సంఘాల నాయకులతో కలిసి ఆమె చిత్రపటానికి పూలమాలలు వేసి నివాళులర్పించారు. ఈ సందర్భంగా వారు మాట్లాడుతూ.. మాతా రమాబాయి తన జీవితాన్ని త్యాగం చేసి డాక్టర్ బాబాసాహెబ్ అంబేద్కర్ కు వెన్నుదన్నుగా నిలిచిందని, అంబేద్కర్ దేశం కోసం చేసిన సేవల్లో రమాబాయి పాత్ర ఎనలేనిదన్నారు. నేటితరం మహిళలు, యువతులు రమాబాయిని ఆదర్శంగా తీసుకొని, జీవితంలో ముందుకు సాగాలని సూచించారు.
అంబేద్కర్ చదువులకు డబ్బులు అవసరం ఉంటే కుమారుని ఆరోగ్యం బాగాలేని సమయంలోనూ అంబేద్కర్ చదువుకు డబ్బులు పంపించి చదువులు కొనసాగించేలా చొరవచూపిన గొప్ప త్యాగశీలి రమాబాయి అన్నారు. బాబాసాహెబ్ చేపట్టిన ఉద్యమంలో ఎక్కడ ఆటంకాలు కలుగకుండా సహకరించిన గొప్ప మహిళ అని కొనియాడారు. ఈ కార్యక్రమంలో ఆలిండియా అంబేద్కర్ యువజన సంఘం జిల్లా కోశాధికారి ఎంజాల వినోద్, నియోజకవర్గం అధ్యక్షులు ఏర్పుల యాదగిరి, చేవెళ్ల మండల ఉపాధ్యక్షులు కావలి గణేష్, సంఘం సభ్యులు బేగరి సత్యయ్య తదితరులు పాల్గొన్నారు.
|
|