ఇద్దరి మెడలో ఒకేసారి తాళి కట్టిన యువకుడు

ప్రేమించిన ప్రతి ఒక్కరూ పెళ్లి దాక వెళ్లలేరు. పెద్దల సమక్షంలో కుదిరిన వివాహాలతో పాటు.. ప్రేమ వివాహాలు కూడా ఈ మధ్య కాలంలో ఎక్కువగా జరుగుతున్నాయి. ప్రేమ పెళ్లిళ్లు జరగాలంటే.. పెద్దలను ఎదిరించి ఒకరిపై ఒకరు నమ్మకంతో దేవాలయాల్లో లేదా రిజిస్ట్రార్ ఆఫీసుల్లో గాని పెళ్లి చేసుకునే వారు ఉంటారు. ఇంకొంత మంది పెద్దలను ఒప్పించి.. ‘లవ్ విత్ అరేంజ్డ్ మ్యారేజ్’ విధానంలో పెళ్లి చేసుకుంటున్నారు. అయితే ఇక్కడ ఓ యువకుడు ప్రేమించి.. పెద్దలను ఒప్పించి పెళ్లి చేసుకున్నాడు. ఇక్కడ ట్విస్ట్ ఏంటంటే.. అతడు ఒక్క అమ్మాయిని ప్రేమించలేదు.. ఇద్దరిని ప్రేమించి.. ఒకేసారి ఇద్దరినీ పెళ్లి చేసుకున్నాడు.

ఒకే మండపంలో ఇద్దరి మెడలో తాళి కట్టాడు. మీరు నమ్మడం లేదు కదా.. ఇది నిజంగానే జరిగింది. ఇద్దరు యువతులు అక్కాచెల్లెళ్లు కాదు.. అలా అని స్నేహితులు కూడా కారు. వారిద్దరిది వేర్వేరు గ్రామాలు.. ఆయా గ్రామాల్లోని వారి తల్లిదండ్రులను ఒప్పించి.. ఇద్దరిని పెళ్లి చేసుకున్నాడు సూర్యదేవ్ అనే యువకుడు. పెళ్లి కార్డులో కూడా ఇద్దరి పేర్లను చేర్చి.. పెద్దలను పెళ్లికి ఆహ్వానించాడు. దీనికి సంబంధించి పూర్తి వివరాల్లోకి వెళ్తే..

కొమురం భీం ఆసిఫాబాద్ జిల్లాలోని గుమ్నూర్‌కు చెందిన సూర్యదేవ్ అనే యువకుడు లాల్దేవి, జలకర్ దేవి అనే ఇద్దరు యువతులను ప్రేమించాడు. మూడేళ్లుగా వీరి ప్రేమ వ్యవహారం నడుస్తోంది. అయితే.. ప్రేమించిన ఆ ఇద్దరి యువతులకు.. పెళ్లి చేసుకుంటానని సూర్య మాటిచ్చాడు. మరి, అన్న మాట తప్పకూడదు అనుకున్నాడేమో.. ఈ ట్రై యాంగిల్ ప్రేమకథను వారి ఇద్దరికి చెప్పాడు. పైగా మీ ఇద్దర్ని పెళ్లి చేసుకుని సంతోషంగా చూసుకుంటానని హామీ ఇచ్చాడు. సూర్య చెప్పిన విషయం కన్విన్స్‌గా అనిపించిందేమో వారిద్దరూ ఒప్పుకున్నారు. వారినే కాదు.. వాళ్ల ఇంట్లో వాళ్లను.. గ్రామ పెద్దలను.. ఇలా అందర్ని ఒప్పించేశాడు. అంతా ఒప్పుకున్నారు.. ఇంకేముంది ఘనంగా పెళ్లి ఏర్పాట్లు చేసుకున్నాడు. ఒకే పెళ్లి మండపంలో ఒకే ముహుర్తానికి అతిథుల సమక్షంలో ఇద్దరి‌ మెడలో మూడు ముళ్లు వేసి ఇద్దరికి ఒకేసారి భర్తగా మారాడు. వారిద్దరిలో ఎవరికీ లోటు లేకుండా చూసుకుంటానని బాండ్ పేపర్‌పై రాసి ఇచ్చాడు.

ఆ యువకుడికి మూడు ఎకరాల పొలం ఉంది. వారిద్దరికీ చెరో సగం అంటే.. ఎకరంన్నర చొప్పుర రాసి ఇచ్చేశాడు. దీనికి పెద్దలు కూడా అంగీకరించారు. ఈ పెళ్లికి సంబంధించి వార్త సోషల్ మీడియాలో వైరల్‌గా మారింది. నెటిజన్లు వివిధ రకాలుగా స్పందిస్తున్నారు. ఒకరిని ప్రేమించి.. పెద్దలను ఒప్పించి పెళ్లి చేసుకోవడమే కష్టంగా మారిన ఈ కాలంలో ఇద్దరిని ప్రేమించి.. పెద్దలను ఒప్పించడమంటే.. ఈ గురుడు సామాన్యుడు కాదంటూ కామెంట్స్ చేస్తున్నారు.