ఈగల బెడదతో గ్రామస్తుల అవస్థలు

సాధారణంగా మన ఇంట్లో ఒక ఈగ కనిపిస్తేనే దాన్ని పారదోలే వరకు ఊరుకోం. అదే మనం భోజనం చేసేటప్పుడు మన సమీపంలోకి వస్తేనే చిర్రెక్కిపోతాం కదా, కానీ మండల పరిధిలోని అంతారం గ్రామంలో ఎటుచూసినా ఈగలే. రోడ్లు, ఇళ్లు, ఇలా ప్రతిచోటు ఈగలతో నిండిపోయాయి. ఫలితంగా గ్రామంలోని ప్రజలు ప్రశాంతంగా తినలేకపోతున్నారు, ఉండలేకపోతున్నారు. ఆ పరిస్థితి ఎలా ఉంటుందో చెప్పనక్కర్లేదు. పెద్ద సంఖ్యలో ఈగలు ఆ గ్రామాన్ని చుట్టుముట్టి దండయాత్ర చేస్తూ ప్రజలను ఏ పని చేసుకోనివ్వడం లేదు. రాజమౌళి సినిమాలో ఈగ లాగా, గ్రామస్తులను ఈగలు ముప్పతిప్పలు పెడుతున్నాయి. గ్రామంలో ఏదైనా శుభకార్యం చేసుకోవాలన్నా, వేడుక చేసుకోవాలన్న ఈగల గురించి ఆలోచించాల్సిన పరిస్థితి వచ్చిందని ఆవేదన వ్యక్తం చేస్తున్నారు. ఈగలమోతలో మేము ఉండలేము మహాప్రభో అంటూ గ్రామస్తులు వాపోతున్నారు. గ్రామానికి ఎవరు వెళ్ళినా ఈగల బెడద గురించి చెబుతూ లబోదిబోమంటున్నారు. అయితే గ్రామంలో ఈగల బెడద ఎక్కువ కావడానికి, గ్రామానికి సమీపంలో ఉన్న కోళ్లఫారాలు కారణమని గ్రామస్తులు ఆరోపణలు గుప్పిస్తున్నారు. కోళ్ల ఫారాల నుండి వచ్చే వ్యర్థాల కారణంగా ఈగల వ్యాప్తి అధికం అయిందని వారు చెప్తున్నారు. గ్రామానికి సమీపంలో ఉన్న కోళ్ల ఫారాల యజమానులకు అనేకసార్లు తమ అవస్థలను చెప్పుకున్న పట్టించుకున్న దాఖలాలు లేవని గ్రామస్థులు వాపోతున్నారు. ఇక వారు సైతం ఈగలు రాకుండా ఏం చెయ్యాలో అర్ధం కాక సతమతం అవుతున్నారు. ఇక ఈగల బెడద తట్టుకోలేక తమ పరిస్థితిని అధికారులకు ఫిర్యాదు చేసిన, ఇదెక్కడి ఈగల గోలా అనుకుంటూ అధికారులు పట్టించుకోవడం లేదని వాపోతున్నారు. అధికారులు పరిస్థితిని అర్థం చేసుకొని ఈగల నుండి తమను రక్షించాలని గ్రామస్తులు కోరుతున్నారు. ఈగల బెడద కారణంగా తమ గ్రామ ప్రజలు అనారోగ్యం బారిన పడి ప్రాణాలు మీదకు తెచ్చుకోవాల్సిన పరిస్థితి నెలకొంటుందని, ఇప్పటికైనా అధికారులు స్పందించి ఈగల బెడద నుంచి విముక్తి కలిగించాలని వేడుకుంటున్నారు.