ప్రభుత్వం కంటే ప్రైవేటు పాఠశాలలు గొప్పవా,,,, సీఎం రేవంత్ రెడ్డి

విద్యాశాఖను ప్రక్షాళన చేసి ప్రభుత్వం అండగా ఉంది. తెలంగాణలో విద్యకు అధిక ప్రాధాన్యం ఇచ్చి విద్యాశాఖకు రూ.21,650 కోట్లు కేటాయించినట్లు సీఎం రేవంత్ రెడ్డి వెల్లడించారు. గతంలో విద్యాశాఖ నిర్లక్ష్యానికి గురైందని.. తమ ప్రభుత్వం మాత్రం విద్యార్థుల బంగారు భవిష్యత్తు కోసం కీలక నిర్ణయాలు తీసుకుంటుందని చెప్పారు. హైదరాబాద్‌ రవీంద్రభారతిలో.. జూనియర్ లెక్చరర్‌, పాలిటెక్నిక్‌ లెక్చరర్ల ఉద్యోగాలకు ఎంపికైన 1,532 మందికి ముఖ్యమంత్రి నియామక పత్రాలు అందజేశారు. కొత్తగా ఉద్యోగ బాధ్యతలు చేపడుతున్న వారికి అభినందనలు తెలియజేశారు. కొత్త అధ్యాపకులు రాష్ట్రాన్ని అభివృద్ధి పథంవైపు నడిపించాలని కోరారు.

తమ ప్రభుత్వం అధికారంలోకి వచ్చిన తర్వాత.. 50 వేలకు పైగా నియామకాలు చేపట్టినట్లు చెప్పారు. ఉద్యోగ నియామకాలకు సంబంధించి కోర్టుల్లో ఉన్న చిక్కుముళ్లు విప్పుతూ సమస్యలు పరిష్కరించామనన్నారు. దేశ భవిష్యత్తు తరగతి గదుల్లో ఉందని పెద్దలు చెప్పేవారని.. అందుకే పాఠశాల విద్యకు పెద్దపీట వేస్తున్నామన్నారు. ప్రస్తుతం 30 వేల ప్రభుత్వ పాఠశాలల్లో 25 లక్షల మంది విద్యార్థులు చదువుతున్నారన్నారు. రాష్ట్రవ్యాప్తంగా 11 వేల ప్రైవేటు స్కూల్స్ ఉంటే.. 36.7 లక్షల మంది విద్యార్థులు చదువుతున్నారన్నారు. ప్రభుత్వం కంటే ప్రైవేటు పాఠశాలలు గొప్పవా? అని ప్రశ్నించారు. ప్రైవేటు పాఠశాలల్లో విద్యార్థులకు రూ.25 వేల వరకు ఖర్చవుతుంటే.. ప్రభుత్వ స్కూళ్లలో మాత్రం రూ.లక్ష వరకు ఖర్చవుతోందన్నారు.

విద్యా శాఖ ఆధారంగా తెలంగాణ భవిష్యత్తు ఆధారపడి ఉందని.. గత పదేండ్లుగా విద్యారంగాన్ని, నిరుద్యోగులను నిర్లక్ష్యం చేశారన్నారు. ఒకమనిషి జీవితంలో ఎంత కోల్పోయాడో తెలంగాణ సమాజం అర్ధం చేసుకోవాలని సూచించారు. విద్యాశాఖను ప్రక్షాళన చేశామని.. విద్యవస్థలో మార్పులు తెస్తున్నామని చెప్పారు. ఉద్యోగం సాదించడంతోనే ఉద్యోగుల పని పూర్తి కాలేదని.. తెలంగాణాలో విద్యావ్యవస్థను పటిష్టం చేసే పనిలో నిమగ్నమవ్వాలని కొత్తగా ఎంపికైన జూనియర్ లెక్చర్లకు సూచించారు. కసితో పని చేయాలని.. అక్షరాస్యతలతో కేరళను దాటేలా చేయాలన్నారు. తెలంగాణ ఉద్యమానికి నిరుద్యోగులు పునాదులుగా మారారని.. వారికి ఉద్యోగ భద్రత కల్పించాల్సిన అవసరం ఉందని పేర్కొన్నారు. అందుకే తాము అధికారంలోకి రాగానే జాబ్ క్యాలెండర్ విడుదల చేసినట్లు సీఎం రేవంత్ వెల్లడించారు.