దేశవ్యాప్తంగా కూడా గెలుస్తాం: కోమటిరెడ్డి వెంకటరెడ్డి

ఢిల్లీలో కాంగ్రెస్ ఓటమిపై బీఆర్ఎస్ వర్కింగ్ ప్రెసిడెంట్ కేటీఆర్ చేసిన సెటైరికల్ కామెంట్స్‌పై మంత్రి కోమటిరెడ్డి వెంకట రెడ్డి స్పందించారు. రాహుల్ గాంధీపై కేటీఆర్ చేసిన వ్యాఖ్యలకు కౌంటర్‌గా.. ట్విట్టర్‌లో పోస్టు పెట్టారు. తాము కాంగ్రెస్ పార్టీ యోధులమని కోమటిరెడ్డి వెంకటరెడ్డి చెప్పుకొచ్చారు. తెలంగాణలో ఓటమి తర్వాత ఎలాగైతే తిరిగి పుంజుకొని విజయం సాధించామో.. అలాగే దేశవ్యాప్తంగా కూడా గెలుస్తామని కోమటిరెడ్డి ధీమా వ్యక్తం చేశారు. పార్లమెంటు ఎన్నికల్లో బీజేపీని గెలిపించడం కోసం.. సొంత పార్టీకి సున్నా సీట్లు అందించిన గొప్ప నాయకత్వం, పార్టీ బీఆర్ఎస్‌ది అంటూ విమర్శించారు. తెలంగాణలో బీజేపీకి 8 సీట్లు అందించిన బీఆర్ఎస్‌కు అభినందనలు అంటూ రివర్స్ కౌంటర్ ఇచ్చారు. రాష్ట్రంలో బీజేపీ ఎదుగుదలకు ఎవరైనా కారణమంటే అది ముమ్మాటికీ బీఆర్ఎస్ పార్టీ ఘనతే అని కోమటిరెడ్డి వెంకట్ రెడ్డి ట్విట్‌లో పేర్కొన్నారు.

అంతకుముందు.. ఢిల్లీ ఎన్నికల ఫలితాలపై కేటీఆర్ తనదైన శైలిలో స్పందించారు. ట్విట్టర్ వేదికగా కాంగ్రెస్ అగ్రనేత రాహుల్ గాంధీపై సెటైర్లు సంధించారు. "కంగ్రాట్స్ రాహుల్ గాంధీ" అంటూ సెటైర్లు వేశారు. మరోసారి బీజేపీని గెలిపించిన రాహుల్ గాంధీకి అభినందనలని కేటీఆర్ ట్వీట్ చేశారు. అయితే.. ఇందుకు సంబంధించి సంవత్సరం కింద కేటీఆర్‌ చెప్పిన విషయానికి సంబంధించిన వీడియోను ఓ నెటిజన్ షేర్ చేయగా.. ఆ ట్వీట్‌ను కేటీఆర్ తన పోస్టుకు జత చేశారు. కాగా.. ఈ పోస్టును బీఆర్ఎస్ శ్రేణులు తెగ వైరల్ చేసేస్తున్నారు.

ఆ తర్వాత తెలంగాణ భవన్‌లో నిర్వహించిన కార్యకర్తల ఆత్మీయ సమావేశంలోనూ.. రేవంత్ రెడ్డి ఓ ఐరెన్ లెగ్ అని.. మొన్న హర్యానాకు వెళ్తే అక్కడ ఓడిపోయిందని.. నిన్న మహారాష్ట్ర ప్రచారం చేస్తే అదే పరిస్థితి నెలకొందని.. ఇప్పుడు ఢిల్లీలనూ అదే సీన్ రిపీటయ్యిందని కేటీఆర్ ఎద్దేవా చేశారు.

ఇదే క్రమంలో.. ఢిల్లీ అసెంబ్లీ ఎన్నికల ఫలితాలపై మాజీ మంత్రి హరీష్ రావు కూడా తనదైన శైలిలో స్పందించారు. ఈ సందర్భంగా మాట్లాడిన హరీష్ రావు.. ఢిల్లీ ఎన్నికల్లో కాంగ్రెస్ పార్టీకి గాడిద గుడ్డు మిగిలిందంటూ వ్యంగ్యాస్త్రాలు సంధించారు. మొన్న హర్యానా, నిన్న మహారాష్ట్ర, నేడు ఢిల్లీలో ఘోర పరాజయం చెందడంలో రాహుల్ గాంధీ, రేవంత్ రెడ్డి పాత్ర అమోఘమంటూ హరీష్ రావు సెటైర్లు విసిరారు. తెలంగాణలో అధికారంలో ఉండి కూడా ఎన్నికల్లో ఇచ్చిన హామీలు అమలు చేయకుండా.. ఇతర రాష్ట్రాల్లో ప్రచారం చేసుకున్నంత మాత్రాన ఓట్లు పడతాయా అంటూ ప్రశ్నించారు. కాంగ్రెస్ గ్యారెంటీల నిజస్వరూపం ఏంటో దేశవ్యాప్తంగా బట్టబయలైందని హరీష్ రావు పేర్కొన్నారు.