హైదరాబాద్ నగరంలో 24 గంటలూ దుకాణాలు ఓపెన్,,,,వ్యాపారులకు రేవంత్ సర్కార్ గుడ్‌న్యూస్

రంజాన్ మాసం వచ్చిందంటే చాలు హైదరాబాద్ నగరంలో ఉండే సందడే వేరు. రంజాన్ మాసంలో హైదరాబాద్ సరికొత్త శోభను సంతరించుకుంది. రకరకాల వస్త్రాలు, తినుబండారాలు, బిర్యాని ఘుమఘుమలు, ఇరానీ చాయ్, అత్తరు సువాసనలు ఇలా ఒక్కటమేటి నగరంలో ఆ హడావుడే వేరు. ఇక వివిధ రకాల వస్తువులు, దుస్తులకు నెలవైన చార్మినార్ రాత్రి బజార్ నగరవాసులను ఎంతగానో ఆకర్షిస్తోంది. కేవలం ముస్లింలే కాకుండా నగర నలుమూలలు, పలు జిల్లాలు, రాష్ట్రాల నుంచి కూడా వచ్చి ఇక్కడ చార్మినార్ వద్ద షాపింగ్ చేస్తారు. ఒక్క షాపింగే కాదు.. రంజాన్ నెలంతా వివిధ రకాల వంటకాలు ఘుమఘుమలు నగరవాసులను రారమ్మంటూ పిలుస్తాయి.

గాజుల తయారీ, అమ్మకాల్లో హైదరాబాద్ పాతబస్తీకి ప్రత్యేక స్థానం ఉంది. ముత్యాలు, గాజులకు నగరం ప్రసిద్ధి కావడంతో వాటిని ఖరీదు చేసేందుకు ఇతర రాష్ట్రాలు, విదేశాల నుంచి కూడా కొనుగోలుదారులు ఇక్కడకు వస్తుంటారు. సుగంధ ద్రవ్యాలు, అత్తరులు, ప్రత్యేక దుస్తుల షాపింగ్‌తో దుకాణాలు కళకళలాడుతుంటాయి. ఒక్క రంజాన్ మాసంలోనే కోట్ల బిజినెస్ జరగుతుంటుంది. ఏడాదంతా జరిగే బిజినెస్ ఒకెత్తయితే.. రంజాన్ మాసంలో జరిగే వ్యాపారం మరో ఎత్తు. ఈ నేపథ్యంలో రంజాన్ పర్వదినం పురస్కరించుకొని వ్యాపారలుకు రేవంత్ సర్కార్ గుడ్‌న్యూస్ చెప్పింది.

రంజాన్ మాసం వేళ ప్రభుత్వం కీలక నిర్ణయం తీసుకుంది. రంజాన్ మాసంలో వ్యాపారులకు ప్రత్యేక అనుమతి ఇచ్చింది. మార్చి 2 నుంచి 31 వరకు 24 గంటల పాటు వ్యాపార, వాణిజ్య సముదాయాలు కొనసాగించుకునేందుకు అవకాశం ఇచ్చింది. ఈ మేరకు ప్రభుత్వం ఉత్తర్వులు జారీ చేసింది. దీంతో వచ్చే నెలలో 24 గంటల పాటు నగరంలోని వ్యాపార సముదాయాలు తెరిచి ఉండనున్నాయి. ఈ నిర్ణయం వ్యాపారులకు వరం కానుంది. బిజినెస్ చేసుకునేందుకు వారికి మంచి అవకాశం దక్కింది. ప్రభుత్వ నిర్ణయంపై వ్యాపారులు హర్షం వ్యక్తం చేస్తున్నారు. ఇదిలా ఉండగా.. కొద్ది రోజుల క్రితమే రంజాన్ మాసం సందర్భంగా ముస్లిం ఉద్యోగుల పనిగంటలు వేళల్లో ప్రభుత్వం వెసులుబాటు కల్పించిన సంగతి తెలిసిందే.