రైతులకు కొత్త పథకం ప్రకటించిన రేవంత్ సర్కార్

తెలంగాణ వార్షిక బడ్జెట్ 3.04 కోట్లతో ప్రవేశపెట్టగా.. అందులో వ్యవసాయ శాఖకు 24,439 కోట్లు కేటాయించారు. ఇక బడ్జెట్‌లో తెలంగాణ ప్రభుత్వం కొత్త పథకం ప్రవేశపెట్టింది. గిరిజనాభివృద్ధి కోసం రాష్ట్ర ప్రభుత్వం మొదటిసారిగా 'ఇందిరా గిరి జలవికాసం' అనే ప్రత్యేక పథకంతో పోడు భూములు సాగు చేసుకునే గిరిజన రైతుల కొరకు సౌర ఆధారిత పంపుసెట్ల ద్వారా సాగునీటిని అందించాలని నిర్ణయించారు. ఈ మేరకు బడ్జెట్ ప్రసంగంలో ఆర్థిక మంత్రి భట్టి విక్రమార్క పథకంపై ప్రకటన చేశారు. రానున్న నాలుగేళ్లలో 12,600 కోట్లతో, 2.1 లక్షల గిరిజన రైతులకు ఈ పథకం ద్వారా లబ్ధి చేకూర్చనున్నట్లు వెల్లడించారు. పోడు భూముల్లో అటవీ ఉత్పత్తులకు సంబంధించిన తోటల పెంపకాన్ని ప్రోత్సహిస్తామని తెలిపారు.

ఆదివాసీల, గిరిజనుల వైవిధ్య జీవన విధానాన్ని, వారి హక్కులను కాపాడుతూ, వారికి అభివృద్ధి ఫలాలు అందేలా కృషి చేస్తున్నామని ఆర్థిక మంత్రి భట్టి బడ్జెట్ ప్రసంగంలో వెల్లడించారు. గిరిజన అభివృద్ధి కార్యాచరణ ప్రణాళిక (STSDF) ద్వారా గిరిజన ప్రాంతాలలో వైద్యం, విద్య, జీవనోపాధి వంటి అనేక కీలక రంగాల్లో అభివృద్ధికి నిధులను కేటాయిస్తున్నామన్నారు. ఈ ప్రాంతాల్లో మౌలిక సదుపాయాలను మెరుగుపరచి, వాటిని సమర్థంగా నిర్వహించడం కోసం ప్రభుత్వం ప్రత్యేక చర్యలు తీసుకుంటోందన్నారు.

రాష్ట్రంలో ఆయిల్ పామ్ సాగును విస్తృతంగా చేపట్టాలన్న ప్రభుత్వ లక్ష్యంతో, ప్రోత్సాహక సబ్సిడీని అందిస్తోందని భట్టి విక్రమార్క స్పష్టం చేశారు. ఆయిల్ పామ్ దిగుమతులపై కస్టమ్స్ సుంకం లేని కారణంగా మన రైతులకి సరైన ధర లభించనందున, కేంద్ర ప్రభుత్వంతో సంప్రదింపులు జరిపి ఆయిల్ పామ్ దిగుమతులపై కస్టమ్స్ సుంకం విధించేలా కృషి చేశామన్నారు. తద్వారా, ఆయిల్ పామ్ రైతులకు టన్నుకు 2 వేల రూపాయలు అదనపు లబ్ధి చేకూరి, ఆయిల్ పామ్ సాగు మరింత లాభదాయకంగాను, ఆకర్షణీయంగాను మారిందన్నారు.. ఉద్యానవన సాగులో బిందు సేద్యం కొరకు సౌర విద్యుత్తును ఉపయోగించే రైతులకు ప్రాధాన్యతనిచ్చి వారికి ప్రోత్సాహక సబ్సిడీని అందిస్తామని ఆర్థిక మంత్రి భట్టి విక్రమార్క వెల్లడించారు.