ఆ ఘనత మాత్రం బీఆర్ఎస్ పార్టీదే.. కడియం శ్రీహరి

తెలంగాణలో రాజకీయ పరిస్థితులు రోజురోజుకు మరింత ఆసక్తికరంగా మారుతున్నాయి. అధికార ప్రతిపక్ష పార్టీల నేతల మధ్య జోరుగా మాటల యుద్ధం నడుస్తోంది. తాజాగా.. ఫిరాయింపు ఎమ్మెల్యేల అంశంపై సర్వత్రా చర్చ నడుస్తోంది. ఇప్పటికే బీఆర్ఎస్ పార్టీ ఈ అంశంపై సుప్రీంకోర్టును ఆశ్రయించింది. బీఆర్ఎస్ పార్టీలో గెలిచిన కాంగ్రెస్ కండువా కప్పుకున్న పది మంది ఎమ్మెల్యేలపై అనర్హత వేటు పడే వరకు న్యాయపరంగా పోరాడతాని, అందుకోసం న్యాయ నిపులతో అన్ని అనూకూలతలపై చర్చిస్తున్నామని ఢిల్లీలో బీఆర్ఎస్ వర్కింగ్ ప్రెసిడెంట్ కేటీఆర్ స్పష్టం చేసిన సంగతి తెలిసిందే. ఈ క్రమంలోనే.. తెలంగాణలో ఉపఎన్నికలు రావటం ఖాయమని ఆయన ధీమా వ్యక్తం చేశారు.

ఈ నేపథ్యంలో స్టేషన్ ఘన్ పూర్ ఎమ్మెల్యే కడియం శ్రీహరి స్పందించారు. ఎమ్మెల్యేల అనర్హత పిటిషన్ సుప్రీంకోర్టు పరిధిలో ఉందని.. ఈనెల 10వ తేదీన తీర్పు రానుందని కడియం తెలిపారు. అయితే.. సుప్రీంకోర్టు తీర్పును కచ్చితంగా శిరసావహిస్తామని.. అందులో ఏమాత్రం వెనక్కిపోయేది లేదని చెప్పుకొచ్చారు. ఒకవేళ ఉప ఎన్నికలు వస్తే మాత్రం తప్పకుండా బరిలో ఉంటానని కడి శ్రీహరి స్పష్టం చేశారు.

మరోవైపు.. బీఆర్ఎస్ పార్టీ స్వార్థ రాజకీయాలు చేస్తోందని కడియం శ్రీహరి చెప్పుకొచ్చారు. గులాబీ పార్టీ నేతలు ఒకసారి వెనక్కి తిరిగి చూసుకుంటే మంచిదని హితవు పలికారు. పార్టీ ఫిరాయించిన ఎమ్మెల్యేలను మంత్రులు చేసిన ఘనత కచ్చితంగా బీఆర్ఎస్ పార్టీదేనని విమర్శించారు. అప్పట్లో ఫిరాయింపులను ప్రోత్సహించిన బీఆర్ఎస్ నేతలు.. ఇప్పుడు సుద్దపూసల్లా మాట్లాడుతున్నారని ఎద్దేవా చేశారు. ఫిరాయింపుల మీద మాట్లాడే నైతిక హక్కు బీఆర్ఎస్‌కు ఎంత మాత్రమూ లేదన్నారు. బీఆర్ఎస్ పార్టీ చేస్తే సంసారం.. వేరే పార్టీ చేస్తే వ్యవభిచారమా అని కడియం శ్రీహరి ఘాటుగా ప్రశ్నించారు.

డిల్లీ ఎన్నికల్లో బీజేపీ గెలిస్తే కేటీఆర్ సంతోషపడుతున్నారని కడియం మండిపడ్డారు. అక్కడ ఆప్ ఓడిపోవాడానికి ప్రధాన కారణం బీఆర్ఎస్ పార్టీనేనని చెప్పుకొచ్చారు. ఢిల్లీ లిక్కర్ స్కాం కారణంగానే ఆమ్ ఆద్మీ పార్టీ ఓడిపోయిందని స్పష్టం చేశారు. అందులు కారణం బీఆర్ఎస్‌ పార్టీతో స్నేహం చెయ్యడమేనన్నారు. ఢిల్లీ ఎన్నికల్లో ఆప్- కాంగ్రెస్ పార్టీలు కలిసి పోటీ చేస్తే బాగుండేదని అభిప్రాయపడ్డారు. కేజ్రీవాల్ అతిగా ఊహించుకుని ఒంటరిగా వెళ్లడం వల్లే.. ఓటమి చవి చూశారన్నారు.