హైడ్రా కమిషనర్ రంగనాథ్ సీరియస్ వార్నింగ్

చెరువులు, కుంటలు, ప్రభుత్వ భూముల పరిరక్షణే లక్ష్యంగా ఏర్పడిన హైడ్రా.. అక్రమార్కుల పాలిట సింహస్వప్నంగా మారింది. అయితే.. హైడ్రాను బూచిలా చూపి.. కొంత మంది కొత్త దందాలు మొదలుపెట్టారు. ప్రస్తుతం సంగారెడ్డి జిల్లా అమీన్ పూర్ పెద్ద చెరువు ఎఫ్టీఎల్ విషయంలో అయోమయం నెలకొనగా.. దాన్నే ఆసరాగా చేసుకుని అమాయకులను మరింత భయపెట్టి అందినకాడికి దండుకుంటున్నారు. అమీన్‌పూర్ చెరువు ఎఫ్టీఎల్ స‌రిహ‌ద్దుల నిర్ధార‌ణ పేరుతో జరుగుతున్న దందాల‌పై హైడ్రా క‌మిష‌న‌ర్ రంగ‌నాథ్ తీవ్ర ఆగ్రహం వ్యక్తం చేశారు.

పెద్ద చెరువు ముంపు బాధితుల జేఏసీ పేరుతో.. కొంతమంది దందాల‌కు పాల్పడుతున్నారని.. ర‌సీదులు, వాట్సాప్ మెస్సెజ్‌ల ఆధారాలతో సహా స్థానికుల నుంచి వచ్చిన ఫిర్యాదులను తీవ్రంగా పరిగణించిన రంగనాథ్.. సీరియస్ వార్నింగ్ ఇచ్చారు. పెద్ద చెరువు ఎఫ్టీఎల్ నిర్ధార‌ణ‌పై హైడ్రా చేస్తున్న క‌స‌ర‌త్తును ఆస‌రాగా తీసుకుని.. ఎవ‌రైనా దందాల‌కు పాల్పడితే క‌ఠిన చ‌ర్యలు తప్పవని రంగనాథ్ వార్నింగ్ ఇచ్చారు.

నీట మునిగిన లే ఔట్ ప్లాట్లను కాపాడేందుకు ఖ‌ర్చు అవుతుంద‌ని ఎవ‌రైనా దందాలు చేస్తే వారి ప‌ట్ల ప్రజ‌లు అప్రమత్తంగా ఉండాల‌ని సూచించారు. దందాల‌కు పాల్పడుతున్న వారిపై పోలీసు స్టేష‌న్‌లో ఫిర్యాదు చేయాల‌ని బాధితుల‌కు హైడ్రా కమిషనర్ రంగనాథ్ సూచించారు. అలాంటి వారిపై హైడ్రా నుంచి కూడా కేసులు పెట్టాల‌ని అధికారుల‌ను రంగనాథ్ ఆదేశించారు. అమీన్‌పూర్ చెరువులో నీట మునిగిన ప్లాట్ల య‌జ‌మానులు ఎవ‌రినీ ఆశ్రయించాల్సిన ప‌ని లేద‌ని రంగనాథ్ స్పష్టం చేశారు.

దాదాపు 95 ఎక‌రాలుండే చెరువు.. 450 ఎక‌రాల‌కు ఎలా విస్తరించింద‌నే విష‌య‌ంపై హైడ్రా లోతైన విశ్లేష‌ణ చేస్తోంద‌ని రంగనాథ్ తెలిపారు. ఈ విష‌యం ప్రభుత్వం దృష్టిలో కూడా ఉంద‌ని పేర్కొన్నారు. గ్రామ రికార్డులు, స‌ర్వే ఆఫ్ ఇండియా, నేష‌న‌ల్ రిమోట్ సెన్సింగ్ సెంట‌ర్ ఇమేజీల‌తో స‌రిపోల్చడ‌మే కాకుండా సంబంధిత‌ శాఖ‌ల అధికారుల‌తో స‌మీక్షించి ఎఫ్టీఎల్ నిర్ధారించనున్నట్టు రంగనాథ్ తెలిపారు.

జేఎన్‌టీయూ, ఐఐటీ కాలేజీల‌కు చెందిన వారి భాగ‌స్వామ్యంతో ఒక క‌మిటీని వేసి ఎఫ్టీఎల్ నిర్ధార‌ణ జ‌రుగుతుంద‌ని రంగనాథ్ తెలిపారు. రెండు, మూడు నెలల్లోనే ఈ ప్రక్రియ పూర్తవుతుంద‌ని చెప్పుకొచ్చారు. నిష్పక్షపాతంగా ఎక్కడా ఎలాంటి పొర‌పాట్లకు ఆస్కారం లేకుండా అమీన్‌పూర్ చెరువు ఎఫ్టీఎల్‌ నిర్ధార‌ణ జ‌రుగుతుంద‌ని.. అప్పటి వ‌ర‌కూ ఓపిక ప‌ట్టాల‌ని స్థానికులకు రంగనాథ్ సూచించారు.