మా ఇద్దరి ఆలోచనలు ఒకేలా ఉంటాయి..,,ఆర్ఎస్ ప్రవీణ్ కుమార్ పై కేటీఆర్

బీఆర్ఎస్ వర్కింగ్ ప్రెసిడెంట్, మాజీ మంత్రి కేటీఆర్ ఇంట్రెస్టింగ్ కామెంట్స్ చేశారు. శనివారం (ఫిబ్రవరి 08న) రోజున హైదరాబాద్ తెలంగాణ భవన్‌లో సిర్పూర్ కాగజ్ నగర్ బీఆర్ఎస్ కార్యకర్తలతో ఆత్మీయ సమావేశం నిర్వహించారు. ఈ కార్యక్రమంలో పాల్గొన్న కేటీఆర్.. సిర్పూర్ కాగజ్ నగర్‌తో తనకున్న అనుబంధాన్ని గుర్తు చేసుకోవటంతో పాటు అక్కడి కార్యకర్తలు, ఆర్ఎస్ ప్రవీణ్ కుమార్‌ మీద ఆసక్తికర వ్యాఖ్యలు చేశారు. ప్రతిపక్షంలో ఉన్న పార్టీతో కలిసి నడిచేందుకు ముందుకు వచ్చిన నిజమైన నాయకుడు ఆర్ఎస్ ప్రవీణ్ కుమార్ అని కేటీఆర్‌ చెప్పుకొచ్చారు. తెలంగాణ సమాజం గురించి.. రాష్ట్ర అభివృద్ధి గురించి, భవిష్యత్ తెలంగాణ గురించి ఆర్ఎస్ ప్రవీణ్ కుమార్ ఆలోచనలు, తన ఆలోచనలు దాదాపు ఒకేలా ఉంటాయని పేర్కొన్నారు కేటీఆర్. అధికారంలో ఉన్న రేవంత్ రెడ్డి ఇచ్చిన అనేక అవకాశాలను, ఆఫర్ చేసిన్న పదవులను వదులుకొని బహుజన అభివృద్ధి కోసం బీఆర్ఎస్ పార్టీలో చేరినట్టు కేటీఆర్ పేర్కొన్నారు. కేసీఆర్‌తోనే బహుజనుల అభివృద్ధి జరుగుతుందని ఆర్ఎస్ ప్రవీణ్ కుమార్ నమ్మినట్టుగా కేటీఆర్ వివరించారు.

మరోవైపు.. సిర్పూర్ కాగజ్ నగర్‌తో తనకు వ్యక్తిగతంగా ప్రత్యేక అనుబంధం ఉన్నదని కేటీఆర్‌ చెప్పుకొచ్చారు. 2006 నుంచి 2009 వరకు సిర్పూర్ కాగజ్ నగర్‌లో పార్టీ బలోపేతం కోసం పని చేసినట్టుగా గుర్తుచేసుకున్నారు. 2009 అసెంబ్లీ ఎన్నికల్లో రాష్ట్రవ్యాప్తంగా బీఆర్ఎస్‌కు పది సీట్లు మాత్రమే వచ్చినా అందులో సిర్పూర్ కాగజ్ నగర్‌లో కూడా గులాబీ జెండా ఎగిరిందని కేటీఆర్ చెప్పుకొచ్చారు. అందరికీ వెలుగునిచ్చే సూర్యుడు కూడా అప్పుడప్పుడు మబ్బుల చాటుకు వెళ్లొస్తాడని.. అలాగే కేసీఆర్‌ కూడా ప్రజల ఆశీర్వాదంతో తిరిగి అధికారంలోకి వస్తారంటూ కేటీఆర్ ధీమా వ్యక్తం చేశారు.

కాగజ్ నగర్‌పై ఉన్న ప్రత్యేకమైన ప్రేమతో అక్కడ ఉన్న ఏకైక పరిశ్రమ కాగజ్‌నగర్‌ పేపర్ మిల్లును తెరిపించేందుకు అన్ని రకాలుగా ప్రయత్నం చేసినట్టుగా కేటీఆర్ చెప్పుకొచ్చారు. పేపర్ మిల్లును ఓపెన్ చేసేందుకు ముంబయి, కలకత్తా వంటి అనేక ప్రాంతాల్లో పర్యటించి.. చాలా కంపెనీలను కలిసి మాట్లాడి పేపర్ మిల్లును తిరిగి ఓపెన్ చేయించినట్టుగా కేటీఆర్ తెలిపారు.

ఆర్ఎస్ ప్రవీణ్ కుమార్ నాయకత్వంలో రాబోయే స్థానిక సంస్థల ఎన్నికల్లో సిర్పూర్ కాగజ్ నగర్ కార్యకర్తలు పనిచేసి అద్భుతమైన ఫలితాలను సాధించాలని కేటీఆర్‌ పిలుపునిచ్చారు. కాగజ్ నగర్‌లో కమిట్‌మెంట్ ఉన్న నాయకులు చాలామంది ఉన్నారని.. కాగజ్ నగర్ నియోజకవర్గంలో ఉన్న ఏడు మండలాల్లో గులాబీ జెండా ఎగరాలని కార్యకర్తలకు కేటీఆర్ సూచించారు.