రెండో సారి కూడా మీ సేవా కేంద్రాల్లో ఆదాయ, కుల ధ్రువీకరణ పత్రాలు తీసుకోవచ్చు.

విద్యార్థుల చదువుకు.. కేంద్ర, రాష్ట్ర ప్రభుత్వాలు కల్పించే వివిధ పథకాలకు కొన్ని ధ్రువీకరణ పత్రాలు అవసరం అవుతాయి. వాటిలో చాలా వరకు మీ సేవా కేంద్రాల్లో దరఖాస్తుల చేసుకొని.. ప్రింట్ తీసుకుంటే సరిపోతుంది. దరఖాస్తు చేసిన తర్వాత అవసరం అయితే.. స్థానిక మండల ఆర్ఐ తో కూడా సంతకం చేయించాల్సి ఉంటుంది. గత ప్రభుత్వ హయంలో దళితబంధు, బీసీబంధు వంటి పథకాలకు ఆదాయ ధ్రువీకరణ పత్రం ఎంతో అవసరం పడింది. వాటి ఆధారంగానే అర్హులను గుర్తించి.. పథకాన్ని అమలు చేశారు. అంతే కాదు.. ప్రస్తుతం తెలంగాణ ప్రభుత్వం అమలు చేస్తున్న ఆరు గ్యారెంటీల్లో కొన్ని పథకాలకు కూడా కుల, ఆదాయ ధ్రువీకరణ పత్రాలను అడుగుతున్నారు. అయితే ఒక్కసారి మీ సేవాలో ప్రింట్ తీసుకున్న తర్వాత మరో సారి వాటిని తీసుకోవడం కష్టం. మొదట తీసుకున్న వాటినే జాగ్రత్తగా భద్రపరుచుకోవాల్సి ఉంటుంది. మొదటి సారి తీసుకున్న పత్రాలు పొరపాటున ఎక్కడైనా పోతే అంతే సంగతులు. మళ్లీ కొత్త వాటి కోసం దరఖాస్తు చేసుకోవాల్సి వచ్చేది. ఇది వ్యయ ప్రయాసలతో కూడుకున్న ప్రక్రియ. అంతే కాదు సమయం కూడా వృథా అవుతుంది.

వీటితో పాటు.. విద్యార్థులకు కూడా ఈ సమస్య నిత్యం వేధిస్తూ వస్తోంది. ఇక నుంచి ఆ సమస్యలకు చెక్ పెడుతూ.. మీ సేవా ఉన్నతాధికారులు కీలక నిర్ణయం తీసుకున్నారు. ఇక నుంచి కుల, ఆదాయ ధ్రువీకరణ పత్రం పొందిన ఏడాదిలోపు మీకు మరల ఆ పత్రాలు అవసరం అయితే.. మళ్లీ వాటిని మీ సేవా కేంద్రాల్లో తీసుకునే వెసులుబాటు కల్పించారు. వీటి కోసం కొత్తగా దరఖాస్తు చేయాల్సిన అవసరం లేకుండానే ఈ సౌకర్యాన్ని కల్పించారు. కేవలం ఐదు నిమిషాల్లోనే కొత్త పత్రాలు మీరు తీసుకెళ్లొచ్చు. ఒకసారి పొందిన పత్రాన్ని రుసుం చెల్లించి.. తెలంగాణలోని ఏ జిల్లాలో అయినా.. మీరు మీ సేవా సెంటర్లో ఆ పత్రాలను తీసుకోవచ్చు.

దీని కోసం మీ దగ్గర మొదటి సారి తీసుకున్న రషీదుపై ఉన్న అప్లికేషన్ నంబర్ మీ సేవా వారికి చెబితే సరిపోతుంది. మీ దగ్గర పాత కుల, ఆదాయ పత్రాల జిరాక్స్ లు ఉన్నా.. వాటిపై నంబర్ చెప్పినా సరిపోతుంది. వారు ఆ నంబర్ ఎంటర్ చేయగానే.. పూర్తి వివరాలతో కంప్యూటర్లో మీ పత్రాలు ప్రత్యక్షం అవుతాయి. ఆ సమయంలో మీ యొక్క అడ్రస్, మొబైల్ నంబర్, రూ.35 రుసుం చెల్లిస్తే సరిపోతుంది. మళ్లీ మళ్లీ దరఖాస్తు చేసుకొని.. కార్యాలయాల చుట్టూ తిరిగే శ్రమ లేకుండా అధికారులు ఈ పరిష్కారాన్ని చూపించారు. దీనిపై విద్యార్థులు సంతోషం వ్యక్తం చేస్తున్నారు. ప్రస్తుతం ఈ అవకాశం కొన్ని జిల్లాల్లో అందుబాటులోకి రాగా.. త్వరలో తెలంగాణ వ్యాప్తంగా అమలు చేసే అవకాశాలు ఎక్కువగా ఉన్నాయి.